ബാഹുബലി, ആർആർആർ ഛായാഗ്രാഹകന്റെ ഭാര്യ അന്തരിച്ചു

പ്രശസ്ത ഛായാഗ്രാഹകന്‍ കെ.കെ. സെന്തില്‍ കുമാറിന്‍റെ ഭാര്യ റൂഹി (റുഹീനാസ്) അന്തരിച്ചു. െസക്കന്തരബാദിലെ കിംസ് ആശുപത്രിയിലായിരുന്നു അന്ത്യം. നിരവധി ആരോഗ്യ പ്രശ്നങ്ങളെ തുടര്‍ന്ന് ദീര്‍ഘകാലമായി ചികില്‍സയിലായിരുന്നു. സംസ്കാരം ഹൈദരാബാദിലെ ജൂബിലി ഹില്‍സില്‍ വച്ച് നടന്നു.

യോഗ പരിശീലകയായിരുന്ന റൂഹി 2009 ലാണ് ഛായാഗ്രാഹകനായ സെന്തിലിനെ വിവാഹം കഴിച്ചത്. ഇരുവർക്കും രണ്ട് ആൺകുട്ടികളാണ്. പ്രഭാസ്, അനുഷ്ക, ഇലിയാന തുടങ്ങി നിരവധി താരങ്ങളുടെ യോഗ പരിശീലകയായിരുന്നു റൂഹി.

ഒരു സുഹൃത്തു വഴിയാണ് സെന്തിലും റൂഹിയും പരിചയപ്പെടുന്നത്. തുടർന്ന് സൗഹൃദത്തിലാകുകയും അത് വിവാഹത്തിലെത്തുകയുമായിരുന്നു. സമൂഹ മാധ്യമങ്ങളിലും നിരവധി ഫോളോവേഴ്സുള്ള യോഗ പരിശീലകയായിരുന്നു റൂഹി.

എസ്.എസ്. രാജമൗലിക്കൊപ്പം വർഷങ്ങളായി സെന്തിൽ കുമാർ ഒന്നിച്ചു പ്രവർത്തിക്കുന്നുണ്ട്. ബാഹുബലി, ബാഹുബലി: ദ് കൺക്ലൂഷൻ, മഗധീര, യമദോംഗ, അരുന്ധതി, ഈഗ, ഛത്രപതി, സൈ എന്നിവയുൾപ്പെടെ നിരവധി പ്രോജക്ടുകളിൽ അവർ ഒരുമിച്ച് പ്രവർത്തിച്ചു. ആര്‍ആര്‍ആറിന് വേണ്ടിയാണ് ഇരുവരും അവസാനമായി ഒന്നിച്ചു പ്രവര്‍ത്തിച്ചത്.