കേന്ദ്രം 'പിടിക്കാൻ' ശ്രമിച്ചിട്ടും അന്ന് വഴുതിമാറി; ടാറ്റ പറഞ്ഞു: ‘നിങ്ങൾ ദീർഘദർശിയാണ്’

1990 കളുടെ ആദ്യം ഇന്ത്യ കടുത്ത സാമ്പത്തിക പ്രതിസന്ധിയിലൂടെ കടന്നു പോകുകയും സാമ്പത്തിക മേഖല തുറന്നു കൊടുക്കാൻ ഒരുങ്ങുകയും ചെയ്യുന്ന സമയത്ത് പക്ഷേ ടിസ്കോ തങ്ങളുടെ പ്രവർത്തനങ്ങൾ വ്യാപിപ്പിക്കുകയായിരുന്നു. തങ്ങളുടെ ലാഭത്തിൽ 30 ശതമാനം വർധനവ് ഉണ്ടായതായും കമ്പനി വ്യക്തമാക്കുന്നത് ഈ സമയത്താണ്. ഇറാനി തലപ്പത്തിരിക്കുമ്പോഴാണ് ടാറ്റ സ്റ്റീൽസ് യുകെ കേന്ദ്രമായ കോറസ് ഉൾപ്പെടെ നിരവധി ഉരുക്കുൽപാദക കമ്പനികള്‍ ഏറ്റെടുക്കുന്നത്. ഇപ്പോൾ 26 രാജ്യങ്ങളിലായി വ്യാപിച്ചു കിടക്കുന്ന ടാറ്റാ സ്റ്റീൽസിന് വർഷം 3.4 കോടി ടണ്‍‍ ഉരുക്ക് ഉൽപാദിപ്പിക്കാനുള്ള ശേഷിയുണ്ട്. ഇന്ത്യയിൽ മാത്രം 1.3 കോടി ടൺ വർഷം ഉൽപാദിപ്പിക്കുന്നു. 2021–22 സാമ്പത്തിക വർഷത്തെ രണ്ടാം പാദത്തിൽ ടാറ്റാ കൺസൽട്ടൻസി സർവീസസിനെ മറികടന്ന് ടാറ്റാ സ്റ്റീൽസ് ടാറ്റാ ഗ്രൂപ്പിലെ ഏറ്റവും ലാഭകരമായി പ്രവർത്തിക്കുന്ന കമ്പനിയായി മാറിയിരുന്നു. ഈ സമയത്ത് ടിസിഎസിന്റെ ലാഭം 9624 കോടി രൂപ ആയിരുന്നുവെങ്കിൽ ടാറ്റാ സ്റ്റീലിന്റേത് 11,833 കോടി രൂപയായിരുന്നു. 

∙ ബ്രിട്ടനിൽ പഠിച്ചു, ഇന്ത്യയിൽ പ്രവർത്തിച്ചു 

നാഗ്പൂരിലാണ് ജാംഷെഡ് ജെ. ഇറാനി ജനിച്ചത്. ബിരുദാനന്തര ബിരുദത്തിനു ശേഷം ജെഎൻ ടാറ്റ സ്കോളർഷിപ്പുമായി യുകെയിലെ യൂണിവേഴ്സിറ്റി ഓഫ് ഷെഫീൽഡിലെത്തുകയും അവിടെനിന്ന് മെറ്റലർജിയിൽ മാസ്റ്റേഴ്സും ഡോക്ടറേറ്റും കരസ്ഥമാക്കുകയും ചെയ്തു. 1963 ൽ ബ്രിട്ടിഷ് അയൺ ആന്‍ഡ് സ്റ്റീൽ റിസർച് അസോസിയേഷനിലായിരുന്നു അദ്ദേഹത്തിന്റെ തുടക്കം. എന്നാൽ ഇന്ത്യയിൽ പ്രവർത്തിക്കണം എന്നതായിരുന്നു ആഗ്രഹം. അങ്ങനെ 1968 ൽ അന്നത്തെ ടാറ്റാ അയൺ ആൻഡ് സ്റ്റീൽ കമ്പനിയിൽ ചേർന്നു. പടിപടിയായി ആയിരുന്നു അദ്ദേഹത്തിന്റെ ഉയർച്ച. 

സ്ഥാപനത്തിലെ റിസർച് ആൻഡ് ഡവല്പമെന്റ് ചുമതലയുള്ളയാളുടെ അസിസ്റ്റന്റ് ആയി തുടക്കം. തുടർന്ന് ജനറൽ സൂപ്രണ്ടന്റ്, ജനറൽ മാനേജർ, ടാറ്റാ സ്റ്റീലിന്റെ പ്രസിഡന്റ്. പിന്നീടായിരുന്നു ഇന്ത്യയിലെ ഇരുമ്പുരുക്ക് വ്യാവസായത്തെ തന്നെ മാറ്റിയെടുത്ത പദവികളിലേക്ക് അദ്ദേഹം വരുന്നത്. 1990 കളുടെ ആദ്യം അദ്ദേഹം ടാറ്റാ സ്റ്റീലിന്റെ ജോയിന്റ് മാനേജിങ് ഡയറക്ടറും പിന്നാലെ മാനേജിങ് ഡയറക്ടറുമായി. രാജ്യത്തെ ഇരുമ്പുരുക്കു മേഖലയുടെ വളർച്ചയ്ക്ക് ചുക്കാൻ പിടിച്ച ഏറ്റവും പ്രധാനപ്പെട്ട ആളുകളിലൊരാളായാണ് ഇറാനിയെ കണക്കാക്കുന്നത്.

∙ കേന്ദ്രം ‘പിടിക്കാൻ’ ശ്രമിച്ചിട്ടും വഴുതിമാറിയ ടാറ്റ

ദേശസാൽക്കരണത്തിനെതിരെ കടുത്ത ചെറുത്തുനിൽപ്പാണ് ടിസ്കോ നടത്തിയത്. 1973 ലെ കോൺഗ്രസ് സർക്കാരും 1978 ലെ ജനതാ സർക്കാരും ടാറ്റാ സ്റ്റീലിനെ ദേശസാൽക്കരിക്കാൻ ശ്രമിച്ചിരുന്നു. എന്നാൽ രണ്ടു തവണയും കമ്പനി ഇതിനെ ചെറുത്തുനിന്നു. ജനതാ സർക്കാരിൽ സ്റ്റീൽ, ഖനന മന്ത്രിയായിരുന്ന ബിജു പട്നായിക്കും വ്യവസായ മന്ത്രി ജോർജ് ഫെർണാണ്ടസും ടാറ്റാ സ്റ്റീൽ ഏറ്റെടുക്കാനുള്ള നടപടികൾ ശക്തമാക്കിയതാണ്. അന്ന് അ‍ഞ്ചു ശതമാനം ഓഹരി മാത്രമാണ് ടാറ്റാ ഗ്രൂപ്പിന് കമ്പനിയിലുള്ളൂ. സര്‍ക്കാര്‍ നിയന്ത്രിത കമ്പനികൾക്ക് 45 ശതമാനവും. എന്നാൽ റൂസി മോഡി മുന്നിൽ നിന്ന് സർക്കാർ നീക്കങ്ങളെ നേരിട്ടു. 

ഇന്നത്തെ ഉത്തർ പ്രദേശ്, ഉത്തരാഖണ്ഡ് സംസ്ഥാനങ്ങൾ ഉൾക്കൊള്ളുന്ന ബ്രിട്ടിഷ് ഇന്ത്യയിലെ യുണൈറ്റഡ് പ്രൊവിൻസസിന്റെ ആദ്യ ഗവർണറായിരുന്നു മോഡിയുടെ പിതാവ് സർ ഹോമി മോഡി. രാഷ്ട്രീയപരമായും ഏറെ ബന്ധങ്ങളുണ്ടായിരുന്ന അദ്ദേഹം അതൊക്കെ ഉപയോഗിച്ചു. അതിനൊപ്പം തൊഴിലാളി യൂണിയനെയും ഏറ്റെടുക്കലിനെതിരെ രംഗത്തിറക്കിയതോടെ സർക്കാർ പദ്ധതി ഉപേക്ഷിച്ച് പിന്മാറി. 1907 ൽ രൂപം കൊണ്ട ടിസ്കോയിൽ 1939 ലാണ് റൂസി മോഡി ചേരുന്നത്. ഇന്നത്തെ ടാറ്റ ഗ്രൂപ്പ് ചെയർമാൻ രത്തൻ ടാറ്റയ്ക്ക് അന്ന് രണ്ടു വയസ്സ്. ജെആർഡി ടാറ്റയുടെ പൂർണ പിൻബലത്തോടെ ദശകങ്ങൾ കൊണ്ട് ടിസ്കോയെ വളർത്തിയെടുത്തതിൽ റൂസി മോഡിക്കും വലിയ പങ്കുണ്ട്. 

തന്റെ സ്വകാര്യ കമ്പനി പോലെ റൂസി മോഡി ടാറ്റാ സ്റ്റീൽ ഭരിക്കുന്ന കാലത്താണ് രത്തൻ ടാറ്റ ചിത്രത്തിലേക്ക് വരുന്നത്. അപ്പോഴേക്കും പ്രായമായിക്കഴിഞ്ഞിരുന്ന ജെ.ആര്‍.ഡി ടാറ്റ 1991 രത്തൻ ടാറ്റയെ ചെയർമാനാക്കി നിയമിച്ചു. എന്നാൽ ദേശസാൽക്കരണം തടഞ്ഞ തന്നെ ടാറ്റ ഗ്രൂപ്പിന്റെ ചെയർമാൻ പദവിയിലേക്ക് പരിഗണിക്കുമെന്ന് റൂസി മോഡി പ്രതീക്ഷിച്ചിരുന്നതായി ചില റിപ്പോർട്ടുകൾ പറയുന്നു. പക്ഷേ, രത്തൻ ടാറ്റ തന്നെ ടാറ്റ ഗ്രൂപ്പിന്റെ പിൻഗാമിയായി. അതേസമയം, ഗ്രൂപ്പിനു കീഴിലുള്ള വിവിധ കമ്പനിക‌ൾ റൂസി മോഡിയെപ്പോലുള്ള അതികായരുടെ പൂർണ നിയന്ത്രണത്തിലായിരുന്നു. ഈ സ്ഥാപനങ്ങളുടെ നിയന്ത്രണം പൂർണമായി ഏറ്റെടുക്കുക എന്നതായി രത്തൻ ടാറ്റയുടെ ലക്ഷ്യം. ഈ സമയത്താണ് ജാംഷെ‍ഡ് ജെ. ഇറാനി ടാറ്റ സ്റ്റീലിന്റെ മാനേജിങ് ഡയറക്ടർ പദവിയും ഏറ്റെടുത്തത്. 

∙ ടാറ്റ പറഞ്ഞു, നിങ്ങൾ ദീർഘ ദർശിയാണ് 

‘ദീർഘദർശിയായ നേതാവ്’ എന്നാണ് ടാറ്റാ സ്റ്റീൽ അദ്ദേഹത്തെ വിശേഷിപ്പിച്ചത്. ഇന്ത്യ സാമ്പത്തിക ഉദാരവൽക്കരണം നടപ്പാക്കിയ സമയത്ത് ടാറ്റയിൽ അതിന് ചുക്കാൻ പിടിക്കുകയും രാജ്യത്തിന്റെ ഉരുക്ക് മേഖലയിൽ ആവശ്യമായ വളർച്ചയും വികസനവും കൊണ്ടുവരാനും അദ്ദേഹത്തിന് കഴിഞ്ഞുവെന്ന് ടാറ്റാ സ്റ്റീൽ‌ തങ്ങളുടെ അനുസ്മരണത്തിൽ വ്യക്തമാക്കിയിട്ടുണ്ട്. തീരെ പ്രെഫഷനൽ അല്ലാതിരുന്ന ഇന്ത്യയിലെ ഉരുക്കു വ്യവസായത്തെ ഇന്നു കാണുന്ന രീതിയിൽ മാറ്റിയെടുത്ത ‘മാറ്റത്തിന്റെ പതാകവാഹകൻ’ എന്നാണ് അദ്ദേഹം അറിയപ്പെടുന്നത്. 

ഗുണമേന്മയ്ക്ക് പ്രാമുഖ്യം കൊടുത്തുകൊണ്ടുള്ള ഉൽപാദനത്തിലേക്ക് ടാറ്റയും അതുവഴി രാജ്യവും കാൽവച്ചത് ഇറാനിയുടെ തോളിലേറിയാണ്. അന്താരാഷ്ട്ര വിപണിയിലെ ഏതു വമ്പനോടും മുട്ടാൻ തക്ക ഗുണമേന്മയുള്ള ഉരുക്ക്, ഏറ്റവും കുറഞ്ഞ വിലയ്ക്ക് ലഭ്യമാക്കി എന്നതു തന്നെയാണ് ടാറ്റാ സ്റ്റീലിനെ വ്യത്യസ്തമാക്കിയത്, അതിന് നേതൃത്വം വഹിച്ചത് ഇറാനിയും. പത്മഭൂഷൻ, മെറ്റല‌ർജി മേഖലയിലെ സമഗ്ര സംഭാവനയ്ക്കുള്ളത് അടക്കം നിരവധി പുരസ്കാരങ്ങളും അദ്ദേഹത്തെ തേടി എത്തി. 1997 ൽ അന്തരിച്ച ബ്രിട്ടിഷ് രാജ്‍‌‍ഞി, ബഹുമാനപുരസ്സരം അദ്ദേഹത്തിന് സർ (നൈറ്റ്ഹുഡ്) പദവിയും സമ്മാനിച്ചിരുന്നു. ജാർഖണ്ഡിലെ ജാംഷെ‍ഡ്പൂരിലുള്ള ടാറ്റാ മെയിന്‍ ആശുപത്രിയിലായിരുന്നു കഴിഞ്ഞ ദിവസം അന്ത്യം.

English Summary: Life Story of Jamshed J Irani- Steel Man of India