പബ്ബുകളിലെ ആവേശം, തെറപ്പിയിലൂടെ സാന്ത്വനമായവൾ; വിവാദ പ്രണയ നായിക: ആരാണ് കെനിഷ ഫ്രാൻസിസ്?

രവിയുടെ പ്രഖ്യാപനം തനിക്കും കുടുംബത്തിനും ഞെട്ടലും സങ്കടവുമുണ്ടാക്കിയെന്നും 14 വർഷം നീണ്ട വിവാഹബന്ധം വേർപെടുത്തുമ്പോൾ പരസ്പര ബഹുമാനവും സ്വകാര്യതയും ലംഘിക്കാതെ ആവണമായിരുന്നുവെന്നും താനും കുട്ടികളും വൈകാരികമായ അസ്ഥിരതയിലൂടെയാണ് കടന്നു പോകുന്നതെന്നും സൂചിപ്പിക്കുന്ന ആരതിയുടെ പോസ്റ്റ് പുറത്തു വന്നതോടെയാണ്, ഗായികയുമായുള്ള രവിമോഹന്റെ ബന്ധമാണ് ദാമ്പത്യത്തകർച്ചയ്ക്ക് കാരണമായതെന്ന തരത്തിൽ വാർത്തകൾ വന്നത്.

ആ കൂടിക്കാഴ്ച വിവാഹ മോചന ഹർജി ഫയൽ ചെയ്തതിനു ശേഷം

രവിമോഹൻ– ആരതി ദാമ്പത്യം തകരാൻ കാരണം താനാണെന്ന തരത്തിൽ വാർത്തകൾ പരന്നപ്പോൾ തന്നെ കെനിഷ മാധ്യമങ്ങൾക്ക് വിശദീകരണം നൽകിയിരുന്നു. കഴിഞ്ഞ വർഷം ഒരു പാട്ടിന്റെ ലോഞ്ചിൽ വച്ചാണ് താനും രവിയും പരിചയപ്പെട്ടതെന്നും അന്നൊന്നും യാതൊരു തരത്തിലുള്ള അടുപ്പവും തമ്മിലില്ലായിരുന്നുവെന്നും ദാമ്പത്യത്തിലെ പാകപ്പിഴകൾ കാരണം വിവാഹമോചന ഹർജി ഫയൽ ചെയ്ത ശേഷം മാനസികവും വൈകാരികവുമായി തകർന്ന രവി മോഹൻ കൗൺസിലിങ്ങിനായാണ് തന്നെ സമീപിച്ചതെന്നുമാണ് കെനിഷയുടെ വിശദീകരണം. വൈകാരികാശ്രയത്തിന് രവി പ്രഫഷനൽ ഹെൽപ് എടുക്കുന്ന കാര്യം ചെന്നൈയിൽ ആരും അറിയാതിരിക്കാനാണ് തന്നെ സമീപിച്ചതെന്നും കെനിഷ പറയുന്നു. ഇക്കാര്യത്തിൽ കെനിഷയെ പിന്തുണച്ചു രവിയും രംഗത്തെത്തിയിരുന്നു. എന്തിനാണ് മൂന്നാമതൊരു വ്യക്തിയെ ഇക്കാര്യങ്ങളിലേക്ക് വലിച്ചിഴക്കുന്നതെന്നും താനും കെനിഷയും ചേർന്ന് ഗോവയിൽ ഒരു ഹീലിങ് സെന്റർ ആരംഭിക്കാൻ പദ്ധതിയുണ്ടെന്നും അതിനുവേണ്ടി സ്ഥലം തിരഞ്ഞുകൊണ്ടിരിക്കുകയാണെന്നുമായിരുന്നു രവിയുടെ വിശദീകരണം.