‘എണ്ണക്കറുപ്പിൻ ഏഴഴക്’; ആസ്റ്ററിന് ബ്ലാക്സ്റ്റോം പതിപ്പുമായി എംജി
മിഡ്‌സൈസ് എസ്‍യുവി ആസ്റ്ററിന് ബ്ലാക്സ്റ്റോം പതിപ്പുമായി എംജി. കറുപ്പിൽ കുളിച്ച് നിൽക്കുന്ന ആസ്റ്റർ ബ്ലാക്സ്റ്റോം 1.5 ലീറ്റർ മാനുവൽ പതിപ്പിന് 14.47 ലക്ഷം രൂപയും സിവിടിക്ക് 15.76 ലക്ഷം രൂപയുമാണ് വില. അകത്തും പുറത്തും കറുപ്പിന്റെ അഴക് കൊണ്ടുവരാൻ എംജി ശ്രമിച്ചിട്ടുണ്ട്.
ഗ്ലോസി ബ്ലാക് ഹണികോമ്പ് ഗ്രില്ല്, ചുവപ്പ് ബ്രേക്ക് കാലിപ്പറുകളുള്ള വീലുകൾ, ബ്ലാക് ഷെയ്ഡ് എൽഇഡി ഹെഡ്‌ലാപ്, ബ്ലാക് റൂഫ് റെയിലുകൾ, ഡോർ ഗാർണിഷ് എന്നിവ നൽകിയിട്ടുണ്ട്. വാഹനത്തിന്റെ മുൻ ഫെൻഡറുകളിൽ ബ്ലാക്സ്റ്റോം ബാഡ്ജിങ് നൽകിയിട്ടുണ്ട്. ടക്‌സീഡോ ബ്ലാക് ഫിനിഷിങ്ങിലാണ് ഇന്റീരിയർ അപ്‌ഹോള്‍സ്റ്ററി. സ്പോർട്ടി ഫിനിഷ് തോന്നിക്കാൻ ഇരുവശങ്ങളിലേയും എസി വെന്റുകൾക്കു ചുവപ്പ് ഫിനിഷ്. സ്റ്റിച്ചിങ്ങുകള്‍ ചുവപ്പ് നൂലുകള്‍ ഉപയോഗിച്ചാണ്.
കറുപ്പ് നിറത്തിലുള്ള ഫ്‌ളോര്‍ കണ്‍സോളും സ്റ്റിയറിങ് വീലും ഒഴികെ മറ്റ് ഡിസൈനുകള്‍ റെഗുലര്‍ പതിപ്പിലേതിനു സമാനമാണ്. 1.5 ലീറ്റര്‍ പെട്രോള്‍ എന്‍ജിനാണ് ആസ്റ്റര്‍ ബ്ലാക്സ്‌റ്റോമില്‍. 110 പിഎസ് കരുത്തും 144 എന്‍എം ടോര്‍ക്കുമുണ്ട് ഈ എൻജിന്. അഞ്ച് സ്പീഡ് മാനുവല്‍, സിവിടി ഗിയർബോക്സുകൾ.
English Summary: MG Astor Blackstorm edition Launched at Rs 14.48 Lakh