ആധാറുമായി 30നകം ബന്ധിപ്പിച്ചില്ലെങ്കിൽ പാൻ അസാധു ?

30 ന് അകം ആധാറുമായി പാൻ കാർഡ് ബന്ധിപ്പിച്ചില്ലെങ്കിൽ എന്തു സംഭവിക്കും? എല്ലാ സംശയങ്ങൾക്കും ഉത്തരമിതാ... ആദായനികുതി നിയമത്തിലെ വകുപ്പ് 139 എഎ പ്രകാരം, 2017 ജൂലൈ 1 മുതൽ ആധാർ കാർഡ് ലഭിക്കാൻ അർഹതയുള്ള എല്ലാവരും പാൻ (പെർമനന്റ് അക്കൗണ്ട് നമ്പർ) അപേക്ഷിക്കുമ്പോഴോ ആദായനികുതി റിട്ടേൺ നൽകുമ്പോഴോ അവരുടെ ആധാർ നമ്പർ നൽക്കേണ്ടതു നിർബന്ധമാണ്.

തുടക്കത്തിൽ, പിഴ ഇല്ലാതെ (പെർമനന്റ് അക്കൗണ്ട് നമ്പർ) പാൻ-ആധാർ ബന്ധിപ്പിക്കുന്നതിനുള്ള സമയപരിധി 2022 മാർച്ച് 31 ആയിരുന്നു. എന്നിരുന്നാലും, ഗവൺമെന്റ് ഈ സമയപരിധി 2023 മാർച്ച് 31 വരെ നീട്ടി. എന്നാൽ നീട്ടിയസമയത്തിന് 1000 രൂപ പിഴ ചുമത്തി. ഇപ്പോൾ സമയപരിധി വീണ്ടും ജൂൺ 30 വരെ നീട്ടി. ഈ പുതുക്കിയ സമയപരിധിക്കുള്ളിൽ വ്യക്തികൾ 1000 രൂപ പിഴയോടെ പാൻ ആധാറുമായി ബന്ധിപ്പിച്ചില്ലെങ്കിൽ പാൻ അസാധുവാകും. ചുരുക്കത്തിൽ ബന്ധിപ്പിക്കാത്തവരുടെ പാൻ 2023 ജൂലൈ 1 മുതൽ പ്രവർത്തനരഹിതമാകും.

1.ആധാർ-പാൻ ബന്ധിപ്പിക്കുന്നതിൽ നിന്ന് ഒഴിവാക്കപ്പെട്ടവർ ആരെല്ലാം?

താഴെപ്പറയുന്ന വ്യക്തികൾ അവരുടെ പാൻ ആധാറുമായി ബന്ധിപ്പിക്കേണ്ടതില്ല.

‌∙ 80 വയസ്സോ അതിൽ കൂടുതലോ ഉള്ള വ്യക്തികൾ

∙ ആദായനികുതി നിയമം അനുസരിച്ചുള്ള പ്രവാസികൾ (നോൺ റെസിഡന്റ്)

∙ ഇന്ത്യൻ പൗരന്മാരല്ലാത്തവർ.

2. പാൻ, ആധാർ എന്നിവ കൈവശമുള്ള പ്രായപൂർത്തിയാകാത്തവർക്ക് പാൻ, ആധാർ ബന്ധിപ്പിക്കേണ്ടത് നിർബന്ധമാണോ?

∙ സാധുവായ പാനും ആധാറും ഉള്ള ഓരോ ഉപയോക്താവും അവരുടെ ആധാറിനെ പാനുമായി ബന്ധിപ്പിക്കേണ്ടതുണ്ട്.

3. പാൻ പ്രവർത്തനരഹിതമായാൽ എന്തുചെയ്യണം?

∙ 1000 രൂപ ഫീസ് അടച്ച്‌ നിങ്ങളുടെ പാൻ ആധാറുമായി ബന്ധിപ്പിച്ചാൽ പാൻ സാധുവാകും.

4. ആധാറിലും പാനിലും പേര്/ ജനന തീയതി/ ലിംഗം എന്നിവയിൽ പൊരുത്തക്കേട് ഉള്ളതിനാൽ ആധാർ പാൻ-മായി ലിങ്ക് ചെയ്യാൻ കഴിയുന്നില്ല. എന്ത് ചെയ്യണം?

∙ പാൻ അല്ലെങ്കിൽ ആധാർ ഇവയിൽ ഏതിലെയാണോ വിശദാംശങ്ങൾ തെറ്റ് എന്നു മനസ്സിലാക്കി അത് ആദ്യം ശരിയാക്കുക. അതിനു ശേഷം ഇവ തമ്മിൽ ബന്ധിപ്പിക്കുക

5. പാൻ ആധാറുമായി ലിങ്ക് ചെയ്തില്ലെങ്കിൽ എന്ത് സംഭവിക്കും ?

∙ നികുതി റീഫണ്ട് ലഭിക്കില്ല.

∙ റീഫണ്ടിന് പാൻ പ്രവർത്തനരഹിതമായി തുടരുന്ന കാലയളവിൽ പലിശ ലഭിക്കില്ല.

∙ പരമാവധി നിരക്കിൽ സ്രോതസ്സിൽ നികുതി കിഴിവ് (ടിഡിഎസ്) അഥവാ സ്രോതസ്സിൽ നികുതി ശേഖരിക്കും (ടിസിഎസ്).

6. പാൻ അസാധുവായാലുള്ള അനന്തരഫലങ്ങൾ എന്തൊക്കെ?

∙ സാമ്പത്തിക ഇടപാടുകൾക്കോ ഔദ്യോഗിക ആവശ്യങ്ങൾക്കോ ഇത് ഉപയോഗിക്കാനാവില്ല.

∙ ആദായനികുതി റിട്ടേണുകൾ ഫയൽ ചെയ്യാനാവില്ല.

∙ ആദായനികുതി നിയമത്തിലെ കിഴിവുകളും ഇളവുകളും നഷ്‌ടപ്പെടും. ഇത് ഉയർന്ന നികുതി ബാധ്യത വരുത്താം.

∙ ബാങ്കുകളിലും മറ്റു ധനകാര്യ സ്ഥാപനങ്ങളിലും പുതിയ അക്കൗണ്ടുകൾ തുറക്കുന്നതിനു ബുദ്ധിമുട്ടു നേരിടാം.

∙ വായ്പകളും ക്രെഡിറ്റ് കാർഡുകളും നേടുന്നതിനു ബുദ്ധിമുട്ടു നേരിടാം.

∙ പാൻ നിർബന്ധമാക്കിയ നിർദിഷ്ട സാമ്പത്തിക ഇടപാടുകൾ നടത്താൻ ബുദ്ധിമുട്ടുകൾ നേരിടേണ്ടി വന്നേക്കാം.

7. പാൻ ആധാറുമായി ലിങ്ക് ചെയ്തിട്ടുണ്ടോ എന്നറിയാൻ എന്ത് ചെയ്യണം?

∙ ആദായനികുതി വകുപ്പിന്റെ https://eportal.incometax.gov.in/iec/foservices/#/pre-login/bl-link-aadhaar എന്ന പോർട്ടൽ എടുക്കുക.

∙ നിങ്ങളുടെ പാൻ, ആധാർ വിശദാംശങ്ങൾ നൽകുക.

∙ അതിനുശേഷം വാലിഡേറ്റ് ബട്ടണിൽ ക്ലിക്ക് ചെയ്താൽ ഇവ രണ്ടും ബന്ധിപ്പിച്ചിട്ടുണ്ടെങ്കിൽ, അത് കാണിക്കും.

∙ അല്ലാത്തപക്ഷം 1,000 രൂപ അടച്ച് നിങ്ങളുടെ പാൻ, ആധാർ നമ്പർ നൽകി വിവരങ്ങൾ സാധൂകരിക്കുക.