‘എന്റെ അനിയത്തിയുടെ മകൾ’; രാധിക തിലകിന്റെ മകളുടെ വിവാഹ വിശേഷം പങ്കിട്ട് സുജാത

അന്തരിച്ച ഗായിക രാധിക തിലകിന്റെ മകള്‍ ദേവികയുടെ വിവാഹ ചിത്രങ്ങൾ പങ്കുവച്ച് ഗായിക സുജാത മോഹൻ. വിവാഹവേദിയിൽ നിന്നുള്ള അതിമനോഹര ദൃശ്യങ്ങളാണ് ഗായിക സമൂഹമാധ്യമങ്ങളിൽ പോസ്റ്റ് ചെയ്തിരിക്കുന്നത്.

‘എന്റെ പ്രിയപ്പെട്ട രാധികയുടെ മകള്‍. ഈ നവദമ്പതികളെ നിങ്ങൾ ആശീർവദിക്കൂ’ എന്ന അടിക്കുറിപ്പോടെയാണ് സുജാതയുടെ പോസ്റ്റ്. ചിത്രങ്ങൾ ഇതിനകം വൈറലായിക്കഴിഞ്ഞു. 

സുജാത മോഹന്‍ കുടുംബസമേതം ദേവികയുടെ വിവാഹത്തില്‍ പങ്കെടുക്കാനെത്തിയിരുന്നു.

വിവാഹ ചടങ്ങുകൾ നടക്കുന്നതിനിടെ സുജാതയും മകൾ ശ്വേതയും ഒരുമിച്ച് പ്രാർഥനാമംഗള ഗാനം ആലപിച്ചതു ശ്രദ്ധേയമായി. രാധിക തിലകിന്റെ വളരെ അടുത്ത ബന്ധുവാണ് സുജാത.

അനിയത്തിയുടെ അപ്രതീക്ഷിത വേർപാട് ഏൽപ്പിച്ച ആഘാതത്തിൽ നിന്നും താനും കുടുംബവും ഇപ്പോഴും കരകയറിയിട്ടില്ലെന്നു വിതുമ്പലോടെ ഗായിക പൊതുവേദിയിലുൾപ്പെടെ പറഞ്ഞിട്ടുണ്ട്. 

തിങ്കളാഴ്ച ബെംഗളൂരുവിൽ വച്ചായിരുന്നു ദേവികയുടെ വിവാഹം. ബെംഗളൂരു സ്വദേശിയായ അരവിന്ദ് സുചിന്ദ്രൻ ആണ് വരൻ.

അടുത്ത ബന്ധുക്കളും സുഹൃത്തുക്കളും വിവാഹത്തില്‍ പങ്കെടുത്തു. ബെംഗളൂരു സ്വദേശികളായ വത്സല–സുചിന്ദ്രൻ ദമ്പതികളുടെ മകനായ അരവിന്ദ്, അഭിഭാഷകനാണ്. ദേവികയും ബെംഗളൂരുവിലാണ് ജോലി ചെയ്യുന്നത്. ഗായികയായും മികവ് തെളിയിച്ചിട്ടുണ്ട് ദേവിക. 

ഈ മാസം 25ന് എറണാകുളം എളമക്കരയിലെ ഭാസ്കരീയം കൺവെൻഷൻ സെന്ററിൽ വച്ചാണ് വിവാഹത്തോടനുബന്ധിച്ചുള്ള മറ്റു ചടങ്ങുകള്‍ നടക്കുകയെന്ന് ദേവികയുടെ പിതാവ് സുരേഷ് കൃഷ്ണൻ മനോരമ ഓൺലൈനിനോടു പറഞ്ഞു.