ദുൽക്കർ സൽമാനും ഇഷ തൽവാറും ചിത്രങ്ങൾ: റിങ്കുരാജ് മട്ടാഞ്ചേരിയിൽ
മഴവിൽ മനോരമയ്ക്കു വേണ്ടി അഭിനേതാക്കളുടെ സംഘടനയായ അമ്മ, കാര്യവട്ടം രാജ്യാന്തര സ്റ്റേഡിയത്തിൽ സംഘടിപ്പിച്ച അമ്മ മഴവില്ല് എന്ന സൂപ്പർ മെഗാഷോയിൽ ദുൽക്കർ സൽമാന്റെ ഗംഭീര നൃത്തം. ചടുലമായ ചുവടുകളുമായി ദുൽക്കർ കളം നിറഞ്ഞപ്പോൾ ആരാധകരും ആസ്വാദകരും അവേശത്തിൽ ആറാടി.
ചിത്രങ്ങൾ: റിങ്കുരാജ് മട്ടാഞ്ചേരിയിൽ
ഇത് ആദ്യമായാണ് ഒരു സ്റ്റേജ് ഷോയിൽ ദുൽക്കർ നൃത്തം അവതരിപ്പിക്കുന്നത്. എന്നാൽ ആദ്യ വേദിയുടെ പതർച്ചകളേതുമില്ലാതെ മലയാളത്തിന്റെ പ്രിയ യുവതാരം പരിപാടി ഗംഭീരമാക്കി. ഹണി ബീ 2–വിലെ ‘ചേമന്തി ചേലും കൊണ്ടേ’ എന്ന ഗാനത്തിന് ചുവടു വച്ചാണ് ദുൽക്കർ നൃത്തം ആരംഭിച്ചത്. പിന്നാലെ മെർസൽ, ചാർലി, സഖറിയയുടെ ഗർഭിണികൾ, റെമോ തുടങ്ങിയ ചിത്രങ്ങളിലെ ഗാനങ്ങൾക്കായി താരം നൃത്തം ചെയ്തു.
വെള്ളത്തൊപ്പി വച്ച് വെള്ള ടീ ഷർട്ടും കറുത്ത ജീൻസും വെള്ള ഷൂസുമണിഞ്ഞ് സ്റ്റൈലൻ ലുക്കിലാണ് ദുൽക്കർ എത്തിയത്. നടിമാരായ ഇഷ തൽവാറും മൈഥിലിയും പരിപാടിയുടെ ചില ഭാഗങ്ങളിൽ താരത്തിനൊപ്പം ചുവടു വച്ചു. പ്രസന്ന മാസ്റ്റർ ഒരുക്കിയ നൃത്തം ആരാധകർക്ക് വലിയൊരു വിരുന്നായിരുന്നു. പല സമയത്തും സ്ത്രീകൾ ഉൾപ്പടെയുള്ള ആരാധകർ ഇരിപ്പിടങ്ങളിൽ നിന്ന് എഴുന്നേറ്റു നിന്ന് തങ്ങളുടെ ആവേശം പങ്കു വച്ചു. മമ്മൂട്ടിക്കും മോഹൻലാലിനും കിട്ടിയ അതേ കയ്യടിയും ഹർഷാരവവും യുവതാരമായ ദുൽക്കറിനും ലഭിച്ചത് അദ്ദേഹത്തിന്റെ ജനപിന്തുണയെ അടയാളപ്പെടുത്തുന്നതായി.
ചിത്രങ്ങൾ: റിങ്കുരാജ് മട്ടാഞ്ചേരിയിൽ
