വെസ്റ്റ്​യോർക്ക് ഷെയറിലെ കിത്തിലി ആസ്ഥാനമായി ഗ്രേറ്റ് ബ്രിട്ടൻ സിറോ മലബാർ രൂപതയ്ക്ക് പുതിയ മിഷൻ

വെസ്റ്റ്​യോർക്ക്∙  വെസ്റ്റ്​യോർക്ക് ഷെയറിലെ കിത്തിലി ആസ്ഥാനമായി സിറോ മലബാർ സഭയുടെ ഗ്രേറ്റ് ബ്രിട്ടൻ രൂപതയ്ക്ക് പുതിയ മിഷൻ നിലവിൽ വരുന്നു. സെന്‍റ് അൽഫോൻസാ മിഷൻ എന്ന നാമധേയത്തിൽ അറിയപ്പെടുന്ന പുതിയ മിഷന്‍റെ ഉദ്ഘാടനം സെപ്റ്റംബർ 25ന് സിറോ മലബാർ സഭയുടെ തലവൻ മേജർ ആർച്ച് ബിഷപ് മാർ റാഫേൽ തട്ടിൽ നിർവഹിക്കും. 25 ന് വൈകിട്ട് 5 മണിക്ക് നടക്കുന്ന തിരുകർമ്മങ്ങൾക്കും ഉദ്ഘാടന ചടങ്ങുകൾക്കും മാർ റാഫേൽ തട്ടിലിനൊപ്പം ഗ്രേറ്റ് ബ്രിട്ടൻ രൂപതാധ്യക്ഷൻ മാർ ജോസഫ് സ്രാമ്പിക്കലും നേതൃത്വം നൽകും. കിത്തിലിയിലെ സെന്‍റ് ജോസഫ് ദേവാലയത്തിൽ വച്ചായിരിക്കും ചടങ്ങുകൾ നടക്കുക.

സെന്‍റ് മേരീസ് ആന്‍ഡ് സെന്‍റ് വിൽഫ്രഡ് ദേവാലയത്തിന്‍റെ വികാരിയും പുതിയതായി രൂപീകൃതമാകുന്ന മിഷന്‍റെ നിയുക്ത ഡയറക്ടറുമായ ഫാ. ജോസ് അന്ത്യാംകുളത്തിന്‍റെ നേതൃത്വത്തിലുള്ള കമ്മിറ്റിയാണ് പുതിയ മിഷൻ രൂപീകരണത്തിന് ചുക്കാൻ പിടിച്ചത്. കിത്തിലിയിലെ സിറോ മലബാർ സമൂഹം നിലവിൽ ലീഡ്സ് സെന്‍റ് മേരീസ് ആന്‍റ് സെന്‍റ് വിൽഫ്രഡ് ഇടവകയിലെ അംഗങ്ങളാണ്. 

വെസ്റ്റ്​യോർക്ക് ഷെയറിലെ സിറോ മലബാർ വിശ്വാസികളുടെ അജപാലന ദൗത്യവുമായി ഫാ. ജോസഫ് പൊന്നോത്ത് ഒന്നര പതിറ്റാണ്ടുകൾക്ക് മുമ്പ് എത്തുമ്പോൾ കിത്തിലി ആയിരുന്നു അദ്ദേഹത്തിന്‍റെ ആസ്ഥാനം. ഫാ. മാത്യു മുളയോലിയുടെ നേതൃത്വത്തിൽ ഇടവക ദേവാലയം ആയപ്പോഴും കിത്തിലിയിലെ വിശ്വാസികൾ സഭയുടെ വളർച്ചയ്ക്ക് നിർണ്ണായകമായ സംഭാവനകളാണ് നൽകിയത്.

പുതിയ മിഷന്‍റെ ഉദ്ഘാടനത്തിന് വിപുലമായ ഒരുക്കങ്ങളാണ് നടക്കുന്നത്. ബുധനാഴ്ച നടക്കുന്ന ഉദ്ഘാടന ചടങ്ങിലേക്ക് എല്ലാ വിശ്വാസികളെയും സ്വാഗതം ചെയ്യുന്നതായി നിയുക്ത മിഷൻ ഡയറക്ടർ ഫാ. ജോസ് അന്ത്യാംകുളം അറിയിച്ചു.