തോൽവിഭാരം മൂന്നു ഗോളിലൊതുങ്ങിയതിൽ ആശ്വസിച്ച് റുമാനിയയ്ക്ക് യൂറോ കപ്പിൽ നിന്നു മടങ്ങാം
ആക്രമണങ്ങളുടെ വേലിയേറ്റത്തിനൊടുവിൽ റുമാനിയയെ 3–0ന് തോൽപിച്ച് നെതർലൻഡ്സ് ക്വാർട്ടർ ഫൈനലിൽ കടന്നു.
പകരക്കാരനായി ഇറങ്ങിയ ഡോനിയൽ മാലനാണ് 2 ഗോൾ നേടിയത്.
83–ാം മിനിറ്റിലും ഇൻജറി ടൈമിലുമായിരുന്നു ബൊറൂസിയ ഡോർട്മുണ്ട് ക്ലബ്ബിന്റെ താരമായ മാലന്റെ ഗോളുകൾ
ലിവർപൂൾ താരം കോഡി ഗാക്പോയാണ് ഹോളണ്ടിന്റെ ആദ്യഗോൾ നേടിയത്. 20–ാം മിനിറ്റിൽ ഒരു ലോ ആംഗിൾ ഷോട്ടിലൂടെയാണ് ഗാക്പോ ലക്ഷ്യം കണ്ടത്.
മത്സരത്തിൽ 23 ഷോട്ടുകളും 13 കോർണറുകളുമായി സർവാധിപത്യം പുലർത്തിയിട്ടും ലീഡ് വർധിപ്പിക്കാൻ നെതർലൻഡ്സിന് അവസാനം വരെ കാത്തിരിക്കേണ്ടി വന്നു.