പരിശോധന ഒരു വഴിക്ക്, ‘അഭ്യാസം’ പല വഴിക്ക്; ഗ്യാപ് റോഡിൽ തമിഴ്നാട് റജിസ്ട്രേഷൻ ജീപ്പിൽ യുവാവിന്റെ അഭ്യാസപ്രകടനം

മൂന്നാർ ∙ മോട്ടർ വാഹന വകുപ്പിന്റെ പരിശോധന കർശനമായി നടക്കുന്നതിനിടയിലും വീണ്ടും ഗ്യാപ് റോഡിൽ, ഓടുന്ന ജീപ്പിൽ യുവാവിന്റെ അപകടകരമായ യാത്ര. ബുധനാഴ്ച വൈകിട്ടാണു തമിഴ്നാട് റജിസ്ട്രേഷനിലുള്ള വാഹനത്തിൽ യുവാവ് ശരീരം പുറത്തിട്ട് അഭ്യാസപ്രകടനം നടത്തിയത്. പെരിയ കനാൽ - ഗ്യാപ് റോഡിലായിരുന്നു സംഭവം.  നിയമലംഘനം കണ്ടെത്തുന്നതിനായി മോട്ടർ വാഹന വകുപ്പിന്റെ 2 പ്രത്യേക സ്ക്വാഡുകൾ പരിശോധന നടത്തുന്നതിനിടെയാണ് ‘അഭ്യാസം’ ആവർത്തിച്ചത്.

4 പേരാണു വാഹനത്തിലുണ്ടായിരുന്നത്. നേരിട്ടു ഹാജരാകാൻ ആവശ്യപ്പെട്ട് ഉടമയ്ക്കു മോട്ടർ വാഹന വകുപ്പ് എൻഫോഴ്സ്മെന്റ് വിഭാഗം നോട്ടിസ് നൽകി. ഗ്യാപ് റോഡിൽ സമാനമായ നിയമലംഘനം നടത്തിയതിന് ഒരു മാസത്തിനിടെ 6 ഡ്രൈവർമാരുടെ ലൈസൻസ് സസ്പെൻഡ് ചെയ്തിരുന്നു.

∙ ‘ഗ്യാപ് റോഡിൽ അപകടകരമായ യാത്ര ഒഴിവാക്കാൻ സൂചനാബോർഡുകൾ വയ്ക്കണമെന്നാവശ്യപ്പെട്ടു ദേശീയപാത അതോറിറ്റിക്കു കത്തു നൽകിയിട്ടുണ്ട്.’ - കെ.കെ.രാജീവ്, ഇടുക്കി എൻഫോഴ്സ്മെന്റ് ആർടിഒ