പുറകിലും ഒരു ടച്ച് സ്ക്രീൻ, ആപ്പിളിനെപ്പോലെ ആക്ഷൻ കീ; ലാവ അഗ്നി 3 എന്ന തീപ്പൊരി ഫോൺ

അൽപ്പം ഓവറായാലേ എല്ലാവരും ശ്രദ്ധിക്കൂ, എന്ന സിനിമാ വാചകം അതേപോലെ പകർത്തുകയാണ് ലാവ തങ്ങളുടെ അഗ്നി 3യിലൂടെ. ഇരുപതിനായിരം രൂപ താഴെ വിലയിൽ 6.7 ഇഞ്ച് കർവ്ഡ്  അമോലെഡ് സ്ക്രീൻ മാത്രമല്ല ഒരു 1.74 ഇഞ്ച് സെക്കൻഡറി അമോലെഡ് സ്ക്രീനും നൽകിയിരിക്കുകയാണ് ലാവ. നോട്ടിഫിക്കേഷനുകൾ കാണാനും ഇൻകമിങ് കോളുകൾ മാനേജ് ചെയ്യാനും മാത്രമല്ല പ്രധാന ക്യാമറ ഉപയോഗിച്ച് സെൽഫി എടുക്കാനും ഈ സ്ക്രീന്‍ സഹായകമാകും.

1.5K റസല്യൂഷനോടുകൂടിയ 6.78 ഇഞ്ച് വളഞ്ഞ അമോലെഡ് ഡിസ്‌പ്ലേ 120 ഹെർട്സ് പുതുക്കൽ നിരക്കും നൽകുന്നു. 1,200 നിറ്റ്സ് പീക്ക് ബ്രൈറ്റ്നസും നൽകിയിരിക്കുന്നു, കൂടാതെ പഞ്ച്-ഹോൾ കട്ട്ഔട്ടിനുള്ളിൽ 16 എംപി ഫ്രണ്ട് ഫെയ്സിങ് ക്യാമറയും നൽകുന്നു. ഡോൾബി അറ്റ്‌മോസ് ഡ്യുവൽ സ്റ്റീരിയോ സ്പീക്കറുകളും അഗ്നി 3യിൽ ഉണ്ട്.

 1/1.55″ സോണി സെൻസറും OIS ഉം ഉള്ള 50MP മെയിൻ ക്യാമറയും . 3x ഒപ്റ്റിക്കൽ സൂം ഉള്ള 8MP ടെലിഫോട്ടോയും 8MP അൾട്രാവൈഡ് ക്യാമറയും ചേർന്നതാണ് പിന്നിലെ ക്യാമറ മൊഡ്യൂൾ.  അഗ്നി 3യുടെ മറ്റൊരു പ്രധാന സവിശേഷത അതിന്റെ ഇഷ്ടാനുസൃതമാക്കാവുന്ന ആക്ഷൻ കീയാണ്

മീഡിയടെക് ഡിമെൻസിറ്റി 7300X ചിപ്‌സെറ്റും 8 ജിബി റാമും 128/256 ജിബി സ്റ്റോറേജും സ്റ്റാൻഡേർഡായി അഗ്നി 3 സജ്ജീകരിച്ചിരിക്കുന്നു.ലാവ 3 ആൻഡ്രോയിഡ് പതിപ്പ് അപ്‌ഡേറ്റുകളും 4 വർഷത്തെ സുരക്ഷാ പാച്ചുകളും വാഗ്ദാനം ചെയ്യുന്നു. 66 വാട് ഫാസ്റ്റ് ചാർജിങ്ങുള്ള 5,000 എംഎഎച്ച് ബാറ്ററിയാണ് മറ്റു സവിശേഷതകൾ.