സീപ്ലെയ്ൻ: എൽഡിഎഫ് ചർച്ച ചെയ്യണമെന്ന് സിപിഐ

തിരുവനന്തപുരം∙ ഇടതുമുന്നണിയിൽ ചർച്ചചെയ്തു മാത്രമേ സംസ്ഥാനത്ത് സീപ്ലെയ്ൻ സർവീസ് അനുവദിക്കാവൂവെന്ന് സിപിഐ നിലപാടെടുത്തു. സിപിഐ സംസ്ഥാന സെക്രട്ടറി ബിനോയ് വിശ്വം ഇക്കാര്യം മുഖ്യമന്ത്രി പിണറായി വിജയനെ അറിയിച്ചു. പദ്ധതി തള്ളില്ല; പക്ഷേ, വിശദപരിശോധനയും രാഷ്ട്രീയ സമന്വയവും വേണമെന്നാണു സിപിഐ സമീപനം. 

ഉമ്മൻ ചാണ്ടി സർക്കാർ 2013 ൽ സീപ്ലെയ്ൻ സർവീസിനു മുന്നിട്ടിറങ്ങിയപ്പോൾ ഏറ്റവും എതിർത്തത് സിപിഐയും അവരുടെ ട്രേഡ് യൂണിയനുകളുമാണ്. രാഷ്ട്രീയ എതിർപ്പിന്റെ പേരിൽ യുഡിഎഫ് വേണ്ടെന്നു വച്ച പദ്ധതി എൽഡിഎഫ് സർക്കാരിന്റെ കാലത്തു ജീവൻ വച്ചതോടെയാണ് ആശങ്കകൾ നിലനിൽക്കുന്നുവെന്ന സമീപനം സിപിഐ സ്വീകരിക്കുന്നത്. 

ജലാശയങ്ങൾ കേന്ദ്രീകരിച്ച് യുഡിഎഫ് നടപ്പാക്കിയ സീപ്ലെയ്നിനു പകരം ഡാമുകളിൽ നിന്നു ഡാമുകളിലേക്കായാണ് എൽഡിഎഫ് വിഭാവനം ചെയ്യുന്നതെന്നു മന്ത്രി പി.എ.മുഹമ്മദ് റിയാസ് അറിയിച്ചിട്ടുണ്ടെങ്കിലും ഇക്കാര്യത്തിൽ പൂർണ വ്യക്തത വന്നിട്ടില്ല. സിപിഎമ്മിലും വിശദ ചർച്ച നടന്നിട്ടില്ല. മത്സ്യത്തൊഴിലാളി സംഘടനകളും വനംവകുപ്പും ആശങ്കകൾ മുന്നോട്ടുവച്ചിട്ടുണ്ട്.