ചെൽസിക്ക് ജയിച്ചേ തീരൂ.. ചാംപ്യൻസ്‍ലീഗ് പ്രീക്വാർട്ടർ രണ്ടാം പാദം ഇന്നു മുതൽ

ലണ്ടൻ∙ ചാംപ്യൻസ് ലീഗ് ഫുട്ബോളിൽ ക്വാർട്ടറിലെത്തുന്ന ആദ്യ 2 ടീമുകളെ ഇന്നറിയാം. രണ്ടാം പാദ പ്രീക്വാർട്ടറിൽ ഇംഗ്ലിഷ് ക്ലബ് ചെൽസി ജർമൻ ക്ലബ് ബൊറൂസിയ ഡോർട്മുണ്ടിനെയും പോർച്ചുഗീസ് ക്ലബ് ബെൻഫിക്ക ബൽജിയത്തിൽനിന്നുള്ള ക്ലബ് ബ്രൂഷിനെയും നേരിടും. രാത്രി 1.30നാണ് 2 മത്സരങ്ങളും. സോണി ടെൻ ചാനലുകളിൽ തൽസമയം.

ആദ്യപാദ പ്രീക്വാർട്ടറിൽ ഡോർട്മുണ്ട് 1-0നു ചെൽസിയെയും ബെൻഫിക്ക 2-0നു ക്ലബ് ബ്രൂഷിനെയും തോൽപിച്ചിരുന്നു. മോശം ഫോമിൽ തുടരുന്ന ചെൽസി ശനിയാഴ്ച ഇംഗ്ലിഷ് പ്രിമിയർ ലീഗിൽ ലീഡ്സ് യുണൈറ്റഡിനെതിരെ നേടിയ ആശ്വാസജയത്തിന്റെ ആത്മവിശ്വാസത്തിലാണ് ഇന്ന് സ്വന്തം ഗ്രൗണ്ടിൽ ഇറങ്ങുക. ക്വാർട്ടറിൽ കടക്കാൻ 2 ഗോൾ വ്യത്യാസത്തിൽ ജയിക്കണം. ഈ വർഷം ഇതുവരെ 12 മത്സരങ്ങൾ കളിച്ച ചെൽസി രണ്ടിൽ മാത്രമാണ് ജയിച്ചത്. ലീഗിൽ നിലവിൽ 10–ാം സ്ഥാനത്താണ്. ഫെബ്രുവരിയിൽ ടീമിന്റെ ഏക ഗോൾ നേടിയ പോർച്ചുഗൽ താരം ജോവ ഫെലിക്സിലാണ് ഗോളടി പ്രതീക്ഷകൾ. പരുക്കേറ്റ ഡിഫൻഡർ തിയാഗോ സിൽവ കളിക്കില്ല.

ഈ വർഷം ഇതുവരെ തോൽവി അറിയാതെയാണ് ബുന്ദസ്‌ ലിഗയിലെ രണ്ടാം സ്ഥാനക്കാരായ ഡോർട്മുണ്ടിന്റെ വരവ്. അവസാനം കളിച്ച 5 കളികളിലും ജയം. എന്നാൽ, ചാംപ്യൻസ് ലീഗിൽ ഇംഗ്ലിഷ് ടീമുകൾക്കെതിരെ കളിച്ച അവസാന 5 മത്സരങ്ങളിലും ഡോർട്മുണ്ട് തോറ്റിരുന്നു.

ശക്തരായ ബെൻഫിക്കയ്ക്കെതിരെ അട്ടിമറി വിജയം സ്വപ്നം കണ്ടാണ് ക്ലബ് ബ്രൂഷ് പോർച്ചുഗലിൽ എത്തിയിരിക്കുന്നത്. അവസാന എട്ടിൽ ഇടംപിടിക്കാൻ 3 ഗോൾ വിജയം വേണം ബ്രൂഷിന്. ആദ്യ മത്സരത്തിലെ ജയം സ്വന്തം ഗ്രൗണ്ടിൽ ആവർത്തിക്കുകയാണ് പോർച്ചുഗീസ് ലീഗ് 1-ാം സ്ഥാനക്കാരായ ബെൻഫിക്കയുടെ ലക്ഷ്യം.

English Summary: Chelsea must win in champions league football