കാറിലെ സ്വിമ്മിങ് പൂൾ, അപകടകരമായ ഇത്തരം വിഡിയോകൾ യുട്യൂബിലിട്ടാല്‍ അക്കൗണ്ട് പോകുമോ?

റോഡിലൂടെ സഞ്ചരിക്കുന്ന വാഹനത്തിൽ സ്വിമ്മിങ് പൂളുണ്ടാക്കി യാത്ര ചെയ്തത് വ്ലോഗർ സഞ്ജു ടെക്കിക്കും സംഘത്തിനുമെതിരായ കർശന നടപടിക്കു കാരണമായി. മോട്ടോർ വാഹന വകുപ്പും പൊലീസും ഇത്തരം കേസുകളിൽ നടപടിയെടുക്കാറുണ്ട്. അതേസമയം ഇത്തരം വിഡിയോകൾ യുട്യൂബ് പ്രോത്സാഹിപ്പിക്കുമോ? ഇക്കാര്യത്തിൽ യുട്യൂബിന്റെ നയമെന്താണെന്നു പരിശോധിക്കാം.ഒരു യുട്യൂബ് ക്രിയേറ്റർ എന്ന നിലയിൽ, നിങ്ങൾക്ക് വിഡിയോയിൽ അവതരിപ്പിക്കാൻ‍ അനുവാദമില്ലാത്ത ചില ഉള്ളടക്കങ്ങളുണ്ട്. ഇത്തരം കാര്യങ്ങള്‍ ശ്രദ്ധിക്കാതിരുന്നാൽ സ്ട്രൈക്ക് ലഭിക്കാനിടയുണ്ട്. 

90 ദിവസത്തിനുള്ളിൽ മൂന്ന് സ്‌ട്രൈക്കുകൾ ലഭിക്കുന്നത് യുട്യൂബ്  ചാനൽ ഇല്ലാതാകുന്നതിലേക്കു നയിക്കും. ഒരു സമയപരിധിക്കുള്ളിലെ സ്‌ട്രൈക്കുകളുടെ എണ്ണം അനുസരിച്ച്, നിങ്ങൾക്ക് പരിമിതികൾ നേരിടേണ്ടിവരും. അതേസമയം ഗുരുതരമായ ലംഘനങ്ങൾ സ്ട്രൈക്കുകളില്ലാതെതന്നെ ചാനൽ അവസാനിപ്പിക്കുന്നതിലേക്ക് നയിച്ചേക്കാം. ഔദ്യോഗിക തലത്തിലുള്ള ഇടപെടലുകളും വിഡിയോകൾ നിയന്ത്രിക്കുന്നതിൽ ഉണ്ടാകാറുണ്ട്.

ആദ്യ സ്‌ട്രൈക്ക്: വീഡിയോകൾ, തത്സമയ സ്ട്രീമുകൾ മുതലായവ അപ്‌ലോഡ് ചെയ്യുന്നതിന് ഒരു ആഴ്‌ച നിയന്ത്രണം. രണ്ടാമത്തെ സ്ട്രൈക്ക്: ഉള്ളടക്കം അപ്‌ലോഡ് ചെയ്യുന്നതിന് 2 ആഴ്‌ച നിയന്ത്രണം. 90 ദിവസത്തിനുള്ളിൽ മൂന്നാമത്തെ സ്ട്രൈക്ക് ലഭിച്ചാൽ: ചാനൽ അവസാനിപ്പിക്കൽ.

യുട്യൂബിൽ അനുവാദമില്ലാത്ത ഈ ഉള്ളടക്ക വിഷയങ്ങൾ എന്തൊക്കെയാണ്?

ഹാനികരമോ അപകടകരമോ ആയ പ്രവൃത്തികൾ, ചലഞ്ചുകൾ, പ്രാങ്ക് വിഡിയോ ഉള്ളടക്കങ്ങൾ നിയമവിരുദ്ധവുമായ പ്രവർത്തനങ്ങളെ പ്രോത്സാഹിപ്പിക്കുന്ന വിഡിയോകൾ എന്നിവ യുട്യൂബ് പോളിസിക്കു വിരുദ്ധമാണ്.ഡ്രൈവർക്കോ മറ്റുള്ളവർക്കോ ഗുരുതരമായ പരിക്കോ മരണമോ ഉണ്ടാകാനുള്ള അപകടസാധ്യതയുള്ള വിധത്തിൽ ഒരു മോട്ടോർ വാഹനം ഉപയോഗിക്കുന്നതും യുട്യൂബ് ഗുരുതരമായാണ് കണക്കാക്കുന്നത്.  കുട്ടികളെ ഉപദ്രവിക്കൽ, ലൈംഗികത, നഗ്നത, സ്വയം ഉപദ്രവിക്കൽ എന്നിവ പ്രോത്സാഹിപ്പിക്കുന്ന ഉള്ളടക്കങ്ങൾ നിരോധിച്ചിരിക്കുന്നു. 

യുട്യൂബ് സെൻസിറ്റീവ് ആയി കരുതുന്ന ചില ഉള്ളടക്കങ്ങൾ ഇതാ.

1. സ്പാം

തെറ്റിദ്ധരിപ്പിക്കുന്ന അപ്‌ലോഡുകളാണ് സ്പാം വിഡിയോകൾ . 

∙വിഡിയോ തലക്കെട്ടിലോ  തമ്പ്നെയിലിലോ എന്തെങ്കിലും വാഗ്ദാനം ചെയ്യുന്നു, എന്നാൽ യഥാർത്ഥ ഉള്ളടക്കത്തിൽ അത് നൽകുന്നില്ല.

∙ഓഫ്-സൈറ്റ് റീഡയറക്ഷൻ: യുട്യൂബിൽ നിന്നും  അകറ്റുന്ന ഒരു ലിങ്കിൽ ക്ലിക്ക് ചെയ്യുക എന്നതാണ് വീഡിയോയുടെ പ്രധാന ലക്ഷ്യം.

∙വേഗത്തിൽ സമ്പന്നരാകാനുള്ള സ്കീമുകൾ‌.

∙ഹാനികരമായ ലിങ്കുകൾ: വിഡിയോ വിവരണത്തിലോ കമന്റുകളിലോ നിങ്ങളുടെ ഉപകരണത്തിൽ ക്ഷുദ്രവെയർ ഇൻസ്റ്റാൾ ചെയ്യാനോ സ്വകാര്യ വിവരങ്ങൾ മോഷ്ടിക്കാനോ കഴിയുന്ന ലിങ്കുകൾ അടങ്ങിയിരിക്കുന്നു.

∙ആവർത്തിച്ചുള്ള ഉള്ളടക്കം: ഒരേ വിഡിയോ വിവിധ ചാനലുകളിൽ ഒന്നിലധികം തവണ അപ്‌ലോഡ് ചെയ്യപ്പെടുന്നു.

കമൻ്റ് സ്പാമിൽ ഇനിപ്പറയുന്നവ ഉൾപ്പെടുന്നു:

∙കാഴ്ചക്കാരുടെ സ്വകാര്യ വിവരങ്ങൾ ശേഖരിക്കുക എന്ന ലക്ഷ്യത്തോടെയുള്ള കമന്റുകൾ

∙വഞ്ചനാപരമായ രീതിയിൽ കാഴ്ചക്കാരെ സൈറ്റിൽനിന്നും പുറത്തേക്കു നയിക്കുന്നു.

∙അല്ലെങ്കിൽ മറ്റ് നിരോധിത പെരുമാറ്റങ്ങളിൽ ഏർപ്പെടുക.

തത്സമയ സ്ട്രീം ദുരുപയോഗം

കോപിറൈറ്റഡായ ഉള്ളടക്കം തത്സമയ സ്ട്രീം ചെയ്യുകയും ആവർത്തിച്ചുള്ള മുന്നറിയിപ്പുകൾക്ക് ശേഷം അത് നീക്കംചെയ്യാൻ വിസമ്മതിക്കുകയും ചെയ്താൽ യുട്യൂബിന്റെ മാർഗ്ഗനിർദ്ദേശങ്ങൾ ലംഘിക്കുകയാണ്.

ആൾമാറാട്ടം

കാഴ്‌ചക്കാരെ കബളിപ്പിക്കാനുള്ള ഉദ്ദേശ്യത്തോടെ ഒരു വ്യക്തിയെയോ ബ്രാൻഡിനെയോ സ്ഥാപനത്തെയോ ആൾമാറാട്ടം നടത്തുകയോ സാമ്യപ്പെടുത്തുകയോ ചെയ്യുന്നു.

വിദ്വേഷ പ്രസംഗം

വംശം, മതം, ലൈംഗിക ആഭിമുഖ്യം അല്ലെങ്കിൽ വൈകല്യം തുടങ്ങിയ ഘടകങ്ങളുടെ അടിസ്ഥാനത്തിൽ വ്യക്തികൾക്കോ ​​ഗ്രൂപ്പുകൾക്കോ ​​എതിരെ അക്രമമോ വിദ്വേഷമോ പ്രോത്സാഹിപ്പിക്കുന്ന ഉള്ളടക്കം കർശനമായി നിരോധിച്ചിരിക്കുന്നു.കുട്ടികളുടെ സുരക്ഷ: കുട്ടികളെ ചൂഷണം ചെയ്യുന്നതോ ദുരുപയോഗം ചെയ്യുന്നതോ അപകടപ്പെടുത്തുന്നതോ ആയ ഉള്ളടക്കം ഗുരുതരമായ ലംഘനമാണ്, നിയമപരമായ പ്രത്യാഘാതങ്ങളും ഉൾപ്പെട്ടേക്കാം.

നഗ്നതയും ലൈംഗിക ഉള്ളടക്കവും: പ്രായ നിയന്ത്രണങ്ങളോടെ ഒരു പരിധിവരെ നഗ്നത അനുവദനീയമാണെങ്കിലും, ലൈംഗികത പ്രകടമാക്കുന്ന ഉള്ളടക്കം പൊതുവെ നിരോധിച്ചിരിക്കുന്നു.വിദ്യാഭ്യാസപരമോ ഡോക്യുമെന്ററികൾക്കോ ശാസ്ത്രീയമോ കലാപരമോ ആയ മൂല്യമുള്ള (EDSA) ഉള്ളടക്കത്തിന് കമ്മ്യൂണിറ്റി മാർഗ്ഗനിർദ്ദേശങ്ങളിൽ ചില ഇളവുകൾ യുട്യൂബ്അനുവദിക്കുന്നു