ജന്തുലോകത്തു നിന്നുള്ള ചില കാഴ്ചകള്‍ മനസ്സിനെ ഏറെ സങ്കടപ്പെടുത്തുന്നവയാണ്. ഇതിലൊന്നാണ് ഹോണ്ടുറാസില്‍ നിന്നുള്ള കുഞ്ഞിനെ നഷ്ടപ്പെട്ട ഒരു അമ്മപ്പശുവിന്റെ ദൃശ്യം. തന്റെ കുഞ്ഞിനെ കൊന്ന പാമ്പിനോട് ഏറ്റുമുട്ടാന്‍ ശ്രമിക്കുന്ന അമ്മപ്പശുവാണ് ദൃശ്യങ്ങളിലുള്ളത്. തന്റെ കുഞ്ഞ് ജീവൻ വെടിഞ്ഞെന്ന സത്യം അംഗീകരിക്കാതെ പാമ്പ് വീണ്ടും കുഞ്ഞിന്റെയടുത്തേക്കു വരുന്നത് തടയാനാണ് അമ്മപ്പശുവിന്റെ ശ്രമം. ഏതാനും പേര്‍ കുടുക്കിട്ട് പാമ്പിനെ പിടിച്ചിട്ടുണ്ടെങ്കിലും കുഞ്ഞിനെ വിഴുങ്ങാനും അമ്മപ്പശുവിനെ ആക്രമിക്കാനും ഇതിനിടെയിൽ അനക്കോണ്ടയും ശ്രമിക്കുന്നുണ്ട്.
അമ്മപ്പശുവിന്റെ കരച്ചില്‍ കേട്ടെത്തിയവരാണ് കുഞ്ഞിനെ വരിഞ്ഞു മുറുക്കുന്ന നിലയില്‍ അനക്കോണ്ടയെ കണ്ടെത്തിയത്. തുടര്‍ന്ന് ഇവര്‍ പിടി വിടുവിച്ചെങ്കിലും അപ്പോഴേക്കും പശുക്കുട്ടിയുടെ ജീവൻ നഷ്ടപ്പെട്ടിരുന്നു. തന്റെ കുഞ്ഞിനെ വരിഞ്ഞുമുറുക്കിയ പാമ്പിനെ ചവിട്ടിയും കുത്തിയുമെല്ലാം കൊല്ലാനുള്ള ശ്രമത്തിലായിരുന്നു അമ്മപ്പശു. പാമ്പിനെ നാട്ടുകാര്‍ ചേര്‍ന്നു കുടുക്കിട്ട് പിടിച്ചെങ്കിലും അമ്മപ്പശു അങ്ങനെ വിട്ടു കൊടുക്കാന്‍ തയ്യാറായിരുന്നില്ല. അനക്കോണ്ടയെ ചവിട്ടിയും കുത്തിയുമെല്ലാം അമ്മപ്പശു മുറിവേല്‍പ്പിച്ചു.
ഇതിനിടെയിൽ അമ്മപ്പശു തന്റെ കുട്ടിക്ക് ജീവനുണ്ടോയെന്നു നക്കി നോക്കുന്നുമുണ്ടായിരുന്നു. പശുക്കുട്ടിയുടെ കാലില്‍ വീണ്ടും പിടിത്തമിടാന്‍ ശ്രമിച്ച പാമ്പിനെ അമ്മപ്പശു വീണ്ടും രോഷത്തോടെ ആക്രമിക്കുന്നുണ്ട്. അനക്കോണ്ടയുടെ പ്രത്യാക്രമണത്തിൽ അമ്മപ്പശുവിനും പരിക്കേറ്റു. പാമ്പിനെ കെട്ടി വലിക്കാന്‍ കൂടി നില്‍ക്കുന്നവര്‍ ശ്രമിക്കുന്നുണ്ടെങ്കിലും പാമ്പ് ബലം പിടിക്കുന്നത് മൂലം പലപ്പോഴും ഇവരും പരാജയപ്പെടുന്നുണ്ടായിരുന്നു.
അനക്കോണ്ട പരാജയം സമ്മതിച്ച് ചതുപ്പില്‍ നിന്നു വെള്ളത്തിലേക്കു തിരിച്ചു പോകാന്‍ ശ്രമിക്കുമ്പോഴും അമ്മപ്പശു ഓടിയെത്തി ആക്രമിച്ചു. ഒടുവില്‍ അനക്കോണ്ടയെ പിടിച്ചുകെട്ടാനുള്ള ശ്രമം നാട്ടുകാര്‍ തുടരുമ്പോൾ ജീവനറ്റ തന്റെ കുഞ്ഞിനെ നക്കിയെഴുന്നേല്‍പ്പിക്കാന്‍ ശ്രമിക്കുന്ന അമ്മപ്പശുവിന്റെ കാഴ്ച ആരേയും നൊമ്പരപ്പെടുത്തും.
