സൗദിയിൽ കെട്ടിടത്തിൽനിന്നു വീണു; പ്രവാസി മലയാളിക്ക് ദാരുണാന്ത്യം

ജിദ്ദ ∙ സൗദിയിൽ ജോലിസ്ഥലത്ത് കെട്ടിടത്തിൽനിന്ന് വീണ് മലയാളിക്ക് ദാരുണാന്ത്യം. മലപ്പുറം താനൂർ കാരാട് സ്വദേശി സി.പി. നൗഫൽ (45) ആണ് മരിച്ചത്. യാംബുവിനടുത്ത് ഉംലജിലാണ് സംഭവം. ഗ്ലാഡിങ്, ഗ്ലാസ് ഫിറ്റിങ് ജോലി ചെയ്യുന്ന ഇദ്ദേഹം ജോലിസ്ഥലത്ത് കെട്ടിടത്തിൽനിന്ന് വീഴുകയായിരുന്നു. ബുധനാഴ്ച വൈകിട്ടാണ് അപകടമുണ്ടായത്.

ആശുപത്രിയില്‍ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. വി.വി.എൻ. കുഞ്ഞിമൂസ, സി.പി. ഫാത്തിമ എന്നിവരുടെ മകനാണ്. ഭാര്യ നബീല, മക്കൾ അഫാൻ ബിൻ നൗഫൽ, ആയിഷ ബിൻത് നൗഫൽ, അദീം ബിൻ നൗഫൽ.