ഐസിനുള്ളിൽ ചുംബിച്ച് വരനും വധുവും, വായുവിൽ പറന്ന് മനുഷ്യ പറവ; ഈ വിവാഹം അംബാനി കല്യാണത്തെ വെല്ലും !

അനന്ത് അംബാനിയുടെയും രാധികാ മർച്ചന്റിന്റെയും വിവാഹത്തിന്  മുന്നോടിയായി ഗുജറാത്തിലെ ജാംനഗറിൽ സംഘടിപ്പിച്ച ആഘോഷങ്ങളുടെ ചിത്രങ്ങളും വിഡിയോകളും ഇതിനോടകം വൈറലാണ്. ലോകത്തിൽ ഇനി ഇതുപോലെ ഒരു വിവാഹമോ അതിനു മുന്നോടിയായുള്ള ആഘോഷങ്ങളോ നടക്കില്ല എന്ന് കരുതുന്നവരും ഏറെയാണ്. പൊതുവേ അത്യാഘോഷപൂർവം കൊണ്ടാടുന്ന ഇന്ത്യൻ വിവാഹങ്ങളെ പിന്നിലാക്കാൻ ഒരു നാട്ടിലെയും ഒരു ആഘോഷങ്ങൾക്ക് സാധിക്കില്ല എന്ന ധാരണയും നിലനിൽക്കുന്നുണ്ട്. എന്നാൽ ഈ അടുത്തിടെ നടന്ന ഒരു വിവാഹം ഈ ധാരണകളെല്ലാം മാറ്റിമറിച്ചിട്ടുണ്ട്. സ്വിറ്റ്സർലൻഡിലെ സെർമാറ്റിലാണ് സ്വർഗസമാനമായ ഈ വിവാഹ ആഘോഷങ്ങൾ നടന്നത്.

ഒരു കൂറ്റൻ ഐസ്ക്യൂബിനുള്ളിൽ പ്രത്യക്ഷപ്പെട്ട വധു മുതൽ  ഉയർന്നുപൊങ്ങി പറക്കുന്ന പറവയായി ഒരു കലാകാരൻ നടത്തിയ പ്രകടനങ്ങൾവരെ ഇവിടുത്തെ ഓരോ കാഴ്ചകളും അദ്ഭുതം സമ്മാനിക്കുന്നവയായിരുന്നു. റേസർ ഡാരൻ ല്യൂയിങ്ങും ലൂസി ല്യൂയിങ്ങുമാണ് തങ്ങളുടെ വിവാഹദിനം സമാനതകളില്ലാത്ത ആഘോഷങ്ങൾകൊണ്ട് വ്യത്യസ്തമാക്കിയത്. സമുദ്രനിരപ്പിൽ നിന്നും 2727 മീറ്റർ ഉയരത്തിൽ വച്ചായിരുന്നു ഇവർ ജീവിതത്തിന്റെ പുതിയ അധ്യായത്തിന് തുടക്കം കുറിച്ചത്. മഞ്ഞുമൂടിയ മലനിരകളിൽ അതിമനോഹരമായ പൂക്കൾ കൊണ്ടാണ് വിവാഹ വേദി അലങ്കരിച്ചത്.