പ്രതീകാത്മക ചിത്രം.
ന്യൂഡല്‍ഹി∙ സുപ്രീംകോടതിയിലെയും ഹൈക്കോടതികളിലെയും ജഡ്ജിമാർക്ക് രണ്ടു മടങ്ങ് ശമ്പള വർധന. പാർലമെന്റ് പാസാക്കിയ ബില്ലിനു രാഷ്ട്രപതി റാം നാഥ് കോവിന്ദ് അനുമതി നൽകി. സുപ്രീംകോടതി ചീഫ് ജസ്റ്റിസിന് ഇനി 2.80 ലക്ഷം രൂപ ശമ്പളം ലഭിക്കും.; നിലവിൽ ഒരു ലക്ഷമാണ്.
സുപ്രീംകോടതി ജ‍ഡ്ജിമാർക്കും ഹൈക്കോടതി ചീഫ് ജസ്റ്റിസുമാർക്കും 90,000 രൂപയിൽനിന്നു ശമ്പളം 2.50 ലക്ഷമാകും. ഹൈക്കോടതി ജ‍ഡ്ജിമാർക്കു 80,000 രൂപയിൽനിന്ന് 2.25 ലക്ഷമാകും ശമ്പളമെന്നും ബില്ലിൽ പറയുന്നു. പുതുക്കിയ ശമ്പളം 2016 ജനുവരി ഒന്നുമുതല്‍ മുന്‍കാല പ്രാബല്യത്തോടെ ലഭിക്കും.
ശമ്പളത്തിനു പുറമെ ഔദ്യോഗിക വസതി, കാര്‍, ഓഫിസ് ജീവനക്കാര്‍, മറ്റ് അലവന്‍സുകള്‍ എന്നിവയും ചീഫ് ജസ്റ്റിസിനു ലഭിക്കും. സുപ്രീംകോടതിയിലെ മറ്റ് ജഡ്ജിമാര്‍ക്കും ഹൈക്കോടതികളിലെ ചീഫ് ജസ്റ്റിസുമാര്‍ക്കും കാബിനറ്റ് സെക്രട്ടറിമാര്‍ക്കു തുല്യമായ അലവന്‍സുകളും ആനുകൂല്യങ്ങളുമാണു ലഭിക്കുക. ഇക്കാലയളവില്‍ വിരമിച്ച ജഡ്ജിമാര്‍ക്കും ശമ്പള വര്‍ധനവിന്റെ ആനുകൂല്യം ലഭിക്കും.
