ജീവിതത്തോട് പ്രണയമുണ്ടെങ്കിൽ പിന്നെ കുറവുകളും പോരായ്മകളും മറ്റുള്ളവരുടെ കണ്ണുകളിൽ മാത്രമാണെന്ന് പലകുറി തെളിയിച്ചിട്ടുണ്ട് ഷിഹാബ്. അതെ ‘ഷിഹാബ് സിപി’ അതിരുകളില്ലാത്ത അതിജീവനത്തിന് കേരളം നൽകിയ പേര്. ജന്മനാ കൈകാലുകളില്ലാത്ത യുവാവ് ആത്മവിശ്വാസം കൊണ്ട് ലോകം കീഴടക്കിയ കഥ ഇന്നും കേരളക്കരയുടെ ഹൃദയതാളമാണ്.
‘ഹീറോ’ എന്ന് ഷിഹാബിനെ വിളിക്കാനാണ് അയാളെ അറിയുന്നവർക്ക് ഇഷ്ട‌ം. മോട്ടിവേഷണൽ സ്പീക്കർ, ചിത്രകാരൻ, അധ്യാപകൻ, നർത്തകൻ വൈകല്യങ്ങളെ പടിക്കു പുറത്തു നിർത്തി ഷിഹാബ് കെട്ടിയാടിയ വേഷങ്ങൾ മാത്രം മതി മലയാളിക്ക് ഊറ്റം കൊള്ളാൻ. പരിമിതികളുടെ കെട്ടുപാടുകൾക്കിടയിൽ നിന്നും മാനം മുട്ടെ പറക്കാൻ.
കൈകാലുകൾ ഇല്ലാത്ത ഷിഹാബിന്റെ ഖൽബിലേക്ക് ഷഹാന ഫാത്തിമയെന്ന പെൺകൊടിയെത്തിയ വാർത്ത അടുത്തിടെയാണ് കേരളക്കര ശ്രവിച്ചത്. ഷിഹാബിന്റെ ജീവിതത്തിലേക്കും ഷഹാന ഫാത്തിമ എന്ന പെൺകുട്ടി എത്തിയതോടെ ആ ജീവിതത്തിന്റെ നിറം പത്തിരട്ടിയായി വർധിച്ചു. പ്രണയത്തിനും പരിമിധിയില്ലെന്നു ജീവിതം കൊണ്ട് തെളിയിച്ച ഇരുവരും പ്രണയഗാനങ്ങൾ കോർത്തിണക്കി പങ്കുവച്ച ടിക്ടോക്ക് വിഡിയോ മലയാളികൾ നെഞ്ചേറ്റുകയാണ്.