'ചെലപ്പോ പൊലീസ് കാണും', ഗൂഗിൾ മാപ്പിൽ ഇങ്ങനൊരു സ്ഥലമോ?; കൊച്ചിയിൽ ഇങ്ങനെയും കാണാം

കൊച്ചിയിൽ ഇൻഫോപാർക്കിനടുത്തുള്ള പ്രദേശത്തെ ഗൂഗിൾ മാപ് നോക്കുന്നവർക്ക് വിചിത്രമായ ഒരു വ്യൂപോയിന്റ് കാണാം. 'ചെലപ്പോ പൊലീസ് കാണും. വിയർ ഹെൽമെറ്റ്'. ഏതോ പരോപകാരിയായ റൈഡർ സഹ റൈഡറന്മാർക്കായി മാപ്പിൽ നൽകിയ മുന്നറിയിപ്പാണിത്. ഇങ്ങനെ ആർക്കും ഗൂഗിൾ മാപ്പിൽ മാറ്റങ്ങൾ വരുത്താനാവുമോ?. ഗൂഗിൾ മാപ്പിൽ വിവരങ്ങൾ എഡിറ്റ് ചെയ്യാനും മാറ്റങ്ങൾ നിർദ്ദേശിക്കാനുമുള്ള മാപ് മേക്കർ ടൂൾ 2017ൽ ഗൂഗിള്‍ നിർത്തിവച്ചശേഷം  അതിന്റെ സ്ഥാനത്താണ് ലോക്കൽ ഗൈഡ്സ് പ്രോഗ്രാമും ബിസിനസ് പ്രൊഫൈൽ ആഡ് ചെയ്യാനുള്ള സംവിധാനവും ആരംഭിച്ചത്. ഗൂഗിൾ അക്കൗണ്ടുള്ള ആർക്കും ഒരു പ്രാദേശിക ഗൈഡാകാം.

മൈ മാപ്സ് എടുത്തശേഷം ആവശ്യമുള്ള സ്ഥലത്ത് ഒരു പിൻഡ്രോപ് ചെയ്യാം. ആ സ്ഥലത്തെക്കുറിച്ചുള്ള വിവരണങ്ങളോ വിശദാംശങ്ങളോ ചേർക്കുകയും ചെയ്യാം. വ്യൂ പോയിന്റിന്റെ തരത്തെ ആശ്രയിച്ച്, മാപ്പിൽ ദൃശ്യപരമായി വേർതിരിച്ചറിയാൻ ലഭ്യമായ ഓപ്ഷനുകളിൽ നിന്ന് നിങ്ങൾക്ക് പ്രസക്തമായ ഒരു മാർക്കർ ഐക്കൺ തിരഞ്ഞെടുക്കാം. 

ഇതൊന്നും ഗൂഗിൾ ശരിയാണോയെന്ന് പരിശോധിക്കില്ലേ?

അടിസ്ഥാന പിശകുകൾ, പൊരുത്തക്കേടുകൾ, സ്പാം എന്നിവ പരിശോധിക്കുന്ന ഓട്ടോമേറ്റഡ് സിസ്റ്റങ്ങളാൽ ആദ്യഘട്ടത്തിൽ ഗൂഗിൾ ഒരു അവലോകനം നടത്തും. പിന്നീട് അത് മറ്റു ലോക്കൽ ഗൈഡുമാർക്ക് ശരിയാണോയെന്ന് പരിശോധിക്കാൻ നൽകും. അവർ ഫ്ലാഗ് ചെയ്തില്ലെങ്കില്‍ അത് മാപ്പിൽ പ്രത്യക്ഷപ്പെടും. അവലോകന പ്രക്രിയയ്ക്ക് കുറച്ച് സമയമെടുക്കുമെന്നത് ശ്രദ്ധിക്കേണ്ടതാണ്, അതിനാൽ നിങ്ങളുടെ എഡിറ്റ് ഉടനടി  പ്രത്യക്ഷപ്പെടില്ല. അതിനാൽ ചില തെറ്റുകൾ ഗൂഗിള്‍ മാപ്പിൽ അതേപോലെ തുടർന്നേക്കാം.

മാപ്പ് മേക്കറും ലോക്കൽ ഗൈഡ്സ് പ്രോഗ്രാമും

പ്രാദേശിക ബിസിനസുകൾ, സ്ഥലങ്ങൾ,  എന്നിവയെ കുറിച്ചുള്ള വിവരങ്ങൾ നൽകാൻ ഉപയോക്താക്കളെ പ്രോത്സാഹിപ്പിക്കുന്ന ഗൂഗിളിന്റെ കമ്മ്യൂണിറ്റി-പ്രേരിതമായ സംരംഭമാണ് ഗൂഗിൾ ലോക്കൽ ഗൈഡ്സ് പ്രോഗ്രാം. അവലോകനങ്ങൾ എഴുതി, ചിത്രങ്ങളും വിഡിയോകളും ചേർത്ത്, ബിസിനസ് ലിസ്റ്റിങുകളിൽ കണ്ടെത്തിയ വിവരങ്ങൾ അപ്‌ഡേറ്റ് ചെയ്തും, ഗൂഗിൾ മാപ്‌സിലെ വിവിധ സ്ഥലങ്ങളെക്കുറിച്ചുള്ള ചോദ്യങ്ങൾക്ക് ഉത്തരം നൽകിക്കൊണ്ടും അവർ അവരുടെ അറിവും ഉപഭോക്തൃ അനുഭവങ്ങളും പങ്കിടുന്നു.

മാപ്പ് മേക്കർ തുടക്കത്തിൽ 2008-ൽ ആരംഭിച്ചത്, ഗൂഗിളിന്റെ സ്വന്തം ടൂൾസെറ്റ് ലഭിക്കാത്ത ഗ്രാമീണ മേഖലകളിൽ നിന്നുള്ള വിവരങ്ങൾ ക്രൗഡ് സോഴ്‌സ് ചെയ്യുന്നതിനുള്ള ഒരു മാർഗമായാണ്. കാലക്രമേണ, ഗൂഗിൾ മാപ്പിലെ പൊതു ഡാറ്റയിൽ വരുത്തിയ മാറ്റങ്ങൾക്ക് മേൽനോട്ടം വഹിക്കാനും അംഗീകാരം നൽകാനും ചുമതലപ്പെടുത്തിയ Map Maker എഡിറ്റർമാരുടെയും മോഡറേറ്റർമാരുടെയും കമ്യൂണിറ്റി ദശലക്ഷക്കണക്കിന് ഉപയോക്താക്കളുടെ ഒരു ഗ്രൂപ്പായി വളർന്നു. പിന്നീടാണ് റിവാർ‍ഡ് പ്രോഗ്രാമുകളുൾപ്പടെയുള്ള ലോക്കൽ ഗൈഡ് സംവിധാനം ആരംഭിച്ചത്.