ക്വാലലംപൂർ∙ മലേഷ്യ മാസ്റ്റേഴ്സ് ബാഡ്മിന്റൻ ടൂർണമെന്റിൽ ഇന്ത്യയുടെ സൈന നെഹ്‌വാൾ സെമിയിൽ പുറത്ത്. സ്പെയിനിന്റെ കരോലിന മാരിനാണ് നേരിട്ടുള്ള സെറ്റുകൾക്ക് സൈനയെ തോൽപ്പിച്ചത്. മൂന്നു തവണ ലോകചാംപ്യനായിട്ടുള്ള മാരിൻ, 40 മിനിറ്റുകൊണ്ട് സൈനയെ തകർത്തുവിട്ടു. സ്കോർ: 16-21, 13-21.
2017ൽ ഇവിടെ കിരീടം നേടുകയും 2011ൽ രണ്ടാം സ്ഥാനത്തെത്തുകയും ചെയ്ത താരമാണ് സൈന. നേരത്തെ, മുൻ ലോക ചാംപ്യൻ നൊസോമി ഒകുഹാരയെ തോൽപ്പിച്ചാണ് സൈന സെമിയിലെത്തിയത്. ഒകുഹാരയ്ക്കെതിരായ മൽസരവിജയങ്ങളിൽ 8–4 ലീഡുള്ള ഏഴാം സീഡ് സൈന 21–18, 23–21ന് ആണ് വിജയിച്ചത്. ആദ്യ ഗെയിമിൽ 9–15നും രണ്ടാം ഗെയിമിൽ 14–18നും പിന്നിൽ നിന്ന ശേഷമായിരുന്നു സൈനയുടെ തിരിച്ചുവരവ്.