ഫ്ലോറിഡയിൽ അവധിക്കാല ആഘോഷത്തിനിടെ കൈകോർത്ത് നടക്കുന്ന രൺവീർ സിങ്ങിന്റെയും ദീപിക പദുക്കോണിന്റെയും വിഡിയോ കഴിഞ്ഞ ദിവസം സോഷ്യൽ മീഡിയയിൽ വൈറലായിരുന്നു. താരങ്ങളുടെ കടുത്ത ആരാധികയായ ൈസനബ് ഖാൻ ആണ് വിഡിയോ പകർത്തിയത്.
വിഡിയോ പകർത്തിയ തന്നെ താരങ്ങൾ ആക്രമിച്ചെന്നാണ് സൈനബ് ആരോപിക്കുന്നത്. സൈനബിന്റെ വിഡിയോ ഒരു ഫോട്ടോഗ്രാഫർ ഇൻസ്റ്റഗ്രാമിൽ ഷെയർ ചെയ്തിരുന്നു. ഇതിന് താഴെയാണ് സൈനബിന്റെ കമന്റ്.
''ഞാനാണ് ഈ വിഡിയോ പകര്‍ത്തിയത്. അതിന് അവരെന്നെ ആക്രമിച്ചു, അപമര്യാദയായി പെരുമാറി. അവർക്ക് ഒരു ആരാധികയെ നഷ്ടമായി.
രൺവീറിനും ദീപികക്കുമെതിരെ കടുത്ത ആരോപണങ്ങളുന്നയിച്ച സൈനബയെ തള്ളി മറ്റാരാധകർ രംഗത്തെത്തി. താരങ്ങൾക്കും സ്വകാര്യതയുണ്ടെന്ന് ഓർക്കണമായിരുന്നു എന്നും അനുവാദം ചോദിച്ചിട്ട് വിഡിയോ പകർത്താമായിരുന്നു എന്നുമാണ് പ്രധാന വാദം.
എന്നാൽ താനല്ല, മറ്റാരായിരുന്നാലും അവരുടെ വിഡിയോയും ചിത്രങ്ങളും പകർത്തുമായിരുന്നു എന്ന് സൈനബ മറുപടി നൽകി. ദീപിക ചിരിച്ചുകൊണ്ടു നടന്നടുത്തപ്പോൾ ചിത്രമെടുത്തോട്ടെ എന്ന് ചോദിച്ചിരുന്നു. എന്നാൽ രണ്ടുപേരും ചേർന്നു തന്നെ ആക്രമിച്ചു, സൈനബ പറഞ്ഞു.