കൂറ്റൻ പെരുമ്പാമ്പിനെ കടിച്ചുവലിച്ച് ചീങ്കണ്ണി; തടാകക്കരയിൽ കണ്ടത്?

മൃഗങ്ങളുടെയും പക്ഷികളുടെയും ചിത്രങ്ങൾക്കും ദൃശ്യങ്ങൾക്കും സമൂഹമാധ്യമങ്ങളിൽ കാഴ്ചക്കാരേറെയാണ്. അത്തരമൊരു ചിത്രമാണ് ഇപ്പോൾ സമൂഹമാധ്യമങ്ങളിൽ നിറയുന്നത്. ഫ്ലോറിഡയിലെ എവർഗ്ലേഡ് ദേശീയ പാർക്കിലാണ് സംഭവം നടന്നത്. ഫ്ലോറിഡയിലെ പ്രാദേശിക ജീവിവർഗമാണ് ചീങ്കണ്ണികൾ. ജലാശലയങ്ങിലെല്ലാം ഇവയെ ധാരളമായി കാണാൻ കഴിയും. ചീങ്കണ്ണി കൂറ്റൻ ബർമീസ് പൈതൺ വിഭാഗത്തിൽ പെടുന്ന പാമ്പിനെ ഭക്ഷിക്കുന്ന ചിത്രമാണ് ഇപ്പോൾ സമൂഹമാധ്യമങ്ങളിൽ നിറയുന്നത്. എവർഗ്ലേഡ് ദേശീയ പാർക്കിന്റെ ഔദ്യോഗിക ട്വിറ്റർ പേജിലാണ് ചിത്രം പങ്കുവച്ചത്.

ഫ്ലോറിഡയിലെ അധിനിവേശ ജീവിവർഗമാണ് ബർമീസ് പൈതണുകൾ. ഏഷ്യയാണ് ബർമീസ് പെരുമ്പാമ്പുകളുടെ സ്വദേശം.1980 ലാണ് എവർഗ്ലേഡിൽ ആദ്യമായി ബർമീസ് പൈതണെ കണ്ടെത്തിയത്. വളർത്താനായി കൊണ്ടുവന്ന പെരുമ്പാമ്പുകളെ ഉടമസ്ഥർ ആരുമറിയാതെ വനത്തിലുപേക്ഷിച്ചതാണ് ഇവ വനത്തിലെത്താൻ കാരണം. 1992 ആയപ്പോഴേക്കും ഇവ ക്രമാതീതമായി പെറ്റുപെരുകിയിരുന്നു. പ്രാദേശികമായി കാണപ്പെട്ടിരുന്ന ചെറു ജീവികളികളെയെല്ലാം കൊന്നൊടുക്കിയായിരുന്നു ഇവയുടെ മുന്നേറ്റം.

1997 നടത്തിയ പഠനങ്ങളനുസരിച്ച് പ്രാദേശിക ജീവിയായ റക്കൂണുകളുടെ എണ്ണം 99.3 ശതമാനമായി കുറഞ്ഞിരുന്നു. ഒപ്പോസത്തിന്റെ അംഗസംഖ്യയും 98.9 ശതമാനമായി. ബോബ് ക്യാറ്റുകളുടെ എണ്ണത്തിലും കുത്തനെ കുറവുണ്ടായതായി പഠനങ്ങൾ വ്യക്തമാക്കി. മാർഷ്, കോട്ടൺ ടെയ്ൽ, കുറുക്കൻമാർ തുടങ്ങി പല ജീവികളെയും പ്രദേശത്തു നിന്നും തുടച്ചുമാറ്റിയായിരുന്നു ബർമീസ് പെരുമ്പാമ്പുകളുടെ ജൈത്രയാത്ര. പ്രാദേശിക ജീവികളായ ചീങ്കണ്ണികൾ മാത്രമാണ് ഇവയുടെ ശത്രുപക്ഷത്തുള്ളത്. ബർമീസ് പെരുമ്പാമ്പുകളുടെ എണ്ണം നിയന്ത്രിക്കാൻ നിരവധി ഹണ്ടിങ് മത്സരങ്ങളും അധികൃതർ സംഘടിപ്പിക്കാറുണ്ട്.

English Summary: Alligator chomps down invasive Burmese python for meal