ജോർജിയയിൽ ഇന്ത്യൻ-അമേരിക്കൻ സ്ഥാനാർത്ഥി രാമസ്വാമിക്കു ഡെമോക്രാറ്റിക് പ്രൈമറിയിൽ വിജയം

അറ്റ്ലാന്‍റ∙ ജോർജിയ സംസ്ഥാന സെനറ്റിലേക്ക് മത്സരിക്കാനുള്ള ഡെമോക്രാറ്റിക് പാർട്ടിയിലെ കടമ്പയിൽ ഇന്ത്യൻ വംശജനായ അശ്വിൻ രാമസ്വാമിക്ക് വിജയം. ഡെമോക്രാറ്റിക് പ്രൈമറിയിൽ വിജയിച്ച അശ്വിൻ രാമസ്വാമി നിലവിലെ റിപ്പബ്ലിക്കൻ സെനറ്റർ ഷോൺ സ്റ്റില്ലിനെ  നേരിടും. നവംബറിൽ 2020ലെ തിരഞ്ഞെടുപ്പ് ഫലം അട്ടിമറിക്കാൻ ശ്രമിച്ചതിന് യുഎസ് മുൻ പ്രസിഡന്റ് ഡോണൾഡ് ട്രംപിനൊപ്പം കുറ്റാരോപിതനായ വ്യക്തിയാണ് ഷോൺ. 

തിരഞ്ഞെടുക്കപ്പെട്ടാൽ, ജോർജിയ സംസ്ഥാനത്ത് ഇതുവരെ തിരഞ്ഞെടുക്കപ്പെട്ട ഏറ്റവും പ്രായം കുറഞ്ഞ പ്രതിനിധിയും ജോർജിയയിൽ ഈ സ്ഥാനം നേടുന്ന ആദ്യത്തെ ഇന്ത്യൻ-അമേരിക്കക്കാരനും അശ്വിൻ ആയിരിക്കും.നവംബറിൽ പൊതുതിരഞ്ഞെടുപ്പ് നടക്കുന്ന സമയത്ത് അശ്വിൻ രാമസ്വാമിക്ക് 25 വയസ്സ് പൂർത്തിയാകും. 25 വയസ്സും അതിന് മുകളിൽ പ്രായമുള്ളവർക്കാണ് സെനറ്റിലേക്ക് മത്സരിക്കാൻ നിയമപരമായി അവകാശമുള്ളത്.

ജോൺസ് ക്രീക്കിൽ മാതാപിതാക്കളോടൊപ്പം താമസിക്കുന്ന അശ്വിൻ ഇപ്പോൾ പ്രചാരണ ചൂടിലാണ് . ഇതിനിടെ ഈ ആഴ്ച ജോർജ് ടൗൺ ലോ സ്കൂളിൽ നിന്ന് ബിരുദം നേടി. അശ്വിൻ രാമസ്വാമിയുടെ മാതാപിതാക്കൾ 1990ലാണ് തമിഴ്‌നാട്ടിൽ നിന്ന് യുഎസിലേക്ക് കുടിയേറിയത്.