ടൂർണമെന്റിലെ തന്റെ ആദ്യ ഗോൾ സെമിഫൈനലിലേക്ക് കാത്തുവച്ച ലയണൽ മെസ്സിയുടെ ‘തിരിച്ചുവരവിന്’ സാക്ഷിയായ മത്സരത്തിൽ കാനഡയെ തകർത്ത് അർജന്റീന കോപ്പ അമേരിക്ക ഫുട്ബോൾ ഫൈനലിൽ

എതിരില്ലാത്തെ രണ്ടു ഗോളുകൾക്കാണ് മെസ്സിപ്പടയുടെ ആധികാരിക ജയം. ആദ്യ പകുതിയിൽ ജൂലിയൻ അൽവാരസും രണ്ടാം പകുതിയിൽ ലയണൽ മെസ്സിയുമാണ് അർജന്റീനയ്ക്കായി സ്കോർ ചെയ്തത്.

കോൺകകാഫ് മേഖലയിൽ നിന്ന് അതിഥികളായെത്തി കോപ്പ അമേരിക്ക ജേതാക്കളാകാനുള്ള കാനഡയുടെ മോഹം പൊലിഞ്ഞു. 15ന് നടക്കുന്ന ഫൈനലിൽ യുറഗ്വായ്– കൊളംബിയ മത്സരത്തിലെ വിജയികളെ അർജന്റീന നേരിടും.

സെമിപോരാട്ടത്തിൽ പന്തടക്കത്തിലും പാസ് കൃത്യതയിലുമെല്ലാം തുടക്കം മുതൽ ആധിപത്യം നേടിയായിരുന്നു അർജന്റീനയുടെ കുതിപ്പ്.

ഗോളടിക്കാനുള്ള ആദ്യശ്രമങ്ങൾ കാനഡയുടെ ഭാഗത്തുനിന്നായിരുന്നെങ്കിലും ഒന്നും ലക്ഷ്യം കണ്ടില്ല. 23–ാം മിനിറ്റിൽ ജൂലിയൻ അൽവാരസിന്റെ ഗോളിലൂടെ അർജന്റീന ലീഡ് നേടി. ഇതോടെ ആദ്യ പകുതിയിൽ അർജന്റീന 1–0നു മുന്നിൽ.

രണ്ടാം പകുതിയിലായിരുന്നു മെസ്സിയുടെ ഗോള്‍. ഈ ടൂർണമെന്റിൽ മെസ്സിയുടെ ആദ്യ ഗോളാണിത്. കൗണ്ടര്‍ അറ്റാക്കുകളിലൂടെ കാനഡ ചില മുന്നേറ്റങ്ങള്‍ നടത്തിയെങ്കിലും ഒന്നും ഗോളായില്ല.

ഗ്രൂപ്പ് ഘട്ടത്തിൽ ഇരുടീമുകളും ഏറ്റുമുട്ടിയപ്പോഴും 2–0നായിരുന്നു അർജന്റീനയുടെ ജയം. പിന്നീട് കരുത്തരായ ചിലെയെ മറികടന്നാണ് കാനഡ ഗ്രൂപ്പിലെ രണ്ടാം സ്ഥാനക്കാരായി നോക്കൗട്ടിലെത്തിയത്.