വാടക ഗർഭധാരണത്തിലൂടെയുണ്ടായ കുഞ്ഞിനോട് ആത്മബന്ധം തോന്നിയില്ല : ക്ലോ കർദാഷിയാന്‍

അമേരിക്കയിലെ പ്രമുഖ ടെലിവിഷൻ താരവും മോഡലുമാണ് ക്ലോ കർദാഷിയാൻ. വാടക ഗർഭധാരണത്തെപറ്റി ക്ലോ പറഞ്ഞ കാര്യങ്ങളാണിപ്പോൾ സോഷ്യൽ മീഡിയയിൽ ചർച്ചയാകുന്നത്. വാടക ഗർഭധാരണത്തിലൂടെ നേടിയ കുട്ടിയോട് കൂടുതൽ ആത്മബന്ധം കാണിക്കാൻ ബുദ്ധിമുട്ടുണ്ടായിരുന്നെന്നാണ് വെളിപ്പെടുത്തൽ. 

ക്ലോയ്ക്ക് രണ്ട് മക്കളാണുള്ളത്. മൂത്ത മകനെ വാടക ഗര്‍ഭധാരണത്തിലൂടെയാണ് സ്വന്തമാക്കിയത്. മകളെ ഗര്‍ഭം ധരിച്ച് പ്രസവിക്കുകയും ചെയ്തു. ഇതിൽ വാടക ഗര്‍ഭധാരണത്തിലൂടെ ഉണ്ടായത് കൊണ്ട് തനിക്ക് മകനോട് ആത്മബന്ധം ഉണ്ടാകാൻ പ്രയാസം നേരിട്ടെന്നാണ് ക്ലോ പറഞ്ഞത്. പ്രസവിച്ചതു കൊണ്ട് മകളോട് അത്തരത്തിലൊരു പ്രശ്നമുണ്ടായിട്ടില്ലെന്നും അവർ വ്യക്തമാക്കി. 

‘വാടക ഗര്‍ഭധാരണം മോശപ്പെട്ടൊരു കാര്യമാണെന്ന് ഒരിക്കലും പറയില്ല. അത് മഹനീയം തന്നെയാണ്. എന്നാലത് തീര്‍ത്തും വ്യത്യസ്തമായൊരു അനുഭവമാണ്. മകനെ പ്രസവിച്ച സ്ത്രീയില്‍ നിന്ന് അവനെയും കൊണ്ട് അടുത്ത മുറിയിലേക്ക് പോകുമ്പോള്‍ എനിക്കതൊരു വ്യവഹാരമായിട്ടാണ് തോന്നിയത്. അത് എനിക്ക് ഒരു ഷോക്കിംഗ് അനുഭവമായി മാറി. ആ അമ്മയില്‍ നിന്ന് മകനെ വേര്‍പെടുത്തിയെടുക്കുന്നത് പോലെ തോന്നി. അത് പൂര്‍ണമായും ഉള്‍ക്കൊള്ളാൻ എനിക്കൊരുപാട് സമയം വേണ്ടിവന്നു’. ക്ലോ കർദാഷിയാൻ പറഞ്ഞു. 

‘വാടക ഗര്‍ഭധാരണത്തിലൂടെ അമ്മയായ ആരെങ്കിലും എനിക്കുണ്ടായ അതേ അനുഭവത്തിലൂടെ കടന്നുപോയിട്ടുണ്ടെങ്കില്‍ അവര്‍ അക്കാര്യം പരസ്യമായി പങ്കിട്ടിരുന്നുവെങ്കില്‍ എന്ന് ഞാനാഗ്രഹിക്കുന്നു. മകള്‍ ജനിച്ചപ്പോഴാകട്ടെ എനിക്ക് കൂടുതല്‍ അടുപ്പം തോന്നി. അവള്‍ വയറ്റില്‍ കിടന്നിരുന്നപ്പോള്‍ പറഞ്ഞറിയിക്കാനാവാത്ത അനുഭൂതിയായിരുന്നു’. ക്ലോ കൂട്ടിച്ചേർത്തു. 

Content Summary: Khloe Kardashian struggled to connect with surrogate-born son