ഗുരുതരം അതിർത്തി വെല്ലുവിളി; ചൈനീസ് സേനയെ തുരത്തുമോ പാണ്ഡെയുടെ തന്ത്രം?

അതിർത്തിയിലേക്കുള്ള ഇന്ത്യയുടെ സേനാ നീക്കത്തിനു തടയിടാൻ ലക്ഷ്യമിട്ടുള്ള കടന്നുകയറ്റമാണ് ഡെപ്സങ്ങിൽ ചൈന നടത്തിയിരിക്കുന്നത്. സംഘർഷം ആരംഭിക്കുന്നതിനു മുൻപ് ഇന്ത്യ പതിവായി പട്രോളിങ് നടത്തിയിരുന്ന ഇവിടെ ആധിപത്യം ഉറപ്പിക്കാനാണു ചൈനയുടെ ശ്രമം. ഡിബിഒ താവളത്തിൽനിന്ന് അതിർത്തിയിലേക്കുള്ള റോഡുകളുടെ നിയന്ത്രണം കയ്യടക്കാനും ൈചന ശ്രമിക്കുന്നു. താവളത്തിലേക്കു വിമാനത്തിലെത്തുന്ന ഇന്ത്യൻ സേനാംഗങ്ങളും സന്നാഹങ്ങളും അതിർത്തിയിലെ സംഘർഷ മേഖലകളിലേക്കു റോഡ് മാർഗമെത്തുന്നതു തടയാൻ വേണ്ടിയാണിത്. ഡിബിഒയ്ക്കു പുറമെ സിയാച്ചിനുമായുള്ള ഇന്ത്യയുടെ ബന്ധവും വിച്ഛേദിക്കാൻ ചൈന ലക്ഷ്യമിടുന്നു. 2013ലും ഡെപ്സങ്ങിൽ കടന്നുകയറാൻ ചൈന ശ്രമിച്ചിരുന്നു. നയതന്ത്രതലത്തിൽ നടത്തിയ നീക്കങ്ങൾക്കൊടുവിൽ ഏതാനും ആഴ്ചയ്ക്കുള്ളിൽ ചൈനീസ് സേനയുടെ പിൻമാറ്റം ഉറപ്പാക്കാൻ അന്ന് ഇന്ത്യയ്ക്കു സാധിച്ചു. 

വെല്ലുവിളി 3– ഡെംചോക്

അതിർത്തിയോടു തൊട്ടുചേർന്നുള്ള ന്യോമ ഗ്രാമത്തിലുൾപ്പെട്ട ഡെംചോക്കിലും ചൈനീസ് സേന ഇന്ത്യൻ ഭാഗത്തേക്കു കയറി നിൽക്കുകയാണ്. ഏതാനും വർഷങ്ങളായി ചൈന നിരന്തരം കടന്നുകയറുന്ന സ്ഥലമാണിവിടം. മുൻപ് കടന്നുകയറിയപ്പോഴെല്ലാം അൽപനാൾ കഴിഞ്ഞ് ചൈനീസ് സേന സ്വന്തം സ്ഥലത്തേക്ക് പിൻവാങ്ങിയിരുന്നു. എന്നാൽ, 2020 മേയിൽ അതിക്രമിച്ചു കയറിയ ശേഷം അവിടെത്തന്നെ അവർ നിലയുറപ്പിച്ചു. 

‘പതാക സ്ഥാപിച്ചും ഭീഷണിപ്പെടുത്തിയും കടന്നുകയറ്റം’

ന്യോമ ഗ്രാമത്തിലെ ബ്ലോക്ക് ഡവലപ്മെന്റ് കൗൺസിൽ അധ്യക്ഷയും ഡെംചോക് മുൻ ഗ്രാമമുഖ്യയുമായ യുർഗെയ്ൻ ചൊദോൻ മുൻപ് ‘മനോരമ’യ്ക്കു നൽകിയ അഭിമുഖത്തിൽ ചൈനീസ് കടന്നുകയറ്റത്തെക്കുറിച്ച് വിശദമായി സംസാരിച്ചിരുന്നു. യുർഗ്‌യ്ന്റെ വാക്കുകളിൽ നിന്ന്: ‘2019 ജൂലൈ ആറിന്, ടിബറ്റൻ ആത്മീയാചാര്യൻ ദലൈ ലാമയുടെ ജൻമദിനം ആഘോഷിക്കാൻ ഗ്രാമവാസികൾ ഒത്തുചേർന്ന ഡെംചോക്കിനു സമീപം ഇന്ത്യൻ ഭാഗത്തേക്ക് 6 കിലോമീറ്ററോളം അതിക്രമിച്ചു കയറിയ ചൈനീസ് സംഘം അവിടെ അവരുടെ പതാക സ്ഥാപിച്ചു. ദലൈ ലാമയുടെ ജൻമദിനത്തിൽ ഇന്ത്യയുടെയും ടിബറ്റിന്റെയും ബുദ്ധമതത്തിന്റെയും പതാകകൾ ഉയർത്തുന്നത് ഗ്രാമവാസികളുടെ ആചാരമാണെങ്കിലും ചൈനീസ് സംഘം അതിന് അനുവദിച്ചില്ല. ഗ്രാമവാസികളെ ഭീഷണിപ്പെടുത്തി മടക്കിയയച്ച ശേഷമാണു ചൈനീസ് പതാക ഉയർത്തിയത്. 

2019 മേയിൽ ഇന്ത്യ പൊതു തിരഞ്ഞെടുപ്പിന്റെ തിരക്കുകളിൽ മുഴുകിയപ്പോൾ, അതിർത്തിയോട് ചേർന്നുള്ള ഫുക്ഗാപിനു സമീപം ചൈന അതിവേഗം റോഡ് നിർമാണം നടത്തി. നൂറ്റൻപതോളം ലോറികളും ജെസിബികളുമെത്തിച്ചായിരുന്നു നിർമാണ പ്രവർത്തനം (ഇതിന്റെ വിഡിയോ ദൃശ്യങ്ങൾ രഹസ്യമായി പകർത്തിയ യുർഗെയ്ൻ‌ അതു സമൂഹ മാധ്യമങ്ങളിൽ പങ്കുവച്ചിരുന്നു). 2019 ഡിസംബറിൽ നായ്ക്കളുമായി ഇന്ത്യൻ ഭാഗത്തേക്കെത്തിയ ചൈനീസ് സേനാംഗങ്ങൾ ഗ്രാമവാസികളെ ഭീഷണിപ്പെടുത്തി. അതിർത്തിയോടു ചേർന്ന് ആടുകളെ മേയ്ക്കരുതെന്നും അങ്ങനെ ചെയ്താൽ ബലമായി പിടിച്ചുകൊണ്ടു പോകുമെന്നുമായിരുന്നു ഭീഷണി’ – യുർഗെയ്ൻ അന്നു പറഞ്ഞു. 

സർവ സന്നാഹത്തോടെ ഇന്ത്യ 

നിലവിൽ 2 ലക്ഷത്തോളം സേനാംഗങ്ങളാണ് അതിർത്തി മേഖലകളിൽ ഇന്ത്യയ്ക്കായി കാവൽ നിൽക്കുന്നത്. ഇത്രയും സേനാംഗങ്ങളെ സർവസജ്ജരായി അതിർത്തിയിൽ നിലനിർത്തുക ഏറെ ശ്രമകരമാണെങ്കിലും ചൈനീസ് സേന പൂർണമായി പിൻമാറും വരെ ഒരിഞ്ചു പിന്നോട്ടില്ലെന്നാണ് ഇന്ത്യയുടെ നിലപാട്. ലേ ആസ്ഥാനമായുള്ള പതിനാലാം സേനാ കോറിനാണു കിഴക്കൻ ലഡാക്ക് അതിർത്തിയുടെ സുരക്ഷാ ചുമതല. ടി 90 ടാങ്ക് ഉൾപ്പെടെയുള്ള സന്നാഹങ്ങൾ അതിർത്തിയിലെത്തിച്ചിട്ടുണ്ട്. 

ലേ, ശ്രീനഗർ വ്യോമതാവളങ്ങളിൽ സുഖോയ് 30, മിറാജ്, മിഗ് 29 യുദ്ധവിമാനങ്ങൾ എന്നിവ മിസൈൽ സജ്ജമായി നിലയുറപ്പിച്ചിട്ടുണ്ട്. ഫ്രാൻസിൽ നിന്നു വാങ്ങിയ റഫാൽ യുദ്ധവിമാനങ്ങളും അതിർത്തി മേഖലകളിലുണ്ട്. അപ്പാച്ചി അറ്റാക്ക് ഹെലിക്കോപ്റ്റർ, ചിനൂക് ഹെലിക്കോപ്റ്റർ എന്നിവയും രംഗത്തുണ്ട്. അടുത്തിടെ റഷ്യയിൽനിന്നു വാങ്ങിയ എസ് 400 വ്യോമ പ്രതിരോധ മിസൈലുകളെയും ചൈനയെ ലക്ഷ്യമിട്ട് അതിർത്തിയിൽ സജ്ജമാക്കിയിട്ടുണ്ട്. 

English Summary: What are the Border Challenges before India's next Army chief, Lt. General Manoj Pande