സിനിമയ്ക്കുള്ളിലെ സിനിമയുടെ കഥ പറയുന്ന ചിത്രങ്ങളിൽ അവസാനത്തേതാണ് റോസാപ്പൂ. വെറും സിനിമയുടെയല്ല, ‘ഇക്കിളി സിനിമയുടെ’ കഥ പറയുന്ന സിനിമ. ചിരിയിൽ ചാലിച്ച് ഒരുക്കിയിരിക്കുന്ന ചിത്രം ചില നല്ല സന്ദേശങ്ങളും കാഴ്ചക്കാരനു നൽകുന്നു.
2000–ൽ നടക്കുന്ന കഥയാണ് ചിത്രം പറയുന്നത്. നാട്ടുകാരോട് മൊത്തം കടംവാങ്ങി ഒരു ഗതിയുമില്ലാതെ നടക്കുന്ന ആളാണ് ഷാജഹാൻ. ഫോർട്ട്കൊച്ചിയിൽ ചെറിയൊരു കടയുണ്ട്. സംവിധായകനാകുന്നതു സ്വപ്നം കണ്ടു നടക്കുന്ന ആംബ്രോസും വട്ട് ഐഡിയയുമായി കൂട്ടുകാരെ പറ്റിക്കുന്ന ഭാനുവുമാണ് ഷാജഹാന്റെ ഉറ്റചങ്ങാതിമാർ.
Rosapoo - Official Malayalam Teaser | Biju Menon | Vinu Joseph | Shibu Thameens | Neeraj
ചന്ദനത്തിരിയിൽ തുടങ്ങി മുട്ടക്കച്ചവടം വരെ നടത്തി കട പൂട്ടിയതോടെ ഷാജഹാന് ഇനി കൈവയ്ക്കാൻ മേഖലകളൊന്നും ഇല്ലാതായി. അങ്ങനെയാണ് സിനിമ നിർമിച്ചാല് കോടികളുണ്ടാക്കാമെന്ന ബുദ്ധി തലയിൽ ഉദിക്കുന്നത്. സാദാ സിനിമയല്ല, ഇക്കിളിസിനിമ. അങ്ങനെ വീണ്ടും ആൾക്കാരെ പറ്റിച്ച് കടംവാങ്ങി ലൈല എന്ന ഗ്ലാമർ നടിയെ വെച്ച് സിനിമയെടുക്കാൻ ഷാജഹാനും കൂട്ടരും ചെന്നൈയ്ക്കു വണ്ടി കയറുന്നു. ഇവർക്കു സിനിമയെടുക്കാൻ സാധിക്കുമോ, അതോ അവിടെയും ഷാജഹാന്റെ പെട്ടി പൂട്ടുമോ? ഇതിനുള്ള ഉത്തരമാണ് റോസാപ്പൂ.
![rosapoo-teaser rosapoo-teaser](https://img-mm.manoramaonline.com/content/dam/mm/ml/movies/movie-news/images/2017/12/6/rosapoo-teaser.jpg.image.470.246.jpg)
ചതിയും ഗ്ലാമറും നിറഞ്ഞ സിനിമാലോകത്തിന്റെ ഉള്ളറകൾ ഹാസ്യാത്മകമായി തുറന്നുകാണിക്കുന്നുണ്ട് ചിത്രത്തിലൂടെ. നായികമാരുടെ ദുരവസ്ഥയും അവരുടെ അതിജീവനവുമൊക്കെ ചിത്രത്തിലൂടെ പറഞ്ഞുപോകുന്നു. തട്ടിപ്പുകാരനായ ഷാജഹാനായി ബിജു മേനോൻ മികച്ച പ്രകടനം കാഴ്ചവെച്ചു. സമീപകാല സിനിമകളിലെ സ്ഥിരം കഥാപാത്രങ്ങളുമായി സാമ്യം തോന്നുന്നതാണ് അദ്ദേഹത്തിന്റെ വേഷം. ആംബ്രോസായി നീരജ് മാധവും കയ്യടി നേടുന്നു. ഗ്ലാമർ പ്രകടനത്തിന് പുറമെ ഹാസ്യരംഗങ്ങളിലും അഞ്ജലി രശ്മിയായി തിളങ്ങി.
ചിത്രത്തിന്റെ കഥയും തിരക്കഥയും സംവിധാനവും വിനു ജോസഫ് ആണ് നിർവഹിച്ചിരിക്കുന്നത്. സിനിമയിലെ നടിമാർക്ക് സമർപ്പിച്ചാണ് ചിത്രം ആരംഭിക്കുന്നതു തന്നെ. നടിമാർക്കു നേരെയുണ്ടാകുന്ന ആക്രമണങ്ങളെയും മറ്റും ചിത്രത്തിന്റെ പ്രമേയവുമായി ചേർത്ത് അവതരിപ്പിച്ചിരിക്കുന്നു. അവതരണത്തിൽ കുറച്ചുകൂടി പുതുമ കൊണ്ടുവരാമായിരുന്നെന്ന് തോന്നി.
സംഭാഷണം സന്തോഷ് ഏച്ചിക്കാനം. ജെബിൻ ജേക്കബിന്റെ ഛായാഗ്രഹണവും വിവേക് ഹർഷന്റെ ചിത്രസംയോജനവും നീതിപുലർത്തി.
സുഷിൻ ശ്യാമിന്റെ സംഗീതം സിനിമയോട് ഇഴചേർന്ന് നിന്നു. 2000–ന്റെ തുടക്കഘട്ടം പാളിച്ചകൾ കൂടാതെ പുനഃസൃഷ്ടിച്ച വിനേഷ് ബംഗ്ലന്റെ കലാസംവിധാനം എടുത്തുപറയേണ്ടതാണ്. കാലത്തിന് അനുസരിച്ചുളള സ്റ്റെഫി സേവ്യറുടെ വസ്ത്രാലങ്കാരവും മികവുപുലർത്തി.
ഒരുപിടി മികച്ച താരങ്ങളുടെ സാന്നിധ്യമാണ് റോസാപ്പൂവിന്റെ മറ്റൊരു ആകർഷണം. പ്രൊഡക്ഷൻ കൺട്രോളർ സജീർ ആയി സൗബിൻ തകർത്ത് അഭിനയിച്ചു. ബേസിൽ ജോസഫ്, സുധീർ കരമന, വിജയരാഘവൻ, അലൻസിയർ, ദിലീഷ് പോത്തൻ, സലിം കുമാർ എന്നിവർ പ്രേക്ഷകരിൽ ചിരിപടർത്തും. ചില പാകപ്പിഴകളുണ്ടെങ്കിലും റോസാപ്പൂ പ്രേക്ഷകനെ കാര്യമായി ബോറടിപ്പിക്കില്ല.