മൂന്നാമതും വിവാഹമോചിതയായി ബ്രിട്നി; പിറന്നാൾ ദിനത്തിൽ ഔദ്യോഗിക പ്രഖ്യാപനം

മൂന്നാം വിവാഹബന്ധവും നിയമപരമായി അവസാനിപ്പിച്ച് ഗായിക ബ്രിട്നി സ്പിയേഴ്സ്. നടനും മോഡലുമായ സാം അസ്ഖാരിയുമായി വേർപിരിഞ്ഞതായി ഗായിക ഔദ്യോഗികമായി അറിയിച്ചു. 43ാം ജന്മദിനത്തിലാണ് ബ്രിട്ട്നി ഇക്കാര്യം പ്രഖ്യാപിച്ചത്. ഈ വർഷം മേയിലാണ് ബ്രിട്നിയും സാം അസ്ഖാരിയും വേർപിരിയുന്നുവെന്ന വിവരം പുറത്തുവന്നത്. ഇപ്പോൾ ഇരുവരും നിയമനടപടികൾ പൂർത്തിയാക്കിയിരിക്കുകയാണ്. 

6 വർഷത്തെ പ്രണയത്തിനൊടുവിൽ 2022 ൽ ആയിരുന്നു ഇറാനിയൻ വംശജനായ സാം അസ്ഖാരിയുമായുള്ള ബ്രിട്നിയുടെ വിവാഹം. ബ്രിട്നിയുടെ മൂന്നാമത്തേയും അസ്ഖാരിയുടെ ആദ്യത്തേയും വിവാഹമായിരുന്നു ഇത്. ഈ ബന്ധത്തി‍ൽ കുട്ടികളില്ല. ബ്രിട്നിയേക്കാൾ 12 വയസ്സിന് ഇളയതാണ് സാം. 

2004 ല്‍ ജേസണ്‍ അലക്‌സാണ്ടറുമായിട്ടാണ് ബ്രിട്നിയുടെ ആദ്യവിവാഹം നടന്നത്. വെറും 55 മണിക്കൂറിനുള്ളില്‍ ആ ബന്ധം വേര്‍പിരിഞ്ഞു. അതേ വര്‍ഷം തന്നെ ഗായകന്‍ കെവിന്‍ ഫെഡെറലിനെ ബ്രിട്നി വിവാഹം ചെയ്തു. ഈ ബന്ധത്തില്‍ രണ്ട് കുട്ടികളുണ്ട്. 2007 ല്‍ ഇരുവരും വേർപിരിഞ്ഞു. പിന്നീടാണ് സാം അസ്ഖാരിയുമായി ബ്രിട്നി പ്രണയത്തിലായതും അത് വിവാഹത്തിലേക്കെത്തിയതും.