വൈറ്റ് ഹൗസിൽ വരെയെത്തിയ 'കുട്ടിച്ചാത്തൻ'; കോടികൾ കൊയ്യാൻ പുതിയ പോക്കിമോൻ

ആഷും പികാച്ചുവും വിടപറയുന്നു... ലോകമെമ്പാടുമുള്ള ആരാധകർ ഹൃദയം തകർന്നിരിക്കുമ്പോൾ നിങ്ങളിൽ ചിലരെങ്കിലും ചിന്തിക്കുന്നത് ഇവന്മാരൊക്കെ ആരാണെന്നായിരിക്കും. അത് അറിയണമെങ്കിൽ പോക്കിമോൻ ആരാണെന്നറിയണം.. പോക്കിമോൻ ഗോ എന്താണെന്നറിയണം.. ഓഗ്മെന്റഡ് റിയാലിറ്റി ഗെയിം കളിക്കാനുള്ള സെൻസും സെൻസിറ്റിവിറ്റിയും സെൻസിബിലിറ്റിയും വേണം... 

അല്ലെങ്കിലും പോക്കിമോനോട് കളി വേണ്ട മോനേ ദിനേശാ... 

ലോകമെങ്ങും തരംഗം സൃഷ്ടിച്ചുകൊണ്ടിരിക്കുന്ന മൊബൈൽ ഓഗ്മെന്റഡ് റിയാലിറ്റി ഗെയിമിലെ ആരാധകരുടെ ഇഷ്ടകഥാപാത്രങ്ങളായ ആഷും പികാചുവുമാണ് കളിക്കളത്തിൽനിന്ന് അകാലത്തിൽ വിടപറയുന്നത്. 25 വർഷം ഗെയിമേഴ്സിന്റെ ഹിറ്റ്‌ലിസ്റ്റിൽ നിറഞ്ഞുനിന്നു ത്രില്ലടിപ്പിച്ച ഇവരുടെ പിൻവാങ്ങൽ ആരാധകരെ കുറച്ചൊന്നുമല്ല നിരാശപ്പെടുത്തുന്നത്. കാരണം ആഷിനും പികാചുവിനുമൊപ്പം വളർന്ന ഒരു തലമുറയുടെ എക്കാലത്തെയും പ്രിയപ്പെട്ടൊരു നൊസ്റ്റാൾജിയ കൂടിയാണ് പോക്കിമോൻ ഗെയിം. എന്തായാലും ഗെയിമേഴ്സിനു പുതിയൊരു സീരീസ് സമ്മാനിക്കുന്നുണ്ട് പോക്കിമോൻ ഈ പുതുവർഷത്തിൽ എന്നതാണ് ഏക ആശ്വാസം. 2023 ഏപ്രിൽ വരെ കാത്തിരിക്കണം ഈ പുതിയ സീരീസ് കയ്യിലെത്താൻ. 

∙ പോക്കറ്റിനുള്ളിലെ കുട്ടിച്ചാത്തന്മാർ

ആരാണ് പോക്കിമോൻ? എന്താണ് പിള്ളേരുമായി ഇവന്റെ ഇടപാട്? ഇവൻ മനുഷ്യക്കുഞ്ഞാണോ? അതോ മൃഗമോ.. അതോ ഇനി വല്ല ഭൂതവുമാണോ? ഒന്നോർത്താൽ ശരിയാണ്. തീരുമ്പോൾ തീരുമ്പോൾ പണി തന്നുകൊണ്ടേയിരിക്കാൻ കുപ്പീന്നു വന്നൊരു ഭൂതം പോലെയൊക്കെയാണ് കക്ഷിയുടെ പ്രവർത്തനങ്ങളെല്ലാം. പേരിൽ ഒരു മോൻ ഉള്ളതുകൊണ്ട് ആദ്യ കേൾവിയിൽതന്നെ വാൽസല്യം തോന്നിപ്പിക്കും പോക്കിമോൻ. പക്ഷേ അത്ര വാൽസല്യപ്രിയനല്ല കക്ഷി. പോക്കറ്റ് മോൺസ്റ്റേഴ്സ് (Pocket Monsters) എന്നതിന്റെ ചുരുക്കപ്പേരാണ് പോക്കിമോൻ (Pokemon). 

പോക്കിമോൻ ഒരു ജീവിയുടെ പേരല്ല, സാങ്കൽപിക ജന്തുവിഭാഗത്തിന്റെ ആകെ പേരാണ്. ജാപ്പനീസ് ഗെയിം ഡവലപ്പർ സതോഷി തജീരിയാണ് 1995ൽ പോക്കിമോൻ എന്ന കുട്ടിരാക്ഷസന്മാരെ സൃഷ്ടിച്ചത്. ജപ്പാനിലെ കുട്ടികളുടെ പ്രാണികളെ ശേഖരിക്കുന്ന ഹോബിയും സതോഷിയുടെ വിഡിയോ ഗെയിം പ്രേമവും കൂട്ടിയിണക്കിയുള്ള ആശയമായിരുന്നു അത്. കുട്ടികൾ വീട്ടിനുള്ളിൽ തന്നെ ഒതുങ്ങിപ്പോവുന്നതിനും പ്രാണിശേഖരണം എന്ന ഹോബി നഗരവൽക്കരണത്തോടെ ഇല്ലാതായിപ്പോവുന്നതിനും പരിഹാരമായാണ് സതോഷി പോക്കിമോൻ എന്ന ആശയം അവതരിപ്പിക്കുന്നത്. നമ്മുടെ നാടോടിക്കഥകളിലെ കുട്ടിച്ചാത്തന്മാരെപ്പോലെയാണു ജപ്പാനിൽ ജനിച്ച പോക്കിമോനും. 

ഓരോ പോക്കിമോനും ഓരോ വ്യക്തിത്വമാണ്. മൃഗങ്ങളോടും മറ്റു ജീവികളോടും സാദൃശ്യം നൽകിയാണു പോക്കിമോന്മാരെ സൃഷ്ടിച്ചിരിക്കുന്നത്. ഓരോ പോക്കിമോനും വ്യത്യസ്ത കഴിവുകളും അതീന്ദ്രീയ ശക്തിയുമുണ്ട്. പോക്കിമോനെ പിടികൂടി മെരുക്കി ഒപ്പം കൊണ്ടുനടക്കുന്നവരെയാണു പോക്കിമോൻ ട്രെയിനർമാർ എന്നു വിളിക്കുന്നത്. പോക്കിമോൻ ഗെയിം കളിക്കുന്നവർ ട്രെയിനറുടെ റോളിലാണ്. പോക്കിമോൻ ടിവി പരമ്പരയിലും സിനിമയിലുമൊക്കെ വിവിധതരം പോക്കിമോനെ ഉപയോഗിച്ചു ട്രെയിനർമാർ നടത്തുന്ന മത്സരങ്ങളും മറ്റുമാണു പ്രമേയം. നിലവിലെ രൂപത്തിൽനിന്നു കൂടുതൽ കരുത്താർജിക്കാനും രൂപമാറ്റം നേടാനും കഴിയുന്ന പോക്കിമോനെ ഇവോൾവിങ് (Evolving) പോക്കിമോൻ എന്നു വിശേഷിപ്പിക്കും.

∙ ഓർമയുണ്ടോ ഈ മുഖങ്ങൾ?

കെൻ സുജിമോരി എന്ന ഡിസൈനറുടെ നേതൃത്വത്തിലാണ് ആദ്യതലമുറ പോക്കിമോനെ ഒരുക്കിയത്. പിന്നീട് ഓരോ ഗെയിമിനുമൊപ്പം പുതിയ പോക്കിമോനും എത്തി. പോക്കിമോൻ സീരീസിൽ ആരാധകരെ ഏറെ സ്വന്തമാക്കിയ ചില വമ്പൻമാരുണ്ടായിരുന്നു. ബൽബസോർ ആയിരുന്നു ആദ്യത്തെ പോക്കിമോൻ. ദിനോസറിനോടായിരുന്നു ഇവനു സാദൃശ്യം. നാലാമത്തെ പോക്കിമോനായ ചാർമാൻഡർ പല്ലിയെപ്പോലെയായിരുന്നു കാഴ്ചയിൽ. ചാരിസാർഡ് ആയിരുന്നു ആറാമത്തെ പോക്കിമോൻ. ഡ്രാഗണോടായിരുന്നു സാദൃശ്യം. ഈ സീരീസിൽ 25ാമത്തെ പോക്കിമോനാണ് പികാച്ചു. എലിയോടാണ് സാദൃശ്യമെങ്കിലും എന്തോ ഇവനെ മിക്കവർക്കും പെരുത്തിഷ്ടമായിരുന്നു.  അൻപത്തിയൊൻപതാമത്തെ പോക്കിമോനായ ആർകനൈൻ സിംഹവും കടുവയും ചേർന്നൊരു ഭീകരരൂപമായിരുന്നു. 94ാമത്തെ പോക്കിമോൻ ഗെംഗാർ ഭൂതത്തെ പോലെ തോന്നിപ്പിച്ചു. ഈവീയായിരുന്നു 133ാമത്തെ പോക്കിമോൻ. കുറുക്കന്റെ കൗശലക്കാരൻ. 149ാമത്തെ പോക്കിമോനായ ഡ്രാഗനൈറ്റിന് യൂറോപ്യൻ ഡ്രാഗണോടായിരുന്നു സാദൃശ്യം. കരിമ്പൂച്ചയോട് സാദൃശ്യമുള്ള 197ാമത്തെ പോക്കിമോന്റെ പേര് അംബ്രിയോൺ എന്നായിരുന്നു. ഇങ്ങനെ നീളുന്നു പോക്കിമോന്റെ ഹീറോനിര. 

ഇതോടൊപ്പം ടിവി ചാനലുകളിൽ കുട്ടികളെ ഇളക്കിമറിച്ചുകൊണ്ട് പോക്കിമോൻ അനിമേറ്റഡ് സീരീസും പുറത്തിറങ്ങി. പോക്കിമോൻ ടിവി സീരീസിനും ഏറെ ആരാധകരുണ്ടായി. ഇതിനോടകം ഒട്ടേറെ പോക്കിമോൻ സിനിമകളും പുറത്തിറങ്ങിക്കഴിഞ്ഞു. പോക്കിമോൻ ഗോ ഗെയിം കളിക്കുന്നവർ ഫോണുമായി പുറത്തേക്കിറങ്ങി നടക്കുകയേ വേണ്ടൂ. വഴിവക്കിലും ബസിനുള്ളിലും എന്നു വേണ്ട എവിടെയുമുണ്ടാവും പോക്കിമോൻ. ഈ പോക്കിമോനെ പിടികൂടുന്നതനുസരിച്ചാണ് ഗെയിം മുന്നോട്ടു പോവുന്നത്. യഥാർഥ സ്ഥലങ്ങളിൽ ഓഗ്മെന്റഡ് റിലായിറ്റി അടിസ്ഥാനമാക്കിയാണ് പോക്കിമോൻ വിർച്വൽ കഥാപാത്രങ്ങളെ പ്രതിഷ്ഠിക്കുന്നത്.