സർട്ടിഫിക്കറ്റുകൾക്കായി ഇ–അറ്റസ്റ്റേഷൻ സൗകര്യം ഒരുക്കി ഖത്തർ വിദേശകാര്യമന്ത്രാലയം

ദോഹ ∙ വിവിധ ആവശ്യങ്ങൾക്കായുള്ള സർട്ടിഫിക്കറ്റുകൾക്ക് ഇ–അറ്റസ്റ്റേഷൻ സൗകര്യം ഒരുക്കി ഖത്തർ വിദേശകാര്യമന്ത്രാലയം. സ്കൂൾ സർട്ടിഫിക്കറ്റുകള്‍,  പൊലീസ് ക്ലിയറൻസ് സർട്ടിഫിക്കറ്റ് എന്നിവയാണ് ആദ്യഘട്ടത്തിൽ ഇലക്ട്രോണിക് അറ്റസ്റ്റേഷൻ സൗകര്യം വഴി ലഭ്യമാകുക.  മന്ത്രാലയത്തിന്റെ ഔദ്യോഗിക വെബ്​സൈറ്റായ https://mofa.gov.qa വഴിയാണ്​ ഇ സർട്ടിഫിക്കറ്റ്​ അറ്റസ്​റ്റേഷൻ ​സൗകര്യം ഏർപ്പെടുത്തിയത്.

​​പുതിയ സംവിധാനം നിലവിൽ വന്നതോടെ ഗവൺമെന്റ്​ സർവീസ്​ സെന്ററുകളും വിവിധ​ ​മന്ത്രാലയം ഓഫിസുകളും സന്ദർശിക്കാതെ തന്നെ പൊതുജനങ്ങൾക്ക്​ ​എത്രയും വേഗത്തിൽ അറ്റസ്​റ്റേഷൻ പൂർത്തിയാക്കാൻ സാധിക്കുമെന്ന്​ വിദേശകാര്യ മന്ത്രാലയം കോൺസുലാർ വിഭാഗം ഡയറക്​ടർ മുഹമ്മദ്​ അബ്​ദുല്ല അൽ സുബൈഇ അറിയിച്ചു. ഇ–അറ്റസ്റ്റേഷൻ സേവനം 24 മണിക്കൂറും ലഭ്യമായിരിക്കും.  എളുപ്പത്തിൽ നടപടികൾ പൂർത്തിയാക്കാൻ കഴിയും വിധമാണ്​ ഇ അറ്റസ്​റ്റേഷൻ സംവിധാനം ഒരുക്കിയിട്ടുള്ളത്. വിദേശകാര്യ മന്ത്രാലയം വെബ്​സൈറ്റിൽ നാഷനൽ ഓതന്റിക്കേഷൻ സിസ്​റ്റം വഴി ലോഗ്​ ഇൻ ചെയ്​ത്​ അപേക്ഷ സമർപ്പിക്കാം. അപേക്ഷ റിവ്യൂ ചെയ്​ത്​ ഫീസും അടച്ചു കഴിയുന്നതോടെ സർട്ടിഫിക്കറ്റ്​ ലഭ്യമാക്കാനുള്ള സൗകര്യ ലഭിക്കും. ഖത്തർ പോസ്​റ്റ്​ വഴി തപാൽ മാർഗമോ, അല്ലാതെയോ അറ്റസ്​റ്റ്​ ചെയ്​ത സർട്ടിഫിക്കറ്റ്​ അപേക്ഷാർഥിക്ക്​ വാങ്ങാം.

ഖത്തർ പോസ്​റ്റ്​, സർക്കാർ കോൺടാക്​സ്​ സെൻറർ (109) എന്നിവയുമായി സഹകരിച്ചാണ്​ 24 മണിക്കൂറും ലഭ്യമാവുന്ന അറ്റസ്​റ്റേഷൻ സൗകര്യം ഒരുക്കിയത്​. ഭാവിയിൽ കൂടുതൽ സർട്ടിഫിക്കറ്റുകളുടെ അറ്റസ്​റ്റേഷൻ സൗകര്യങ്ങൾ ലഭ്യമാകുമെന്ന്​ മന്ത്രാലയം ഐ.ടി വിഭാഗം ഡയറക്​ടർ അബ്​ദുൽ അസീസ്​ മുഹമ്മദ്​ അൽ നഈമി അറിയിച്ചു. സർക്കാർ സേവനങ്ങളുടെ ഡിജിറ്റലൈസേഷൻെറ തുടർച്ചയായാണ്​ ഈ പുതിയ നീക്കം. ഇ–അറ്റസ്റ്റേഷൻ സംവിധാനം നിലവിൽ വരുന്നതോടെ പ്രവാസി വിദ്യാർഥികൾ ഉൾപ്പെടെയുള്ളവരുടെ പഠന ആവശ്യങ്ങൾക്കുള്ള സർട്ടിഫിക്കറ്റുകളും പൊലീസ് ക്ലിയറൻസ് സർട്ടിഫിക്കറ്റുകളും ഇനി എളുപ്പത്തിൽ ലഭ്യമാകും.  കാലതാമസമില്ലാതെ ഇത്തരം സർട്ടിഫിക്കറ്റുകള്‍ ലഭിക്കുന്നത് പ്രവാസികളെ സംബന്ധിച്ചിടത്തോളം ഏറെ ഗുണകരമാണ്.