എൺപതുകളിലെ ദുബായ്, 'ആകാശക്കാഴ്ച ‘പ്രവാസികളുടെ പറുദീസ’യുടെ ഓർമചിത്രങ്ങൾ വൈറൽ

ദുബായ് ∙ യുഎഇ, പ്രത്യേകിച്ച് ദുബായ്, കണ്ണടച്ചുതുറക്കും മുൻപായി നേടിയ അവിശ്വസനീയമായ വളർച്ച ലോകത്തെ വിസ്മയിപ്പിക്കുന്നതാണ്. മരുഭൂമിയിൽ നിന്ന് ഉയർന്നുവന്ന ഈ നഗരം ഇന്ന് ഹരിതാഭയിലും ആഡംബര കെട്ടിടങ്ങളും ആകർഷകമായ വിനോദകേന്ദ്രങ്ങളും വൻ വ്യവസായ ശാലകളാലും നിറഞ്ഞതാണ്.

200-ലധികം രാജ്യങ്ങളിൽ നിന്നുള്ള ആളുകൾ ദുബായിയിൽ താമസിക്കുകയും ജോലി ചെയ്യുകയും ചെയ്യുന്നു. വ്യത്യസ്തമായ ജീവിതശൈലിയും സമ്പന്നമായ സംസ്കാരവും വൈവിധ്യമാർന്ന സമൂഹവും സുരക്ഷിതമായ ജീവിതവും മികച്ച ഭരണവും ഈ രാജ്യത്തെ ലോക ജനതയ്ക്ക് ജീവിക്കാനും ജോലി ചെയ്യാനും ഉയരങ്ങളിലെത്താനുമുള്ള അപൂർവ്വ അവസരമാക്കി മാറ്റുന്നു. ദുബായിയുടെ ദ്രുതഗതിയിലുള്ള വളർച്ച നിരവധി പുതിയ അവസരങ്ങൾ സൃഷ്ടിച്ചിട്ടുണ്ട്. ലോകത്തിന്‍റെ വിവിധ കോണുകളിൽ നിന്നുള്ള ആളുകൾ ദിനംപ്രതി ഇവിടെ ഉപജീവനം തേടിയും ബിസിനസ് ആരംഭിക്കാനും എത്തുന്നു.

പണ്ട്, കേരളത്തിൽ നിന്നും ഇന്ത്യയുടെ മറ്റ് പ്രദേശങ്ങളിൽ നിന്നും യുഎഇയിലേക്ക് പോയവരിൽ ഭൂരിഭാഗവും അഭ്യസ്തവിദ്യരല്ലാത്തവരായിരുന്നു. എന്നാൽ ഇന്ന്, അവരുടെ മക്കളും മക്കളുടെ മക്കളും ഉന്നത വിദ്യാഭ്യാസവും വിവിധ മേഖലകളിൽ പ്രവൃത്തി പരിചയവും നേടി ദുബായിയിൽ എത്തിച്ചേരുന്നു. പുതുതലമുറ ചിന്തിക്കുന്നുണ്ടായിരിക്കുമോ ആവോ, അവരുടെ പൂർവികർ അവിടെയെത്തുമ്പോൾ ഈ രാജ്യം വളർച്ചയുടെ പ്രാരംഭ ഘട്ടത്തിൽ മാത്രമായിരുന്നുവെന്ന്!

ഈ അവിശ്വസനീയമായ വളർച്ച നമ്മെ ഓർമ്മിപ്പിക്കുന്ന പഴയകാല ചിത്രങ്ങളും വിഡിയോകളും ഇപ്പോൾ  വൈറലാകുകയാണ്. ഈ ചിത്രങ്ങളിൽ 1980-കളിലെ ദുബായിയുടെ ദൃശ്യങ്ങൾ ഇന്നത്തെ നഗരത്തിൽ നിന്ന് ഏറെ വ്യത്യസ്തമാണ്.

ഈ അപൂർവ്വ ചിത്രങ്ങൾ പകർത്തിയത് ലോകത്തിലെ ഏറ്റവും മികച്ച എയർലൈനുകളിലൊന്നായ എമിറേറ്റ്സ് എയർലൈൻ സ്ഥാപിക്കാൻ എത്തിയ വെയിൽസ് സ്വദേശിയായ റിച്ചഡ് പാരി എന്ന പൈലറ്റാണ്. ഒഴിവുസമയങ്ങളിൽ പറക്കൽ പാഠങ്ങൾ നൽകിയിരുന്ന അദ്ദേഹത്തിന് ആകാശത്ത് നിന്ന് നഗരത്തെയും രാജ്യത്തെയും ക്യാമറയിലൂടെ പകർത്താൻ അനുവാദം ലഭിച്ചിരുന്നു.

കടലിന് നേരെ പറന്നതിന് ശേഷം ഇടത് തിരിഞ്ഞ് കടൽത്തീരത്തിന് സമാന്തരമായി കടലിന് മുകളിലൂടെ പറക്കുക സ്ഥിരം പരിപാടിയായിരുന്നെന്ന് പാരി പറയുന്നു. ഈ പാതയിൽ നിന്ന് അദ്ദേഹം പകർത്തിയ ചിത്രങ്ങളിൽ ഒന്ന് ഇന്ന് ആകാശംമുട്ടുന്ന വൻകിട കെട്ടിടങ്ങൾ നിറഞ്ഞിരിക്കുന്ന ദുബായിയിലെ ഷെയ്ഖ് സായിദ് റോഡിന്‍റെതാണ്. അക്കാലത്ത് ഈ റോഡ് വളരെ നിശബ്ദവും ചെറുതുമായിരുന്നു. ചിത്രത്തിൽ അബുദാബിയിലേക്കുള്ള ദിശയിൽ മൂടൽമഞ്ഞ് നിറഞ്ഞിരിക്കുന്നതും കാണാം.

ആദ്യകാലത്തെ ഏറ്റവും ആകർഷകമായ കെട്ടിടങ്ങളിലൊന്നായിരുന്ന ദുബായ് വേൾഡ് ട്രേഡ് സെന്‍റർ അപ്പാർട്ടുമെന്‍റുകൾ ഈ ചിത്രത്തിൽ വ്യക്തമായി കാണാം. ഇന്ന് ദുബായ് ലോകത്തിലെ ഏറ്റവും ജനപ്രിയമായ വിനോദസഞ്ചാര കേന്ദ്രങ്ങളിലൊന്നാണ്. 

അതിനെ ചുറ്റിപ്പറ്റിയുള്ള മരുഭൂമികൾ  പോയകാലത്തെ ദുബായുടെ നല്ലോർമകൾ സമ്മാനിക്കുന്നു. വരാനിരിക്കുന്ന മാറ്റങ്ങൾക്ക് തയ്യാറായ ഒരു നഗരം അത് കാണിച്ചുതരും. ദുബായിലേയ്ക്ക് നാവിഗേറ്റ് ചെയ്യാനുള്ള ഏറ്റവും നല്ല മാർഗം വേൾഡ് ട്രേഡ് സെന്‍റർ ഉപയോഗിച്ചാണെന്ന് തന്‍റെ പിതാവ് തമാശ പറയുമായിരുന്നുവെന്ന് പാരി പറയുന്നു.

∙ ഷെയ്ഖ് സായിദ് റോഡ് എന്ന വിസ്മയം
ഷെയ്ഖ് സായിദ് റോഡിലൂടെ പറക്കുമ്പോൾ ജുമൈറയിലെ താഴ്ന്ന നിലയിലുള്ള വില്ലകൾ വലതുവശത്തായിരുന്നു-പാരി ഓർക്കുന്നു. പിന്നെ ഇടതുവശത്ത്, വേൾഡ് ട്രേഡ് സെന്‍റർ കഴിഞ്ഞാൽ വലിയ തുറന്ന മണൽ പ്രദേശങ്ങൾ മണൽ മാത്രമായിരുന്നു ഉണ്ടായിരുന്നത്. പിന്നീട് പൊളിച്ചുമാറ്റിയ മെട്രോപൊളിറ്റൻ ഹോട്ടൽ കുറച്ചുകൂടി താഴെയായി സ്ഥിതി ചെയ്യുന്നു. വലതുവശത്ത് ഷിക്കാഗോ ബീച്ച് ഹോട്ടൽ ദൃശ്യമായിരുന്നു.

പിന്നീട് അത് മെട്രോപൊളിറ്റനും ജബൽ അലിക്കും ഇടയിലുള്ള ഡെസേർട്ട് സ്പ്രിങ് സിലേക്കായിരുന്നു. ഞങ്ങൾക്ക് അവിടെ ഒരു ബ്ലോക്ക് എയർസ്‌പേസ് ഉണ്ടായിരുന്നു. വിദ്യാർഥികൾക്ക് വിമാനം തിരിക്കാനും വിമാനത്തിൽ കയറാനും ഇറങ്ങാനും നിർബന്ധിത ലാൻഡിങ് പരിശീലിക്കാനും പഠിക്കുന്നതിനാൽ ചുറ്റിക്കറങ്ങാൻ ഞങ്ങളെ അനുവദിച്ചു. ഏറ്റവും വലിയ അപകടം ചില റേഡിയോ മാസ്റ്റുകളായിരുന്നു. ഓയിൽ റിഗുകളിൽ സർവീസ് നടത്തുന്ന എയ്‌റോഗൾഫ് ഹെലികോപ്റ്ററുകൾക്കായി ഞങ്ങൾ നല്ല നിരീക്ഷണം നടത്തുകയും തീരപ്രദേശത്തിന് സമാന്തരമായി ദുബായിലേക്ക് മടങ്ങുകയും ചെയ്യാറുണ്ടായിരുന്നു.

∙ 1960-കളിൽ കടൽ കടന്ന പിതാവ്
ക്യാപ്റ്റനെന്ന നിലയിൽ പാരിയുടെ പിതാവ് പലപ്പോഴും സന്ദർശിച്ചിരുന്ന 1960-കളിൽ, രാജ്യം ഇന്നത്തെ നഗര ജീവിതത്തിലേക്ക് മാറുന്നതിന് മുമ്പ് പാരിയും ഒട്ടേറെ തവണ ദുബായ് സന്ദർശിച്ചു. ദുബായ്‌ക്ക് ഇതുവരെ നിർമിച്ചതിൽ  ഏറ്റവും മികച്ച നാവിഗേഷൻ സഹായമായിരുന്നു വേൾഡ‍് ട്രേഡ് സെന്‍ററെന്നാണ് പിതാവിന്‍റെ അഭിപ്രായം. ഈ സമയത്ത് നഗരം വളരെ ചെറുതായിരുന്നു. ജീവിതം ക്രീക്കിനെ ചുറ്റിപ്പറ്റിയും.

പാരിയുടെ ശേഖരത്തിൽ നിന്നുള്ള മറ്റൊരു ഏരിയൽ ദൃശ്യം ദുബായ് ക്രീക്കിന്‍റെ തുടക്കമാണ്. ദെയ്‌റ ഭാഗത്ത് ഒറ്റപ്പെട്ട നിലയിൽ കാണുന്ന ഹയാത്ത് റീജൻസി ഹോട്ടൽ. ഈ ഫോട്ടോയും വെള്ളത്തിന് കുറുകെയുള്ള ഷിന്ദഗയുടെ ചരിത്രപരമായ അയൽപക്കത്തെ കാണിക്കുന്നു.

ദുബായ് ക്രീക്കിന്‍റെ നിരവധി ചിത്രങ്ങൾ പാരി പകർത്തിയിട്ടുണ്ട്. ലോഞ്ചുകളും അബ്രകളും നിറഞ്ഞ ക്രീക്കിന് ചുറ്റുമായിരുന്നു അവിടത്തെ ജീവിതം കേന്ദ്രീകരിച്ചിരുന്നത്. ഷെറാട്ടൺ ദുബായ് ക്രീക്ക്, ഇന്‍റർകോണ്ടിനെന്‍റൽ (ഇപ്പോൾ റാഡിസൺ ബ്ലൂ) തുടങ്ങിയ ഹോട്ടലുകൾ ഉപയോഗിച്ച് ഈ ഘട്ടത്തിൽ ദെയ്‌റ എങ്ങനെ നിർമ്മിക്കപ്പെട്ടുവെന്ന് മനസിലാക്കാം. എന്നാൽ ബർ ദുബായ് പ്രദേശം അത്ര വികസിച്ചിരുന്നില്ല. ഷിന്ദഗ, സത് വ, കരാമ പ്രദേശം എന്നിവ മാത്രമാണ് വികസിപ്പിച്ചുകൊണ്ടിരുന്നതെന്ന് പാരി ഓർക്കുന്നു.

∙ അന്ന് റാസൽഖൈമയിലേയ്ക്കും ഫുജൈറയിലേയ്ക്കും പറന്നു
ഈ പരിശീലന പറക്കലുകൾ പാരിയെ രാജ്യം ചുറ്റി വടക്ക് റാസൽ ഖൈമയിലേക്കും കിഴക്ക് മലനിരകൾ കടന്ന് ഫുജൈറയിലേയ്ക്കും എത്തിച്ചു. ഞങ്ങൾ ദുബായിൽ നിന്ന് വലത്തേക്ക് തിരിഞ്ഞ് ഉമ്മുൽ ഖുവൈൻ, അജ്മാൻ എന്നീ ചെറിയ മത്സ്യബന്ധന തുറമുഖങ്ങൾ കടന്ന് റാസൽ ഖൈമയിലേക്ക് ഒരു നേർരേഖയിൽ പോയെന്ന് അദ്ദേഹം പറയുന്നു. അതിന് നല്ല നീളമുള്ള റൺവേ ഉണ്ടായിരുന്നു. ശരിക്കും സർക്യൂട്ടുകൾ പറത്താനും ലാൻഡ് ചെയ്യാനും ടെർമിനലിൽ പോയി ഒരു കപ്പ് കാപ്പി കുടിക്കാനും കഴിയുമായിരുന്നു. വളരെ തിരക്കേറിയ യുഎഇ എയർസ്‌പേസ് കാണുമ്പോൾ ഇതൊക്കെ അവിശ്വസനീയമായി തോന്നുന്നു.

റാസൽഖൈമയിലേക്ക് ഒരു വിദ്യാർഥിയെ സോളോ ക്രോസ്-കൺട്രിയിലേയ്ക്ക് അയച്ച ഇൻസ്ട്രക്ടർമാരിൽ ഒരാളെക്കുറിച്ചുള്ള  കഥ പാരി ഓർക്കുന്നു. കുറച്ച് സമയം കഴിഞ്ഞിട്ടും വിദ്യാർഥി തിരിച്ചെത്തിയില്ല. അദ്ദേഹത്തിന് യഥാർഥത്തിൽ പർവതങ്ങൾക്ക് മുകളിലൂടെ പറക്കാൻ കഴിഞ്ഞുവെന്നും എയർ ട്രാഫിക് കൺട്രോൾ സഹായത്തോടെ ഫുജൈറയിൽ ഇറങ്ങിയെന്നുമാണ് കഥ. ആ വിദ്യാർഥി എങ്ങനെയോ വഴിതെറ്റിയാണ് അിടെയെത്തിയതെന്നായിരുന്നു അന്നത്തെ റിപ്പോർട്ടുകൾ. പക്ഷേ ആ കഥ ഫ്ലൈയിങ് ക്ലബ് നാടോടിക്കഥകളുടെ വാർഷികങ്ങളിൽ ആളുകൾ പരസ്പരം പങ്കുവച്ചിരുന്നു.

ദുബായുടെ ഭാവിയിലേക്ക് വിരൽ ചൂണ്ടുന്ന സൂചനകളും പാരിയുടെ ഫോട്ടോകളിൽ നിന്ന് വ്യക്തമാണ്. ഷെയ്ഖ് സായിദ് റോഡിലൂടെ ഒരു പുതിയ നഗരം നിർമിക്കുമെന്ന് അന്നേ ഉറപ്പായിരുന്നു. ഷെയ്ഖ് സായിദ് റോഡിലെ വലിയ കെട്ടിടങ്ങളിലൊന്നായ എമിറേറ്റ്സ് പിങ്ക് ടവർ എന്നറിയപ്പെടുന്ന വാഫ ടവറിൽ പാരി താമസിച്ചിട്ടുണ്ട്.  ഇന്ന് ഷെയ്ഖ് സായിദ് റോഡിന്‍റെ അതേ വീക്ഷണകോണിൽ നിന്നുള്ള ഒരു ഏരിയൽ ഷോട്ട് വളരെ വ്യത്യസ്തമായി തോന്നുന്നു.

∙ ദുബായ് പഴയ ദുബായിയല്ല; പാരി പക്ഷേ പഴയ പാരിയാണ്
ഇന്ന് ഷെയ്ഖ് സായിദ് റോഡിൽ ലോകത്തിലെ ഏറ്റവും ഉയരം കൂടിയ ബുർജ് ഖലീഫയും മ്യൂസിയം ഓഫ് ദ് ഫ്യൂചറും ലോകശ്രദ്ധ പിടിച്ചുപറ്റുന്നു. കൂടാതെ ഒട്ടേറെ പുതിയ സമീപസ്ഥലങ്ങളും ഹോട്ടലുകളും അംബരചുംബികളും. എമിറേറ്റ്‌സ് ലോകത്തിലെ ഏറ്റവും മികച്ച എയർലൈനുകളിൽ ഒന്നായും ദുബായ് ഏറ്റവും തിരക്കേറിയ വിമാനത്താവളങ്ങളിലൊന്നായും മാറി.

അബുദാബിയിൽ ഒരു പുതിയ ലോകോത്തര ടെർമിനൽ തുറന്നു. ഈ പ്രദേശം പൊതുവെ വ്യോമയാനത്തിന്‍റെ സുവർണകാലം ആസ്വദിക്കുകയാണ്.  1995 മുതൽ 2014-ൽ വിരമിച്ചപ്പോൾ വരെ ആദ്യം ഗൾഫ് എയറിനും പിന്നീട് എമിറേറ്റ്‌സിനും പാരി പറന്നു. ഇപ്പോൾ മലേഷ്യയിൽ താമസിക്കുന്ന അദ്ദേഹം ആ നാളുകളിലേക്ക് സ്‌നേഹത്തോടെ തിരിഞ്ഞുനോക്കുന്നു. ദുബായ് ജീവിക്കാൻ അന്നും ഇന്നും ഏറ്റവും നല്ലൊരു സ്ഥലം തന്നെ. താനും കുടുംബവും വളരെ സന്തോഷത്തോടെ ദുബായിൽ ജീവിതം ആസ്വദിച്ചെന്ന് നന്ദിയോടെ അദ്ദേഹം പറയുന്നു.

അബുദാബി, ദുബായ്, ഷാർജ, അജ്മാൻ, ഉമ്മുൽ ഖുവൈൻ, റാസൽഖൈമ, ഫുജൈറ എന്നീ ഏഴ് എമിറേറ്റുകളുടെ ഒരു ഫെഡറേഷനാണ് യുഎഇ. യുഎഇയിലെ ജനസംഖ്യ ഏകദേശം 90 ലക്ഷമാണ്. ആകെ ജനസംഖ്യയുടെ ഏകദേശം 90 ശതമാനവും പ്രവാസികളാണ്. ഇതിൽത്തന്നെ ഇന്ത്യക്കാരാണ് കൂടുതൽ.