മനു രമേശിന്റെ ഈണത്തിൽ അമ്പട ഞാനേ‍...; ലിറിക്കൽ വിഡിയോയുമായി ‘ഞാൻ കണ്ടതാ സാറേ’

ഇന്ദ്രജിത്തിനെ കേന്ദ്ര കഥാപാത്രമാക്കി വരുൺ.ജി.പണിക്കർ സംവിധാനം ചെയ്യുന്ന ‘ഞാൻ കണ്ടതാ സാറേ’ എന്ന ചിത്രത്തിലെ പുതിയ ഗാനം പ്രേക്ഷകർക്കരികിൽ. ‘അമ്പട ഞാനേ‍...’ എന്നു തുടങ്ങുന്ന പാട്ടിന്റെ ലിറിക്കൽ വിഡിയോ ആണ് അണിയറപ്രവർത്തകർ പുറത്തിറക്കിയത്. ആർജെ കാർത്തിക് പാട്ടിനു വരികൾ കുറിച്ചു. മനു രമേശൻ ഈണമൊരുക്കിയ ഗാനം നിരഞ്ജ് സുരേഷ് ആണ് ആലപിച്ചത്. 

മനോരമ മ്യൂസിക് പുറത്തിറക്കിയ ‘അമ്പട ഞാനേ‍...’ ചുരുങ്ങിയ സമയത്തിനകം ശ്രദ്ധേയമായിക്കഴിഞ്ഞു. മികച്ച പ്രതികരണങ്ങളും ലഭിക്കുന്നുണ്ട്. അശ്വിൻ രഞ്ജു ആണ് ഓഡിയോ പ്രൊഡക്‌ഷൻ നിർവഹിച്ചത്. അമൽ മിഥു റെക്കോർഡിങ്ങും സജി.ആർ മിക്സിങ്ങും മാസ്റ്ററിങ്ങും നിർവഹിച്ചു. 

പ്രിയദർശന്റെ സഹ സംവിധായകനായിരുന്ന വരുൺ.ജി.പണിക്കർ സ്വതന്ത്ര സംവിധായകനാകുന്ന ചിത്രമാണ് ‘ഞാൻ കണ്ടതാ സാറേ’. ഹൈലൈൻ പിക്ചേഴ്സിന്റെ ബാനറിൽ പ്രകാശ് ഹൈലൈനും അമീർ അബ്ദുൾ അസീസും ചേർന്നു ചിത്രം നിർമിക്കുന്നു. ദീപു കരുണാകരനാണ് കോ-പ്രൊഡ്യൂസർ.

ഹ്യൂമർ ത്രില്ലർ ജോണറിൽ അവതരിപ്പിക്കുന്ന ഈ ചിത്രത്തിൽ അനൂപ് മേനോൻ, ബൈജു സന്തോഷ്, എന്നിവരും പ്രധാന വേഷങ്ങളിലുണ്ട്. മെറീനാ മൈക്കിൾ, സുധീർ കരമന, അബ്ദുൾ സമദ്, സാബുമോൻ, അർജുൻ നന്ദകുമാർ, ബിനോജ് കുളത്തൂർ ദീപു കരുണാകരൻ, സംവിധായകൻ - സുരേഷ് കൃഷ്ണ, അലൻസിയർ, ബിജു പപ്പൻ, ബാലാജി ശർമ, സന്തോഷ് ദാമോദരൻ, അജിത് ധന്വന്തിരി, മല്ലിക സുകുമാരൻ, പാർവതി അരുൺ, അഞ്ജനാ അപ്പുക്കുട്ടൻ തുടങ്ങിയവരാണ് മറ്റു താരങ്ങൾ. നവംബർ 22ന് ചിത്രം പ്രദർശനത്തിനെത്തും.