നവരാത്രിക്ക് ശേഷം മാറ്റങ്ങളുടെ പാതയിൽ 7 നാളുകാർ; കാത്തിരിക്കുന്നത് വൻ നേട്ടങ്ങള്‍

നവരാത്രിക്ക് ശേഷം ചില നാളുകാരുടെ ജീവിതത്തിൽ  വളരെ വലിയ മാറ്റങ്ങൾ സംഭവിക്കുന്ന കാലമാണ്. ദേവീ പ്രീതിയാൽ ഇക്കൂട്ടരുടെ ജീവിതത്തിലുണ്ടായിരുന്ന തടസ്സങ്ങളെല്ലാം നീങ്ങി ജീവിതം മെച്ചപ്പെടും. ജനനസമയപ്രകാരം ഫലാനുഭവങ്ങളിൽ വ്യത്യാസം വരാമെങ്കിലും ഈ ഒക്ടോബർ 14 മുതൽ പൊതുവെ അനുകൂല കാലമാണ് വരാനിരിക്കുന്നത്.    

ഭരണി :ഭരണി ഭദ്രകാളി പ്രധാനമായ നക്ഷത്രമാണ്. ഈ കാലയളവിൽ സ്വപ്രയത്നത്താലുളള ഫലാനുഭവങ്ങൾ കൂടുതലായിരിക്കും . ഗണിത ശാസ്ത്രം, കാർഷികമേഖല, രാഷ്ട്രിയം, വ്യാപാരം, പ്രഭാഷകൻ, ആരോഗ്യ മേഖല എന്നിവയിൽ ശോഭിക്കാം. മറ്റുളളവർക്ക് തോന്നാത്ത പല ആശയങ്ങളും ഇവരുടെ ബുദ്ധിയിലുദിക്കുകയും അതു പ്രകടിപ്പിക്കുകയും അതനുസരിച്ച് പുതിയ പ്രവർത്തനങ്ങൾ തുടങ്ങുകയും ചെയ്യും.

പൂയം :ആരോഗ്യവും അഭിവൃദ്ധിപ്പെടും. കുടുംബാഭിവൃദ്ധിക്കുവേണ്ടി അദ്ധ്വാനിക്കും, ജോലിയും വരുമാനവും ഇക്കാലത്തുണ്ടാകും. പ്രതിബന്ധങ്ങളെ തളളി നീക്കി ലക്ഷ്യപ്രാപ്തിയിലെത്തും. ഈ നക്ഷത്രക്കാർക്ക് ശാസ്ത്രസാങ്കേതിക വിഷയങ്ങൾ, ആരോഗ്യമേഖല, പ്രഭാഷണം ഇവയിൽ ശോഭിക്കാൻ കഴിയും. ജനിച്ച വീട്ടിൽ നിന്നു മാറുവാനും സൗഭാഗ്യപൂർണ്ണമായ ജീവിതത്തിനും ഇക്കാലത്ത് യോഗമുണ്ട്.

ആയില്യം:കുടുംബജീവിതത്തിൽ ആഹ്ലാദ അന്തരീക്ഷം സംജാതമാകും. വ്യത്യസ്തമായ കർമപഥങ്ങളിൽ ഏർപ്പെടാനുള്ള അവസരം വന്നു ചേരും. ലക്ഷ്യപ്രാപ്തിയിലെത്താൻ പല തരത്തിലുള്ള ക്ലേശങ്ങൾ അലട്ടുമെങ്കിലും സാമ്പത്തികമായി ഉയർന്ന നിലയിൽ എത്തും. സർപ്പപ്രീതികരമായ കർമങ്ങളും പ്രാർഥനകളും നടത്തുന്നത് അഭിവൃദ്ധി നൽകുമെന്നാണ് വിശ്വാസം.

ഉത്രം:സ്വന്തം നിലപാടിൽ ഉറച്ചുനിന്നു  ഏകാഗ്രതയോടും ദീർഘവീക്ഷണത്തോടെയും കൂടിയ പ്രവർത്തനങ്ങൾ ലക്ഷ്യപ്രാപ്തി നേടും. ഉദ്യോഗത്തില്‍ ഉയർന്ന സ്ഥാനം , അംഗീകാരം എന്നിവ  ലഭിക്കാം. ആരോഗ്യകാര്യത്തിൽ കൂടുതൽ ശ്രദ്ധിക്കും. സാഹിത്യം, കല, കായികം, വൈജ്ഞാനികം എന്നീ രംഗങ്ങളിൽ പ്രവർത്തിക്കുന്നവർക്ക് അവസരങ്ങളും പ്രോത്സാഹനവും ഉണ്ടാകും.

അനിഴം:പ്രതിസന്ധികളിൽ തളരാതെ പ്രവർത്തിക്കുവാൻ ആത്മപ്രചോദനമുണ്ടാകും. മുടങ്ങിക്കിടന്ന സംരംഭങ്ങൾ പുനരാരംഭിക്കാൻ സാധിക്കും . ഭൂമി ക്രയവിക്രയങ്ങളിലൂടെ സാമ്പത്തിക ലാഭം പ്രതീക്ഷിക്കാം . ഏറ്റെടുത്ത ദൗത്യം പ്രതീക്ഷിച്ചതിലുപരി ഭംഗിയായി ചെയ്തു തീർക്കുവാൻ സാധിക്കുന്ന കാലമാണ്.

ഉത്രാടം:പുതിയ പദ്ധതികളിൽ പങ്കുചേരുന്നതിലൂടെ  സാമ്പത്തിക ലാഭം പ്രതീക്ഷിക്കാം . ജീവിതത്തിലെ ചില  പ്രശ്നങ്ങൾക്കു ശാശ്വതമായ പരിഹാരം കണ്ടെതാനാകുന്ന കാലമാണ് . സുഹൃത്തുക്കളോടൊപ്പം വിനോദയാത്രയ്ക്ക് അവസരമുണ്ടാകും. കാർഷിക േമഖലകളിൽ നിന്ന് ആദായം വർധിക്കുവാനിടയുണ്ട്. 

ചതയം :ജീവിതത്തിലെ നിർണായകമാറ്റത്തിന്റെ കാലമാണിത് . അലസത മൂലം മാറ്റി വച്ചിരുന്നതോ നീണ്ടുപോയതോ ആയ കർമപദ്ധതികൾ ചിട്ടയോടെ പുനരാരംഭിക്കും. പ്രവർത്തനമേഖലകളിൽ അപ്രതീക്ഷിതമായ  പുരോഗതിയും സാമ്പത്തികനേട്ടവും ഉണ്ടാകും.