ഈ ആഴ്ച ഓരോ നക്ഷത്രക്കാർക്കും എങ്ങനെ? സമ്പൂർണ നക്ഷത്രഫലം– കാണിപ്പയ്യൂർ

അശ്വതി: ഔചിത്യമുള്ള സമീപന ശൈലിക്ക് അർഹമായ അംഗീകാരം അന്തിമനിമിഷത്തിൽ അനുഭവയോഗ്യമാകും. 

ഭരണി: സഹോദര സുഹൃത്‌സഹായ ഗുണത്താൽ നിലനിൽപിന്നാധാരമായ ഉദ്യോഗം ലഭിക്കും. അനുഭവജ്ഞാനമുള്ളവരുടെ വാക്കുകൾ പലപ്പോഴും അബദ്ധങ്ങൾ അതിജീവിക്കുന്നതിന് ഉപകരിക്കും. 

കാർത്തിക: ആഗ്രഹസാഫല്യത്താൽ ആത്മനിർവൃതിയുണ്ടാകും. ആദരവും വിനയവുമുള്ള സമീപനം മാർഗതടസ്സങ്ങളെ അതിജീവിച്ചു സർവകാര്യവിജയം നേടുവാൻ ഉപകരിക്കും.

രോഹിണി: നിലവിലുള്ള ഉദ്യോഗം ഉപേക്ഷിച്ചു മറ്റൊന്നിനു ശ്രമിക്കുന്നത് അഭികാമ്യമല്ല. ഭദ്രതയില്ലാത്ത സാമ്പത്തിക ഇടപാടുകളിൽ നിന്നു യുക്തിപൂർവം പിന്മാറും. 

മകയിരം: ഗൗരവമുള്ള വിഷയങ്ങൾ തനതായ അർഥതലങ്ങളോടു കൂടി ലക്ഷ്യപ്രാപ്തിയിലെത്തിക്കുവാൻ സാധിക്കും.  ആഗ്രഹ സാഫല്യത്തിനായി പ്രത്യേക പ്രാർഥനകൾ നടത്തും.

തിരുവാതിര: മാതാപിതാക്കളെ അനുസരിക്കുക, ആദരിക്കുക തുടങ്ങിയവ മാതൃകാപരമാകും. സാമ്പത്തിക ബാധ്യതകളാൽ കടം വാങ്ങും. 

പുണർതം: വൈദ്യനിർദേശത്താൽ ആരോഗ്യകാര്യങ്ങളിൽ കൂടുതൽ ശ്രദ്ധ കേന്ദ്രീകരിക്കും. യാഥാർഥ്യബോധത്തോടു കൂടിയ ജീവിതപങ്കാളിയുടെ സമീപനം മനസ്സമാധാനത്തിനു വഴിയൊരുക്കും. 

പൂയം: പരീക്ഷ, ഇന്റർവ്യൂ, കലാകായിക മത്സരങ്ങൾ തുടങ്ങിയവയിൽ വിജയിക്കും. അഭിപ്രായസമന്വയം തൊഴിൽ മേഖലകളിലും കുടുംബജീവിതത്തിലും അനുകൂല സാഹചര്യങ്ങൾക്ക് വഴിയൊരുക്കും. 

ആയില്യം: സങ്കീർണമായ പ്രശ്നങ്ങളെ ലാഘവത്തോടു കൂടി അഭിമുഖീകരിക്കുവാനവസരമുണ്ടാകും. സുനിശ്ചിതമായ കാര്യങ്ങളാണെങ്കിലും അകാരണ കാലതാമസം അനുഭവപ്പെടും.

മകം: ക്ലേശകരമായ വിഷയങ്ങളാണെങ്കിലും വേണ്ട വിധത്തിൽ നിറവേറ്റുവാനും അതിജീവിക്കുവാനും സാധിക്കും. നടപടിക്രമങ്ങളിൽ അപാകതകൾ ഉണ്ടാകാതെ സൂക്ഷിക്കണം.

പൂരം: ആധുനിക സംവിധാനം ഉപയോഗിച്ചു കാർഷികമേഖല വിപുലമാക്കും. തൊഴിൽ മേഖലകളുടെ അവസ്ഥ പരിഗണിച്ച് ഉദ്യോഗം നഷ്ടപ്പെടാതിരിക്കുവാൻ ദമ്പതികൾക്ക് വേർപെട്ടു താമസിക്കേണ്ടതായി വരും. ഉപരിപഠനത്തിന് അന്യസംസ്ഥാനത്തെ വിദ്യാഭ്യാസ സ്ഥാപനത്തിൽ ചേരും.

ഉത്രം: വിഭാവനം ചെയ്ത പദ്ധതികൾക്കു കാലതാമസം നേരിടും.  വാഹനം മാറ്റിവാങ്ങുവാനിടവരും. 

അത്തം: മറ്റുള്ളവരുടെ ഉയർച്ചയിൽ അഭിനന്ദിക്കുന്നതു വഴി ആത്മാഭിമാനമുണ്ടാകും.  വിവിധോദ്ദേശ്യങ്ങൾക്കായി അവധിയെടുക്കും. 

ചിത്തിര: ദമ്പതികൾക്ക് ഒരുമിച്ചു താമസിക്കുവാൻ തക്കവണ്ണം ഉദ്യോഗമാറ്റമുണ്ടാകും. പദ്ധതി ആസൂത്രണ വിഭാഗത്തിൽ ഉൾപ്പെട്ടതിനാൽ കഴിവിന്റെ പരമാവധി പ്രകടിപ്പിക്കുവാൻ സാധിക്കും. 

ചോതി: സുഖദുഃഖങ്ങൾ ഒരുപോലെ സ്വീകരിക്കുവാനുള്ള മാനസികാവസ്ഥ സംജാതമാകും. മാതാപിതാക്കളുടെ ഇഷ്ടമനുസരിച്ചു പ്രവർത്തിക്കുന്നതിൽ ആത്മസംതൃപ്തിയുണ്ടാകും.

വിശാഖം: പ്രലോഭനങ്ങളിൽ അകപ്പെടരുത്. വിൽപനോദ്ദേശ്യം മനസ്സിൽ കരുതി വാങ്ങിയ ഭൂമിക്കു ഭേദപ്പെട്ട നിലയിൽ ലാഭമുണ്ടാകയാൽ വിൽപനയ്ക്കു തയാറാകും.

അനിഴം: എല്ലാ മേഖലകളിലും ആത്മനിയന്ത്രണം വേണം. വിവര സാങ്കേതികവിദ്യയിൽ പുതിയ കണ്ടെത്തലുകൾക്കു സാക്ഷിയാകും. 

തൃക്കേട്ട: വസ്തുതർക്കം പരിഹരിക്കുവാൻ വിട്ടുവീഴ്ചാ മനോഭാവം സ്വീകരിക്കും.  വ്യാപാര വിതരണ മേഖലകളിൽ മാന്ദ്യം അനുഭവപ്പെടും. 

മൂലം: മാന്യതയോടു കൂടിയ പെരുമാറ്റരീതി അവലംബിക്കുന്നതിനാൽ സർവകാര്യ വിജയമുണ്ടാകും. പുത്രപൗത്രാദികളോടൊപ്പം വിദേശത്തു മാസങ്ങളോളം താമസിക്കുവാനവസരമുണ്ടാകും. 

പൂരാടം: പാർശ്വഫലങ്ങളുള്ള ഔഷധം ഉപേക്ഷിച്ചു വ്യായാമമുറകളും പ്രകൃതിജീവന ഔഷധ രീതിയും അവലംബിക്കും. അടിസ്ഥാന സൗകര്യങ്ങൾ നടപ്പിലാക്കിയ മേലധികാരിയോട് ആദരവ് തോന്നും. 

ഉത്രാടം: ഉൽപന്നങ്ങളുടെ ഗുണനിലവാരം വർധിപ്പിക്കുവാൻ വ്യവസായം നവീകരിക്കും. വിവിധങ്ങളും വ്യത്യസ്തങ്ങളുമായ പ്രവർത്തനങ്ങളിൽ ഏർപ്പെടുന്നതിനാൽ സൽകീർത്തിയും സജ്ജനപ്രീതിയും ആത്മസാക്ഷാത്കാരവും ഉണ്ടാകും. 

തിരുവോണം: സത്യസന്ധവും നീതിയുക്തവുമായ സമീപനം സർവാദരങ്ങൾക്കും വഴിയൊരുക്കും. ആധ്യാത്മിക-ആത്മീയ ചിന്തകൾ മനോധൈര്യത്തിനും ആത്മവിശ്വാസത്തിനും വഴിയൊരുക്കും. 

അവിട്ടം: നിലവിലുള്ള പാഠ്യപദ്ധതി ഉപേക്ഷിച്ചു മറ്റൊന്നിനു ചേരും. അർഹതയുള്ളവരെ അനുമോദിക്കുന്നതിൽ ആത്മസംതൃപ്തിയുണ്ടാകും.

ചതയം: ആസൂത്രിത പദ്ധതികളിൽ അന്തിമമായി അനുകൂല വിജയവും അനുഭവവും ഉണ്ടാകും. വ്യാപാരവിപണന മേഖലകളിൽ മാന്ദ്യം അനുഭവപ്പെടുന്നതിനാൽ ഉദ്യോഗത്തിൽ പ്രവേശിക്കും. 

പൂരുരുട്ടാതി: തടസ്സപ്പെട്ട പാഠ്യപദ്ധതിക്ക് പ്രവേശനം ലഭിക്കും. സുരക്ഷാ സംവിധാനം സുശക്തമാക്കുവാൻ നിർബന്ധിതനാകും. 

ഉത്തൃട്ടാതി: സജീവ സാന്നിധ്യത്താൽ സർവകാര്യ വിജയം നേടും. പുതിയ കരാർ ജോലികൾ ഏറ്റെടുത്തു നടപ്പിലാക്കും. 

രേവതി: നടപടിക്രമങ്ങളിലുള്ള ആത്മാർഥതയും നിഷ്കർഷയും നിശ്ചയദാർഢ്യവും ലക്ഷ്യബോധവും മാതൃകാപരമായതിനാൽ പുതിയ തലങ്ങൾക്കു വഴിയൊരുക്കും.