കൂടുതൽ സംവരണം, ജാതി സെൻസസ്, സൗജന്യ‌ ചികിത്സ; 10 വാഗ്ദാനങ്ങളുമായി കോൺഗ്രസ്

ബെംഗളൂരു∙ കോൺഗ്രസ് അധികാരത്തിലെത്തിയാൽ പട്ടിക ജാതി, വർഗ, മറ്റു പിന്നാക്ക വിഭാഗങ്ങളുടെ സംവരണം 50 ശതമാനത്തിൽ നിന്ന് ഉയർത്താൻ ഭരണഘടന ഭേദഗതി കൊണ്ടുവരുമെന്നത് ഉൾപ്പെടെ 10 പദ്ധതികൾ കോൺഗ്രസ് ദേശീയ അധ്യക്ഷൻ മല്ലികാർജുൻ ഖർഗെ ബെംഗളൂരുവിൽ പ്രഖ്യാപിച്ചു. മറ്റുവാഗ്ദാനങ്ങൾ:

ശ്രമിക് ന്യായ് ഗ്യാരന്റി 

(തൊഴിലാളി ക്ഷേമം)

∙ മരുന്ന്, ചികിത്സ, പരിശോധന, പുനരധിവാസം, സാന്ത്വന ചികിത്സ, ശസ്ത്രക്രിയ എന്നിവ സൗജന്യമാക്കാൻ ആരോഗ്യ അവകാശ നിയമം.

∙ ദേശീയ തൊഴിലുറപ്പ് പദ്ധതിയിൽ കുറഞ്ഞ പ്രതിദിന വേതനം 400 രൂപയാക്കും.

∙ നഗരമേഖലകളിൽ തൊഴിൽ ഉറപ്പാക്കാൻ പ്രത്യേക നിയമം. കാലാവസ്ഥാ വ്യതിയാന പ്രതിരോധം, സാമൂഹിക സേവനം, അടിസ്ഥാന സൗകര്യവികസനം എന്നീ മേഖലകളിലാകും ജോലികൾ.

∙ അസംഘടിത മേഖലയിലെ തൊഴിലാളികൾക്കും ആരോഗ്യ, അപകട ഇൻഷുറൻസ് ഉൾപ്പെടെ സമഗ്ര സാമൂഹിക സുരക്ഷ.

∙  മോദി സർക്കാരിന്റെ തൊഴിലാളി വിരുദ്ധ ചട്ടങ്ങൾ പുനഃപരിശോധിക്കും. തൊഴിൽ നിയമം ശക്തമാക്കാൻ ഭേദഗതി കൊണ്ടുവരും. സർക്കാർ മേഖലയിൽ സ്ഥിര നിയമനങ്ങൾ പ്രോത്സാഹിപ്പിക്കുന്നതിന്റെ ഭാഗമായി കരാർ തൊഴിലാളികളുടെ എണ്ണം കുറയ്ക്കും.

ഹിസേദാരി ന്യായ് ഗ്യാരന്റി (സാമൂഹിക നീതി)

∙ സാമൂഹികമായും സാമ്പത്തികമായും പിന്നാക്കം നിൽക്കുന്നവരുടെ പ്രാതിനിധ്യം ഭരണസ്ഥാപനങ്ങളിൽ ഉൾപ്പെടെ ഉയർത്താൻ ജാതി സെൻസസ് നടത്തും.‌

∙ പട്ടിക വിഭാഗങ്ങൾക്ക് ജനസംഖ്യയ്ക്കു അനുസരിച്ച് ബജറ്റ് വിഹിതം അനുവദിക്കുന്ന നയം പുനഃസ്ഥാപിക്കും. 1970ൽ ഇന്ദിരാഗാന്ധി സർക്കാർ കൊണ്ടുവന്ന നയം 2014ൽ മോദി സർക്കാർ റദ്ദാക്കുകയായിരുന്നു.

∙ ആദിവാസികളുടെ വനഭൂമി അവകാശങ്ങൾക്കു സംരക്ഷണം നൽകും. അധികാരത്തിലേറി ഒരു വർഷത്തിനകം ഇതുമായി ബന്ധപ്പെട്ട കേസുകൾ തീർപ്പാക്കും. നേരത്തേ തള്ളിയ കേസുകൾ 6 മാസത്തിനകം പുനരവലോകനം ചെയ്യും. വനഉൽപന്നങ്ങൾക്കു മിനിമം താങ്ങുവില ഉറപ്പാക്കും.

∙ ആദിവാസികളുടെ സ്വയംഭരണ, പരമ്പരാഗത, സാംസ്കാരിക അവകാശങ്ങൾ സംരക്ഷിക്കും.