മലമുകളിലെ സുന്ദരി; ഊട്ടിയിൽ ഇതുവരെ കാണാത്ത മറ്റൊരിടം

ഊട്ടിയും കൊടൈകനാലും മലയാളികൾക്ക് സുപരിചിതമാണ്. അവധിയാകുമ്പോൾ മക്കവരും യാത്രയ്ക്കായി തെരഞ്ഞെടുക്കുന്നതും ഇൗ സുന്ദരഭൂമിയാണ്. തിരക്കുകളിൽ നിന്നെല്ലാം ഒഴിഞ്ഞ് പെട്ടെന്ന് ഒരു യാത്ര പോകണം എന്ന് തോന്നിയാൽ ചെറുപ്പക്കാർ മാത്രമല്ല കുടുംബവുമൊത്ത് പോകുന്നവർപോലും തെരഞ്ഞെടുക്കുക ഊട്ടി ആയിരിക്കും. ഒരൽപ്പനേരം നല്ല തണുത്ത കാറ്റേറ്റ് മഞ്ഞിന്റെ മടിത്തട്ടിൽ ചെലവഴിക്കാൻ ഊട്ടി ബെസ്റ്റാണ്. എല്ലാവരും ഊട്ടി തന്നെ തെരഞ്ഞെടുക്കുമ്പോൾ തിരക്കേറിയ ഒരു വിനോദ സഞ്ചാര കേന്ദ്രമായി അവിടം മാറുന്നു. എന്നാൽ ഊട്ടിപ്പട്ടണത്തിന്റെ തിരക്കിൽ നിന്നും കുറച്ച്  മാറി മറ്റൊരു സ്ഥലമുണ്ട്, ഊട്ടിയെക്കാൾ വേണമെങ്കിൽ സുന്ദരി എന്ന് വിളിക്കാം ടൈഗർ ഹിൽസിനെ.

ടൈഗർ ഹിൽസ്

ദൊഡാബെട്ട കൊടുമുടിയുടെ മടിത്തട്ടിൽ വിധാനിച്ചു കിടക്കുന്ന മനോഹരമായ ഒരു സ്ഥലമാണിത്. ഇംഗ്ലീഷ് ശൈലിയിലുള്ള കോട്ടേജുകളും സെമിത്തേരികളും ധാരാളമായി ടൈഗർ ഹിൽസിൽ കാണാം. പ്രകൃതിയുടെ മടിയിൽ ഒരു ആഡംബര അവധിക്കാലം നിങ്ങൾ ആഗ്രഹിക്കുന്നുവെങ്കിൽ അതിനു ഏറ്റവും ഉചിതമാണ് ഇവിടം.

ഈ കുന്നിൻ മുകളിൽ, നഗരത്തിലേക്ക് കുടിവെള്ള വിതരണത്തിനുള്ള ഒരു വലിയ ജലസംഭരണി ഉണ്ട്. കട്ടിയുള്ള വനമേഖല,  പാറക്കൂട്ടങ്ങൾ, ആഴത്തിലുള്ള മലയിടുക്കുകൾ എന്നിവയാൽ ചുറ്റപ്പെട്ട ഒരു പർവതശിഖരത്തിൽ സ്ഥിതി ചെയ്യുന്ന ക്രിസ്റ്റൽ ക്ലിയർ തടാകം കാണുന്നത്  തന്നെ നയനമനോഹരമാണ്. ഇതിനടുത്തായി ഒരു പുരാതന ഗുഹയുമുണ്ട്.അത് നിരവധി ഐതീഹ്യങ്ങളുമായും നിഗൂഡമായ  കഥകളുമായും ബന്ധപ്പെട്ടിരിക്കുന്നു.

കുന്നുകളും പുഷ്പങ്ങളാൽ നിറഞ്ഞ പുൽമേടുകളാലും ചുറ്റപ്പെട്ട ഈ സുന്ദര സ്ഥലത്ത് നിന്നാൽ താഴ്‌വരയുടെ  മനോഹരമായ കാഴ്ച നദിയിൽ പതിയ്ക്കുന്നത് കാണാം. പകൽ സമയത്ത്, മൂടൽമഞ്ഞ് നിറഞ്ഞ കുന്നുകൾക്ക് സാക്ഷ്യം വഹിക്കുക, സൂര്യൻ അസ്തമിക്കുമ്പോൾ തിളക്കമുള്ള സ്വർണ വർണത്തിൽ സ്വയം മറന്ന് ഇല്ലാതാകാം. ഒരു രാത്രി ഈ മനോഹര കുന്നിൻമുകളിൽ കൂടാരമടിച്ച് താമസിക്കുന്നത് ഒന്ന് ആലോചിച്ചു നോക്കൂ. ട്രെക്കിംഗ് - ഹൈക്കിംഗ് പ്രേമികളുടെ ഇഷ്ടയിടമായി ടൈഗർ ഹിൽസ് മാറിയതിന് പിന്നിൽ മറ്റൊരു കാരണം കണ്ടെത്താനാവില്ല.

ഹിൽ സ്റ്റേഷനുകളുടെ രാജ്ഞി എന്ന് സ്നേഹപൂർവ്വം വിളിക്കുന്ന ഊട്ടി പ്രതിവർഷം ലക്ഷക്കണക്കിന് സഞ്ചാരികളെ ആകർഷിക്കുന്നു. ലോകപ്രശസ്തമായ നീലഗിരി മൗണ്ടൻ റെയിൽ‌വേ മുതൽ ബൊട്ടാണിക്കൽ ഗാർഡനുകൾ, തടാകങ്ങൾ, താഴ്‌വരകൾ തുടങ്ങി നിരവധി വിനോദ സഞ്ചാര കേന്ദ്രങ്ങൾ ഊട്ടിയിലുണ്ട്.

എന്നാൽ എത്ര മനോഹരിയാണോ ഊട്ടി അത്രയും തന്നെ തിക്കുംതിരക്കും നിറഞ്ഞ ഒരു പട്ടണം കൂടിയാണ്. അതു കൊണ്ട് ദൈനംദിന നഗരജീവിതത്തിലെ തിരക്കുകളിൽ നിന്ന്  ശാന്തതയും സമാധാനവും ഒപ്പം പ്രകൃതിയുമായി ഇണങ്ങാൻ കുറച്ചു സമയം എന്നിവ തേടുന്നവർക്ക്  അനുയോജ്യമായ സ്ഥലമാണ് ടൈഗർ ഹിൽസ്.

English Summary: Tiger Hill in Ooty