വയനാട്ടിൽ ടെറസിൽ വിടർന്ന് കുങ്കുമപ്പൂക്കൾ

കേരളത്തിൽ ആദ്യമായി കുങ്കുമപ്പൂക്കൃഷി ചെയ്ത് വിജയിച്ചിരിക്കുകയാണ് വയനാട് സുൽത്താൻ ബത്തേരി മലയവയൽ പദ്യാന വീട്ടിൽ എസ്.ശേഷാദ്രി.

കുങ്കുമപ്പൂക്കൃഷിക്കായി വീടിന്റെ മട്ടുപ്പാവിൽ 15 അടി നീളവും വീതിയുമുള്ള കണ്ടെയ്നർ രീതിയില്‍ ഫാം ഒരുക്കി. ‌

കൺട്രോൾഡ് എൻവയൺമെന്റ് അഗ്രികൾച്ചർ (സിഇഎ) എന്നാണ് ഈ കൃഷിരീതി അറിയപ്പെടുന്നത്.

ഇടനിലക്കാരുടെ സഹായത്തോടെ കിലോയ്ക്ക് 1000 രൂപ വില നൽകി 400 കിലോ സാഫ്രോൺ ബൾബുകൾ വാങ്ങി.

കഴിഞ്ഞ ഓണത്തോടെ ഫാമിന്റെ പണി പൂർത്തീകരിച്ച് 3 റാക്കുകളിൽ 7 തട്ടുകളിലായി ട്രേകളിൽ ബൾബുകൾ നിരത്തി.

നവംബർ മുതൽ മികച്ച രീതിയിൽ പുഷ്പിച്ചുതുടങ്ങി‌. ഒരേസമയം രണ്ടായിരത്തോളം പൂക്കൾ വിരിഞ്ഞ ദിവസങ്ങളുമുണ്ടായിരുന്നു.

ഓഗസ്റ്റ് അവസാനം മുതൽ ഡിസംബർ അവസാനം വരെ 4 മാസമാണ് പൂക്കളുണ്ടാകുന്നത്.

നിയന്ത്രിത സാഹചര്യത്തിൽ വെള്ളമോ മണ്ണോ ഉപയോഗിക്കാതെയാണ് ശേഷാദ്രി കുങ്കുമപ്പൂക്കൾ വിരിയിച്ചിരിക്കുന്നത്.

പൂർണമായും വിരിഞ്ഞ പൂവ് ബൾബിൽനിന്നു വേർപെടുത്തിയെടുത്തശേഷം ജനിദണ്ഡ് (Stigma) എടുക്കുന്നു. ഒരു ബൾബിൽനിന്ന് ഒന്നിലധികം പൂക്കൾ ലഭിക്കാറുണ്ട്.