എൽഐസി സുവർണജൂബിലി സ്കോളർഷിപ്: അപേക്ഷ 14 വരെ

സമർഥരായ നിർധന വിദ്യാർഥികൾക്കുള്ള എൽഐസി സുവർണജൂബിലി സ്കോളർഷിപ്പിന് 14 വരെ ഓൺലൈനിൽ അപേക്ഷിക്കാം. വെബ്സൈറ്റ്: www.licindia.in (‘ഗോൾഡൻ ജൂബിലി സ്കോളർഷിപ്സ് 2023’ ലിങ്ക്). ഇന്ത്യയിലെ സർക്കാർ / സ്വകാര്യ കോളജ്, സർവകലാശാല, സാങ്കേതിക സ്ഥാപനം എന്നിവയിലെ മെ‍ഡിക്കൽ, എൻജിനീയറിങ് അഥവാ ഏതെങ്കിലും വിഷയത്തിലെ ബാച്‌ലർ ബിരുദം / ഡിപ്ലോമ / വൊക്കേഷനൽ / എൻസിവിടി / ഐടിഐ / 12 ജയിച്ചവർക്കുള്ള ഇന്റഗ്രേറ്റഡ് കോഴ്സുകൾ എന്നിവ ഈ പദ്ധതിയിൽപെടും. രക്ഷിതാക്കളുടെ വാർഷികവരുമാനം രണ്ടര ലക്ഷം രൂപ കവിയരുത്. കുടുംബത്തിൽ വരുമാനമുള്ള ഏകവ്യക്തി വനിതയാണെങ്കിൽ വരുമാനം 4 ലക്ഷം വരെയാകാം. 2022–23ൽ 60% മാർക്കോടെ 12–ാം ക്ലാസ് ജയിച്ചവർക്കും 60% മാർക്കോടെ 10–ാം ക്ലാസ് ജയിച്ചവർക്കും (ഡിപ്ലോമ / വൊക്കേഷനൽ / ഐടിഐ പഠനത്തിന്) അപേക്ഷിക്കാം.

തുക ഇപ്രകാരം
∙ മെഡിക്കൽ പഠനത്തിനു 3 വാർഷിക ഗഡുക്കളായി 40,000 രൂപ (12,000 + 12,000 + 16,000 രൂപ)
∙ എൻജിനീയറിങ് പഠനത്തിനു 3 വാർഷിക ഗഡുക്കളായി 30,000 രൂപ (9000 + 9000 + 12,000 രൂപ)
∙ ബിരുദം, ഇന്റഗ്രേറ്റഡ് ബിരുദം, ഡിപ്ലോമ, വൊക്കേഷനൽ, ഐടിഐ ആദിയായവയ്ക്ക് 3 വാർഷിക ഗഡുക്കളായി 20,000 രൂപ (6000 + 6000 + 8000 രൂപ)
∙ സ്പെഷൽ ഗേൾ ചൈൽഡ് സ്കോളർ: സഹായം 2 വർഷത്തേക്ക്. 60% മാർക്കോടെ 2022–23ൽ 10–ാം ക്ലാസ് ജയിച്ച പെൺകുട്ടികൾക്ക് പ്ലസ്ടു (11, 12) / ഡിപ്ലോമ / വൊക്കേഷനൽ / ഐടിഐ ആദിയായവ പഠിക്കുന്നതിന്. 3 വാർഷിക ഗഡുക്കളായി 15,000 രൂപ (4500 + 4500 + 9000 രൂപ)

കോഴ്സ് പൂർത്തിയാക്കുംവരെ സഹായം കിട്ടും. കോഴ്സ് കാലയളവിലേക്കു മാത്രമേ സഹായമുള്ളൂ. പിജി പഠനത്തിന് സഹായമില്ല. ഈ നിരക്കുകൾ പുതിയ സ്കോളർമാർക്കുള്ളതാണ്. മുൻവർഷക്കാർക്ക് അവരുടെ പഴയ നിരക്കുകൾ തുടരും. തുക വിദ്യാർഥിയുടെ ബാങ്ക് അക്കൗണ്ടിൽ വരും.

മറ്റു വിവരങ്ങൾ
∙മാർക്കും കുടുംബവരുമാനവും ഉൾപ്പെടെ പരിഗണിച്ചാവും റാങ്കിങ്. അർഹതയുള്ളവർ കൂടുതലുണ്ടെങ്കിൽ വരുമാനം കുറഞ്ഞവർക്കു മുൻഗണന.
∙ സർക്കാർ സഹായം കിട്ടുന്ന പട്ടികവിഭാഗക്കാർക്കൊഴികെ, മറ്റേതെങ്കിലും സ്കോളർഷിപ്പുള്ളവർക്ക് എൽഐസി സഹായമില്ല.
∙ ബിടെക് രണ്ടാം വർഷം ലാറ്ററൽ എൻട്രി നേടുന്നവർക്ക് ഡിപ്ലോമ പരീക്ഷയിൽ 60% മാർക്ക് വേണം.
സ്കോളർഷിപ് കിട്ടിയിട്ട് കോഴ്സ് മാറിയാൽ ആദ്യം കിട്ടിയതിനുള്ളയത്ര കാലത്തേക്കു മാത്രമേ സഹായം കിട്ടൂ. പുതിയ കോഴ്സ് ദൈർഘ്യം കുറവെങ്കിൽ അതു തീരുംവരെയും.
∙ കറസ്പോണ്ടൻസ് / പാർട്‌–ടൈം / ഓപ്പൺ യൂണിവേഴ്സിറ്റി പഠനത്തിനു സഹായമില്ല. സിഎ, കമ്പനി സെക്രട്ടറിഷിപ്, കോസ്റ്റ് അക്കൗണ്ടൻസി പഠനത്തിനും സഹായമില്ല.
∙ മെ‍‍ഡിക്കൽ / എൻജിനീയറിങ് ബിരുദപഠനത്തിനു ജനറൽ സ്കോളർഷിപ് തുടർന്നു കിട്ടാൻ തൊട്ടുമുൻപത്തെ വാർഷികപരീക്ഷയ്ക്ക് 55% എങ്കിലും മാർക്ക് നേടണം’ ആർട്സ് / സയൻസ് / കൊമേഴ്സ് ബിരുദ പ്രോഗ്രാമുകൾക്ക് 50% മാർക്കും. സ്പെഷൽ ഗേൾ ചൈൽഡിന് 11–ാം ക്ലാസിൽ 50% മാർക്കുണ്ടെങ്കിലേ സ്കോളർഷിപ് തുടർന്നുകിട്ടൂ.
∙ ഒരു കുടുംബത്തിൽനിന്ന് ഒരു കുട്ടിക്കേ സഹായം കിട്ടൂ. പക്ഷേ രണ്ടാമത്തേത് പെൺകുട്ടിയാണെങ്കിൽ അപേക്ഷിക്കാം.
∙ വരുമാനം തെളിയിക്കാൻ, സ്വയംതൊഴിലിലേർപ്പെട്ട രക്ഷിതാക്കൾ നോൺ–ജുഡീഷ്യൽ സ്റ്റാംപ് പേപ്പറിൽ നോട്ടറൈസ് ചെയ്ത സത്യവാങ്മൂലം സമർപ്പിച്ചാൽ മതി. ജോലിയിലിരിക്കുന്നവർ മേലധികാരിയുടെ സർട്ടിഫിക്കറ്റ് ഹാജരാക്കണം. ഭൂമിയുടെ ഉടമസ്ഥാവകാശവും മറ്റും റവന്യൂ അധികൃതർ സാക്ഷ്യപ്പെടുത്തണം.
∙ ഓരോ എൽഐസി ഡിവിഷനിലും 20 വിദ്യാർഥികൾക്കും, 10 സ്പെഷൽ ഗേൾ ചൈൽഡ് വിഭാഗക്കാർക്കും സഹായം നൽകും. ജനറൽ വിഭാഗത്തിലെ 20ൽ 10 ആൺകുട്ടികൾക്കും 10 പെൺകുട്ടികൾക്കും. കൂടുതൽ വിവരങ്ങൾക്കു സൈറ്റ് നോക്കാം.