രണ്ടു വർഷത്തെ ദാമ്പത്യം; പിന്നാലെ അർബുദം; അദ്ഭുത രക്ഷപ്പെടൽ: മനീഷ ‘ഹീറോ’ കൊയ്‌രാള

അമ്മയാകാൻ പറ്റില്ലയെന്ന സങ്കടത്തെ അതിജീവിച്ചു

അർബുദം സ്ഥിരീകരിച്ചപ്പോൾ താൻ തളർന്നു പോയിരുന്നു എന്നും ഇനി മുന്നോട്ട് എത്രനാൾ ഉണ്ടെന്നു പോലും അറിയാത്ത ആ കാലത്താണ് ഇനിയുള്ള കാലം സന്തോഷത്തോടെ ജീവിക്കാൻ പഠിച്ചതെന്നും മനീഷ പറഞ്ഞിട്ടുണ്ട്. ഓവേറിയൻ കാൻസർ ആയതുകൊണ്ട് ഒരിക്കലും തനിക്കൊരു അമ്മയാകാൻ കഴിയില്ല എന്ന സങ്കടം ആ കാലത്തൊക്കെ അലട്ടിയിരുന്നു. കാലക്രമേണ അതിനെ മറികടന്നുവെന്നും മനീഷ അഭിമുഖങ്ങളിൽ വ്യക്തമാക്കിയിരുന്നു. അർബുദം എന്ന രോഗത്തെ ഒരു ശാപമായല്ല കാണുന്നതെന്നും ജീവിതരീതിയിൽ മാറ്റം വരുത്താൻ എത്തിയ സമ്മാനമായാണ് പിൽക്കാലത്ത് അതിനെ കണ്ടതെന്നും മനീഷ പറഞ്ഞിട്ടുണ്ട്. അർബുദത്തിനു മുന്നിൽ തളർന്നു പോകാതെ വാശിയോടെ പൊരുതി ജയിച്ച അനുഭവങ്ങൾ ‘ഹീൽഡ്: ഹൗ കാൻസർ ഗെറ്റ് മീ എ ന്യൂ ലൈഫ്’ എന്ന പുസ്തകത്തിലൂടെ മനീഷ പങ്കുവെച്ചിട്ടുണ്ട്. മുംബൈയിലും നേപ്പാളിലും അമേരിക്കയിലും ആയി നടത്തിയ ചികിത്സയിലൂടെയാണ് മനീഷ കാൻസർ മുക്തയായത്.

ഭയത്തെ അതിജീവിച്ച് വീണ്ടും ബിഗ് സ്ക്രീനിൽ

2010 ൽ കാഠ്മണ്ഡുവിൽ വച്ച് പരമ്പരാഗത ആചാരമനുസരിച്ച് സംരത് ദാൽ എന്ന നേപ്പാളി ബിസിനസുകാരനെ മനീഷ വിവാഹം ചെയ്തിരുന്നു. പക്ഷേ വെറും രണ്ട് വർഷത്തെ ആയുസ്സേ ആ ബന്ധത്തിനുണ്ടായിരുന്നുള്ളൂ. 2012ൽ ഇരുവരും വിവാഹമോചനം നേടി. അതിനുശേഷമാണ് മനീഷയ്ക്ക് അർബുദം സ്ഥിരീകരിക്കുന്നത്. കാൻസർ ആണെന്ന് അറിഞ്ഞതിനു ശേഷമുള്ള ദിവസങ്ങളാണ് സ്വയം മനസ്സിലാക്കാനും ആരൊക്കെ കൂടെയുണ്ടെന്നു തിരിച്ചറിയാനും തന്നെ സഹായിച്ചതെന്നും ആ സമയത്തൊക്കെ ജീവിതം ഒരു സെക്കൻഡ് ചാൻസ് തരികയാണെങ്കിൽ കുറച്ചുകൂടി നല്ല കാര്യങ്ങൾ ചെയ്യാൻ ആഗ്രഹിച്ചിരുന്നുവെന്നും അവർ പറയുന്നു. നല്ല സംവിധായകരുടെ ചിത്രങ്ങളിൽ അഭിനയിക്കുക, നല്ല ബന്ധങ്ങൾ സ്ഥാപിക്കുക, അങ്ങനെ ഒരുപാട് ആഗ്രഹങ്ങൾ ആ സമയത്ത് മനസ്സിൽ ഉണ്ടായിരുന്നു. ചികിത്സയിലൂടെ കാൻസറിനെ തോൽപ്പിച്ച ശേഷം ധീരമായ ഒരു തിരിച്ചുവരവാണ് അവർ നടത്തിയത്. കാൻസറിനോടുള്ള പോരാട്ടത്തിന് ശേഷം ആദ്യമായി ഒരു കന്നട ചിത്രത്തിലാണ് അഭിനയിച്ചത്. അതിനു ശേഷം സ്വയം ഒരു ബ്രേക്ക് എടുത്തു നല്ല അവസരങ്ങൾക്കായി കാത്തിരുന്നു. പിന്നീടാണ് ഡിയർ മായയിലൂടെ അഭിനയ രംഗത്തേക്ക് തിരിച്ചുവരവ് നടത്തിയതെന്നും അഭിമുഖങ്ങളിൽ അവർ പറഞ്ഞിട്ടുണ്ട്. ഇടവേളയ്ക്കു ശേഷമുള്ള തിരിച്ചുവരവിൽ ബോളിവുഡിലെ യുവതാരങ്ങൾക്കൊപ്പം അഭിനയിക്കാനുള്ള അവസരവും ലഭിച്ചു.