വളർത്തുമുയലിനെ കൊന്നു: രണ്ടുപേർ അറസ്റ്റിൽ

മാസച്യുസിറ്റ്സ് ∙ വെസ്റ്റേൺ മാസച്യുസിറ്റ്സിൽ വളർത്തുമുയലിനെ കൊന്ന കേസിൽ രണ്ടുപേർ അറസ്റ്റിൽ. ചിക്കോപ്പിയിലെ ഗബ്രിയേൽ നവ (20), വെസ്റ്റ് സ്പ്രിങ്ഫീൽഡിലെ അലക്സി ഡിമോഗ്ലോ (20) എന്നിവരാണ് അറസ്റ്റിലായത്.

വെസ്റ്റ്ഫീൽഡിൽ നവംബർ 27ന് നടന്ന സംഭവത്തിൽ വെസ്റ്റ്ഫീൽഡ് ജില്ലാ കോടതി പുറപ്പെടുവിച്ച വാറണ്ടിന്റെ അടിസ്ഥാനത്തിലായിരുന്നു അറസ്റ്റ്. പാർട്ടിക്കിടെ വളർത്തുമുയലിനെ പ്രതികൾ ക്രൂരമായി കൊന്നുവെന്നാണ് കേസ്. സംഭവത്തിന്റെ ദൃശ്യങ്ങൾ വിഡിയോയിൽ പകർത്തിയതായി പൊലീസ് പറഞ്ഞു. പ്രതികളെ പാർട്ടിയുടെ ആതിഥേയർക്ക് അറിയില്ലെന്നും പൊലീസ് കൂട്ടിച്ചേർത്തു.

മൃഗത്തോടുള്ള ക്രൂരത, വളർത്തുമൃഗത്തെ കൊല്ലൽ എന്നീ കുറ്റങ്ങൾ പ്രതികൾക്കെതിരെ ചുമത്തി. പ്രതികളെ വെസ്റ്റ്ഫീൽഡ് ജില്ലാ കോടതിയിൽ ഹാജരാക്കി.