ഗ്രേറ്റ്ഫാദർ വിജയത്തിൽ പ്രേക്ഷകർക്ക് നന്ദി പറഞ്ഞ് മമ്മൂട്ടി. ഫെയ്സ്ബുക്ക് ലൈവ് വിഡിയോയിലൂടെയാണ് സിനിമയുടെ വിജയത്തിൽ പ്രതികരണവുമായി മമ്മൂട്ടി എത്തിയത്. സിനിമയുടെ നിർമാതാക്കളായ ആര്യയും ഷാജി നടേശനും മമ്മൂട്ടിക്കൊപ്പമുണ്ടായിരുന്നു.
‘ഗ്രേറ്റ്ഫാദർ പുതിയ വിജയഗാഥകൾ രചിക്കുന്നുവെന്ന് അറിയുന്നതിൽ വളരെ സന്തോഷം. ഈ വിജയം നിങ്ങളോടൊപ്പമാണ് ഞങ്ങൾ ആഘോഷിക്കുന്നത്. ഈ സിനിമയെ കണ്ട് അതിനെ പ്രോത്സാഹിപ്പിച്ച് വലിയ വിജയമാക്കുകയും പുതിയ വിജയചരിത്രമുണ്ടാക്കുകയും ചെയ്ത പ്രേക്ഷകർക്ക് നന്ദി. ഈ സിനിമയുടെ പിന്നിൽ കഷ്ടപ്പെട്ട് പ്രവർത്തിച്ച ഒരുപാട് സാങ്കേതിവിദഗ്ധരുണ്ട്. അവരുടെ പേരിലും ഞാൻ നന്ദി പറയുന്നു.’–മമ്മൂട്ടി പറഞ്ഞു.
‘മമ്മൂക്കയുടെ കരിയറിലെ ഗ്രേറ്റ് വിക്ടറിയായി മാറിയ സിനിമ നിർമിക്കാൻ കഴിഞ്ഞത് തന്റെ ഭാഗ്യമായി കാണുന്നുവെന്ന് ഗ്രേറ്റ്ഫാദറിന്റെ നിർമാതാക്കളിലൊരാളായ ഷാജി നടേശൻ പറഞ്ഞു. സിനിമ പറയുന്ന പ്രമേയം വളരെ വലുതാണെങ്കിലും ചെറിയ സിനിമയായാണ് ഗ്രേറ്റ്ഫാദർ ഒരുക്കിയത്. വളരെ ചെറിയ ബഡ്ജറ്റിലാണ് സിനിമ ചെയ്തത്. ഈ സിനിമ ഇത്രയും വലിയ വിജയമാകുമെന്ന് ഞങ്ങളാരും വിചാരിച്ചിരുന്നില്ല. പ്രേക്ഷകരുടെ അത്ഭുതകരമായ പിന്തുണയാണ് സിനിമയുടെ വിജയത്തിന് കാരണം.
മമ്മൂക്ക ഭയങ്കര ദേഷ്യക്കാരനാണോ എന്നും കൂടെ അഭിനയിച്ചപ്പോൾ പേടി ഉണ്ടായിരുന്നോ എന്നും ഒരുപാട് പേർ ചോദിച്ചിരുന്നെന്ന് ആര്യ പറഞ്ഞു. അതൊക്കെ വെറുതെയാണെന്നും അഭിനയത്തിൽ ഒരുപാട് പിന്തുണച്ചെന്നും ആര്യ പറയുന്നു. അദ്ദേഹത്തിൽ നിന്നും ഒരുപാട് കാര്യങ്ങൾ പഠിക്കാനായെന്നും ആര്യ വ്യക്തമാക്കി.