കാലവർഷം തുടക്കത്തിൽ ദുർബലം; ഭയക്കേണ്ടത് പ്രാദേശിക പ്രളയങ്ങളെ: 2018 ആവർത്തിക്കുമോ?

കാലവർഷം കേരളത്തിൽ എത്തിയിരിക്കുന്നു. പലയിടത്തും അതിശക്തമായ മഴയാണ്. ഇങ്ങനെ മഴ പെയ്താൽ 2018ലേതു പോലെ പ്രളയം ഉണ്ടാകുമോ? പലരുടെയും സംശയം ഇതാണ്. എന്നാൽ അത്തരത്തിലുള്ള വലിയ പ്രളയത്തേക്കാൾ ഭയക്കേണ്ടത് പ്രാദേശിക പ്രളയങ്ങളെയാണെന്ന് കൊച്ചി ശാസ്ത്ര സാങ്കേതിക സർവകലാശാല, റഡാർ ഗവേഷണ കേന്ദ്രം ശാസ്ത്രജ്ഞൻ ഡോ. എം.ജി. മനോജ്‌ പറയുന്നു. ഒട്ടും പ്രതീക്ഷിക്കാത്ത സ്ഥലങ്ങളിലാണ് ഇപ്പോൾ പ്രളയം ഉണ്ടാകുന്നത്. 2018ലും 2019ലും പ്രളയത്തിന്റെ പ്രശ്നങ്ങൾ നേരിടാത്ത സ്ഥലങ്ങളിൽ ഇപ്പോൾ വെള്ളക്കെട്ട് രൂക്ഷമാണ്. ഇത് ഏറെ അപകടമാണെന്ന് എം.ജി മനോജ് മനോരമ ഓൺലൈനോട് പറഞ്ഞു.

‘‘ഓരോ പ്രദേശങ്ങളും കാലവർഷത്തെ നേരിടുന്നത് വ്യത്യസ്ത രീതിയിലാണ്. അതുകൊണ്ട് കാലവർഷത്തിൽ ഏറെ ബാധിക്കപ്പെടുന്ന ജില്ല ഏതാണെന്ന് മുൻകൂട്ടി പറയാനാകില്ല. ഇപ്പോൾ കൊച്ചി, തിരുവനന്തപുരം നഗരങ്ങളിലെ വെള്ളക്കെട്ടാണ് ചർച്ച ചെയ്യപ്പെടുന്നത്. ഇതുവരെ ഉരുൾപ്പൊട്ടൽ, മലവെള്ളപ്പാച്ചിൽ എന്നിവ റിപ്പോർട്ട് ചെയ്തിട്ടില്ല. അങ്ങനെ സംഭവിച്ചാൽ മറ്റു ജില്ലകളിലായിരിക്കും ദുരിതമനുഭവിക്കുന്നത്. കടലാക്രമണം ഉണ്ടായാൽ തീരദേശ മേഖലയും അപകടത്തിലാകും.