രഹസ്യ സംഘടന രൂപീകരിച്ച് ‘യുഎഇ മുസ്‌ലിം ബ്രദർഹുഡ്’; തീവ്രവാദ ഗ്രൂപ്പുകളിൽ നിന്ന് ധനസഹായം

അബുദാബി∙ 2013-ൽ‌ നിരോധിച്ച തീവ്രവാദ സംഘടനയായ യുഎഇ മുസ്‌ലിം ബ്രദർഹുഡിന്‍റെ അംഗങ്ങൾ രാജ്യത്തിന് പുറത്ത് പുതിയ "രഹസ്യ സംഘടന" രൂപീകരിച്ചതായി  യുഎഇ പബ്ലിക് പ്രോസിക്യൂഷൻ നടത്തിയ അന്വേഷണത്തിൽ കണ്ടെത്തിയതായി അധികൃതർ അറിയിച്ചു.  ഈ പുതിയ രഹസ്യ സംഘം മുസ്​ലിം ബ്രദർഹുഡിനെ പുനരുജ്ജീവിപ്പിക്കാൻ ലക്ഷ്യമിട്ടിരുന്നതായി തിരിച്ചറിഞ്ഞു. യുഎഇക്കെതിരായ വിദ്വേഷ പ്രസംഗങ്ങളും അപകീർത്തികരമായ പ്രചാരണങ്ങളും ഗ്രൂപ്പ് എങ്ങനെ പ്രവർത്തിക്കുകയും നയിക്കുകയും ചെയ്‌തുവെന്ന് സംഘടനയിലെ അറസ്റ്റിലായ ഒരു അംഗം കുറ്റസമ്മതത്തിൽ വിശദമാക്കി.   

കുറ്റസമ്മതത്തിൽ നിന്നും സ്റ്റേറ്റ് സെക്യൂരിറ്റി സർവീസിന്‍റെ കണ്ടെത്തലുകളിൽ നിന്നുമുള്ള വിശദാംശങ്ങൾ പരിശോധിക്കാൻ പബ്ലിക് പ്രോസിക്യൂഷനിൽ നിന്നുള്ള ഒരു സംഘം നിലവിൽ ഊർജിതമായ അന്വേഷണം നടത്തിവരുന്നു. അന്വേഷണങ്ങൾ പൂർത്തിയായ ശേഷം ഈ ഭീകര സംഘടനയെക്കുറിച്ചും അതിന്‍റെ കുറ്റകൃത്യങ്ങളെക്കുറിച്ചും കൂടുതൽ വിവരങ്ങൾ അധികൃതർ പ്രഖ്യാപിക്കും.

∙ രാജ്യത്തിന് പുറത്തുനിന്ന് സംഭാവനകൾ
2013-ൽ ഹാജരായിട്ടില്ലെങ്കിലും അറസ്റ്റ് ചെയ്യപ്പെട്ടവരെ നിരീക്ഷിച്ച സ്റ്റേറ്റ് സെക്യൂരിറ്റി സർവീസ്, തീവ്രവാദ സംഘടനയുടെ രണ്ട് ഗ്രൂപ്പുകൾ വിദേശത്ത് കണ്ടുമുട്ടിയതായി കണ്ടെത്തി.  പുതിയ റിക്രൂട്ട്‌മെന്‍റുകൾ ചേരുന്നതോടെ, യുഎഇ മുസ്‌ലിം ബ്രദർഹുഡിന്‍റെ പ്രവർത്തനങ്ങൾ പുനരുജ്ജീവിപ്പിക്കാൻ അവർ പുതിയ രഹസ്യ സംഘടനയ്ക്ക് രൂപം നൽകി.  യുഎഇയ്ക്കുള്ളിലെ സ്രോതസ്സുകളിൽ നിന്നും രാജ്യത്തിന് പുറത്തുള്ള മറ്റ് തീവ്രവാദ ഗ്രൂപ്പുകളിൽ നിന്നുമാണ് ഇവർക്ക് ധനസഹായം ലഭിച്ചതെന്നും കണ്ടെത്തി.

∙ യുഎഇയുടെ നേട്ടങ്ങളെ ചോദ്യം ചെയ്തു
അറസ്റ്റിലായ സംഘടനയിലെ അംഗം സംഘത്തിന്‍റെ ഘടനയും പ്രവർത്തനങ്ങളും വിശദമാക്കി. അവരുടെ ചില അപവാദ പ്രചാരണങ്ങൾ യുഎഇയുടെ നേട്ടങ്ങളെ ചോദ്യം ചെയ്യുകയും മനുഷ്യാവകാശ വിഷയങ്ങളിൽ രാജ്യത്തെ ലക്ഷ്യം വയ്ക്കുകയും ഔദ്യോഗിക സ്ഥാപനങ്ങൾക്കെതിരെ നടപടികൾക്ക് പ്രേരിപ്പിക്കുകയും ചെയ്തുവെന്ന് പബ്ലിക് പ്രോസിക്യൂഷൻ പറഞ്ഞു. യുഎഇ സർക്കാരിലുള്ള വിശ്വാസം ദുർബലപ്പെടുത്തുക, വ്യാജ ഓൺലൈൻ പേജുകളിലൂടെയും പ്രചാരണ അക്കൗണ്ടുകളിലൂടെയും പൊതുജനാഭിപ്രായം ഇളക്കിവിടുക എന്നിവയായിരുന്നു അവരുടെ ലക്ഷ്യം. രാജ്യാന്തര മനുഷ്യാവകാശ ഗ്രൂപ്പുകളുമായി നേരിട്ട് ഇടപഴകുന്ന ചിലർ, യുഎഇ അധികൃതരെ കുറിച്ച് തെറ്റായ വിവരങ്ങൾ നൽകി രാജ്യത്തിനെതിരെ നെഗറ്റീവ് റിപോർട്ടുകൾ പ്രസിദ്ധീകരിക്കാൻ സാധ്യതയുണ്ടെന്ന് അന്വേഷണത്തിൽ കണ്ടെത്തി.