കുട്ടികളെയും കൂട്ടി അടിപൊളി യാത്ര പോകാൻ പറ്റിയ രാജ്യമാണിത്

കുടുംബങ്ങൾ, പ്രത്യേകിച്ചും ചെറിയ കുട്ടികളുള്ള കുടുംബങ്ങൾ അവധിക്കാലത്തെക്കുറിച്ചു ചിന്തിക്കുമ്പോൾ, മനസ്സിൽ വരുന്ന ആദ്യ സ്ഥലം ഫ്ലോറിഡയിലെ ഡിസ്നി വേൾഡ് ആയിരിക്കും. കുട്ടികളെയും മുതിർന്നവരെയും ഒരു മാന്ത്രികലോകത്തെത്തിക്കുന്ന സ്ഥലം. കടൽത്തീരങ്ങളും പ്രകൃതിയും വനമേഖലയും ഒക്കെ തിരയുന്ന കുടുംബങ്ങൾക്കും ഫ്ലോറിഡ ഒരു മികച്ച ഉത്തരമാണ്. തിരക്കേറിയ ബീച്ച് ടൗണുകൾ‌ മുതൽ ശാന്തമായ വനമേഖലകൾ വരെ ഫ്ലോറിഡയിലുണ്ട്. 

മനോഹരമായ ചില ഫ്ലോറിഡ ബീച്ച് പട്ടണങ്ങളെ പരിചയപ്പെടാം. 

ഒർലാൻഡോ

ഡിസ്നി വേൾഡ്, എപ്കോട്ട്, യൂണിവേഴ്സൽ സ്റ്റുഡിയോ എന്നിവിടങ്ങളിലെ തീം പാർക്ക് ഫൺ ആയിരിക്കും ഇവിടെയെത്തിയാൽ ആദ്യം നിങ്ങളെ സ്വാഗതം ചെയ്യുക. ഇത് ശരിക്കുമൊരു മാജിക് രാജ്യമാണ്.  ഒർലാൻഡോ ഒരു തീം പാർക്ക് സ്വർഗമാണ്. മാജിക് കിങ്ഡം, എപ്കോട്ട്, ടൈഫൂൺ ലഗൂൺ, അനിമൽ കിങ്ഡം, ബ്ലിസാർഡ് ബീച്ച്  എന്നിവ ഉൾപ്പെടുന്ന ഡിസ്നി ലാൻഡ് തന്നെയാണ്  ഒർലാൻഡോയുടെ ശക്തികേന്ദ്രം.

ഇതോടൊപ്പം  യൂണിവേഴ്സൽ സ്റ്റുഡിയോ, വൊൾക്കാനോ ബേ, ഡിസ്കവറി കേവ്, ലെഗൊലംദ് തുടങ്ങി മറ്റനേകം തീം പാർക്കുകളും ഇവിടെയുള്ളതിനാൽ കുട്ടികളെ നിയന്ത്രിക്കാൻ നിങ്ങൾ ചിലപ്പോൾ പാടുപെടും. കയാക്കിങ്, ബൈക്ക്, വോക് വേകൾ, ഹോട്ട്-എയർ ബലൂൺ റൈഡുകൾ, കനോയിങ്, മിനി ഗോൾഫ് എന്നിവപോലുള്ള രസകരമായ വിനോദങ്ങളും ഒർലാൻഡോയിലുണ്ട്.  കുട്ടികൾക്ക് പ്രത്യേകം മെനു, ആഴമില്ലാത്ത കുളങ്ങൾ എന്നിവയടക്കമുള്ള ഹോട്ടലുകളും റസ്റ്ററന്റുകളും ഈ നഗരത്തിന്റെ പ്രത്യേകതയാണ്.

അമേലിയ ദ്വീപ്

ജാക്സൺ‌വില്ലെ രാജ്യാന്തര വിമാനത്താവളത്തിൽനിന്ന് ഒരു മണിക്കൂറോളം യാത്ര ചെയ്താൽ, വടക്കൻ ഫ്ലോറിഡയിലെ അമേലിയ ദ്വീപിൽ എത്താം. മറ്റ് ബീച്ച് സൈഡ് പട്ടണങ്ങളിൽനിന്നു വ്യത്യസ്തമായി തിരക്ക് കുറഞ്ഞ അന്തരീക്ഷമാണിവിടെ. അതുകൊണ്ടു തന്നെ കുട്ടികളുമൊത്ത് പോകാൻ വളരെ സുരക്ഷിതമാണീ ബീച്ച്.

കടൽത്തീരത്ത് കുതിരസവാരി, റിവർ ക്രൂസ് ഇക്കോ-ടൂർ, ചരിത്ര ഇടങ്ങൾ, 13 മൈൽ വിസ്തൃതിയിൽ കിടക്കുന്ന ബീച്ചിലൂടെ അലസ നടത്തം തുടങ്ങി അമേലിയ ദ്വീപിൽ ഒരു കുടുംബത്തിന് ചെയ്യാൻ ഒട്ടനവധി കാര്യങ്ങൾ ഉണ്ട്.  കുറച്ച് ചെറിയ മ്യൂസിയങ്ങൾ, കയാക്കിങ്, പാഡിൽബോർഡിങ്, ബൈക്ക് ടൂറുകൾ, പലതരം ബോട്ട് ടൂറുകൾ എന്നിവപോലുള്ള സാഹസങ്ങൾക്കുള്ള അവസരങ്ങളും ഇവിടെയുണ്ട്.

ക്യാപ്റ്റിവ ദ്വീപ്

ഫോർട്ട് മിയേഴ്സിലെ സൗത്ത് വെസ്റ്റ് ഫ്ലോറിഡ രാജ്യാന്തര വിമാനത്താവളത്തിൽനിന്ന് ഒരു മണിക്കൂർ യാത്ര ചെയ്താൽ ശാന്തമായ ക്യാപ്റ്റിവ ദ്വീപിലെത്താം. നിങ്ങളുടെ പ്ലാനിൽ ഇല്ലാത്തൊരു സ്ഥലമാണ്  അന്വേഷിക്കുന്നതെങ്കിൽ ഇതാണ് മികച്ച സ്ഥലം. ദ്വീപ് പക്ഷിനിരീക്ഷണത്തിനും കടൽത്തീര വിവരശേഖരണത്തിനും ഒരു മികച്ച മേഖലയാണ്. എന്നാൽ റിസോർട്ടുകളും മറ്റ് വിനോദങ്ങളും ധാരാളം ഉണ്ടുതാനും. ഇവിടെയെത്തിയാൽ  സൗത്ത് സീസ് ഐലൻഡ് റിസോർട്ട് സന്ദർശിക്കാൻ മറക്കണ്ട.

300 ഏക്കറിൽകുടിലുകൾ, ഒരു തുറമുഖം, സ്വകാര്യ ബീച്ചുകൾ, ടെന്നിസ് കോർട്ടുകൾ, ഗോൾഫ് കോഴ്‌സ് തുടങ്ങി  നിരവധി കാര്യങ്ങളാണ് ഇവിടെയുള്ളത്. കുട്ടികൾക്കുള്ള രസകരമായ പ്രവർത്തനങ്ങൾ, വാട്ടർ സ്‌പോർട്‌സ് എന്നിവയെല്ലാം ഫാമിലി ട്രിപ്പ് പോകുന്നവർക്ക് ഗുണം ചെയ്യുന്നവയാണ്.  മുതിർന്നവർക്ക് രണ്ട് ബാറുകൾ, ഒരു സ്പാ, മൂന്ന് റസ്റ്ററന്റുകൾ എന്നിവയുള്ളതിനാൽ രാത്രിജീവിതവും   സൂപ്പറായിരിക്കും. പിന്നെ അത്താഴത്തിന് മുമ്പ് ഇവിടുത്തെ ഇതിഹാസ സൂര്യാസ്തമയം കാണാൻ മറക്കരുത്.

ക്ലിയർ വാട്ടർ ബീച്ച് 

കുട്ടികളുള്ളവർക്ക് ക്ലിയർ വാട്ടർ ബീച്ചിൽ ധാരാളം ഓഫറുകൾ ഉണ്ട്, കൂടാതെ ടമ്പ രാജ്യാന്തര വിമാനത്താവളത്തിൽനിന്ന് 40 മിനിറ്റ് മാത്രം അകലെയാണ് ഇത്. ഇവിടുത്തെ ബീച്ചുകൾ വളരെ മനോഹരമാണ്. ഈ ഗൾഫ് ഓഫ് മെക്സിക്കോ കടൽത്തീരം വളരെ സൗഹാർദപരമായ അന്തരീക്ഷമാണ് സൃഷ്ടിക്കുന്നത്.  ബീച്ച് ഇതര പ്രവർത്തനങ്ങൾക്കായി, നിങ്ങൾക്ക് വേണമെങ്കിൽ ക്ലിയർ‌വാട്ടർ മറൈൻ അക്വേറിയം കാണാം.

മയാമി

സംശയിക്കേണ്ട, സിനിമകളിലും മറ്റും കേട്ടുപഴകിയ അതേ മയാമി തന്നെ.  സിനിമകളിലൊക്കെ കാണുന്നതുപോലെ വലിയ ജനക്കൂട്ടമുള്ള, നൈറ്റ് ലൈഫ് ആഘോഷമാക്കിയ ഒരു ബീച്ച് നഗരം മാത്രമല്ല മയാമി. ഫ്ലോറിഡയിലെ ഏറ്റവും മികച്ച കുടുംബ അവധിക്കാല ലക്ഷ്യസ്ഥാനങ്ങളിൽ ഒന്നു കൂടിയാണിത്. തെക്കൻ ഫ്ലോറിഡയിലെ ഈ പ്രധാന നഗരത്തിൽ  നൈറ്റ്ക്ലബുകൾ മാത്രമല്ല, എല്ലാ പ്രധാന മെട്രോപോളിസുകളിലും ഉള്ള എല്ലാ  സൗകര്യങ്ങളുമുണ്ട്, അതിൽ ധാരാളം കുടുംബ സൗഹൃദ പ്രവർത്തനങ്ങളും ഉൾപ്പെടുന്നു. 

ബീച്ചുകൾ, കല, സംസ്കാരം, നല്ല ഭക്ഷണം, വിനോദങ്ങൾ തുടങ്ങി ഒരു കുടുംബത്തിന് വേണ്ടതെല്ലാം ഈ നിശാ നഗരം ഒരുക്കിയിട്ടുണ്ട്. കുട്ടികളുടെ മ്യൂസിയം , ഫിലിപ്പ് ആൻഡ് സയൻസ് പട്രീഷ്യ ഫ്രോസ്റ്റ് മ്യൂസിയം, സയൻസ് മ്യൂസിയം, യങ് ആർട്ട് മ്യൂസിയം അങ്ങനെ കിഡ്സ് ഫ്രണ്ട്‌ലി ആയ കാര്യങ്ങൾ മയാമിയിൽ നിറയെയുണ്ട്. യൂണികോൺ ഫാക്ടറിയും മ്യൂസിയം ഓഫ് ഇല്യൂഷനും അവിസ്മരണീയമായ അനുഭവം നൽകും.  നിങ്ങൾ  വന്യജീവികളെ ഇഷ്ടപ്പെടുന്നവരാണോ? എങ്കിൽ മയാമി സീക്വേറിയത്തിലെ ഉഷ്ണമേഖലാ പക്ഷികളും ഫ്ലോറിഡയിലെ സമുദ്രജീവിതവും ക്രാണ്ടൻ പാർക്കിലെ  സ്നോർക്കലിങ്ങുമെല്ലാം അതിനുള്ള ഉത്തരങ്ങളാണ്. എവർഗ്ലേഡിലെ മുതലകളെ കാണാൻ ഒരു ദിവസത്തെ യാത്ര നടത്താം, അല്ലെങ്കിൽ ബിസ്കെയ്ൻ ബേയിൽ ഇറങ്ങാം. 

ടമ്പ

കുറച്ച് വർഷങ്ങളായി, ഈ ഫ്ലോറിഡിയൻ നഗരം വിനോദ സഞ്ചാരികൾക്കിടയിൽ പ്രശസ്തിയാർജ്ജിച്ച് വരികയാണ്. കുടുംബത്തോടൊപ്പം യാത്ര ചെയ്യുമ്പോൾ ഹിപ് റസ്റ്ററന്റുകളും ബാറുകളും ഒഴിവാക്കി ഈ നഗരത്തിന്റെ തീം പാർക്കുകൾ, വാട്ടർസൈഡ് ലൊക്കേഷൻ, അരീനകൾ എന്നിവ തീർച്ചയായും പ്രയോജനപ്പെടുത്താം. തീം പാർക്കുകളിൽ വരുമ്പോൾ പ്രതീക്ഷിക്കാത്ത സ്ലീപ്പർ ഹിറ്റാണ് ടമ്പ.

നഗരത്തിൽ തന്നെ സ്ഥിതിചെയ്യുന്ന രണ്ട് വലിയ പാർക്കുകൾ, ബുഷ് ഗാർഡനിലെ റോളർ‌കോസ്റ്ററുകൾ, സാഹസിക ദ്വീപിലെ വാട്ടർലൈഡുകൾ എന്നിവ കാണാം, കൂടാതെ ഒരു മണിക്കൂറിനുള്ളിൽ ദിനോസർ വേൾഡ്, ലെഗോലാൻഡ് എന്നിവ പോലുള്ള ഓപ്ഷനുകളും ഉണ്ട്. ടമ്പയിൽ താമസിക്കുന്ന കുടുംബങ്ങൾക്ക് ദ് ഫ്ലോറിഡ അക്വേറിയത്തിലെ സംവേദനാത്മക പ്രദർശനങ്ങൾ കാണാനും ഗ്ലേസർ ചിൽഡ്രൻസ് മ്യൂസിയത്തിലൂടെ സഞ്ചരിക്കാനും  സിംഹങ്ങളെയും കടുവകളെയും മറ്റും അധിവസിപ്പിച്ചിരിക്കുന്ന ബിഗ് ക്യാറ്റ് റെസ്ക്യൂവിൽ സന്ദർശനം നടത്താനും കഴിയും. വ്യത്യസ്ത വാട്ടർ സ്‌പോർട്‌സ് പരീക്ഷിക്കാൻ ധാരാളം സ്ഥലങ്ങളും ടമ്പയിലുണ്ട്. 

ഇനി ഫ്ലോറിഡ സന്ദർശിക്കുമ്പോൾ ഡിസ്നി വേൾഡ് മാത്രമല്ല ഈ പറഞ്ഞ ബീച്ച് നഗരങ്ങൾ കൂടി കണ്ടു വേണം മടങ്ങാൻ.