ബിജെപിയെ മെരുക്കാൻ ‘ജനകീയ’ സുഖ്‌വിന്ദർ; പ്രതിഭയെ ‘ചതിച്ചത്’ വോട്ട് കണക്ക്?

മറ്റൊന്നാണ് മുഖ്യമന്ത്രിയായിരുന്ന ബിജെപി നേതാവ് ജയ് റാം ഠാക്കൂർ മാണ്ഡിയിൽ നിന്നുള്ള നേതാവാണ് എന്നത്. ജില്ലയിലെ 10ൽ ഒമ്പതു സീറ്റിലും ഇത്തവണ വിജയിച്ചത് ബിജെപി. സംസ്ഥാന ഭരണം പോയെങ്കിലും മാണ്ഡി പൂർണമായി തന്നെ ബിജെപിക്ക് കൈപ്പിടിയിലൊതുക്കാനായി. മലയോര മേഖലയിൽ നിന്ന് ബിജെപിക്ക് ആദ്യമായാണ് ഒരു മുഖ്യമന്ത്രിയുണ്ടാവുന്നത് എന്നതും ശ്രദ്ധിക്കേണ്ടതാണ്. ബിജെപിയുടെ ഇതുവരെ ഉണ്ടായിട്ടുള്ള മറ്റ് രണ്ടു മുഖ്യമന്ത്രിമാരും – ശാന്തകുമാർ, പ്രേം കുമാർ ധുമൽ– യഥാക്രമം കാങ്ഗ്ര, ഹമീർപുർ എന്നീ ഹിമാചൽ താഴ്‍വരകളിൽ നിന്നുള്ളവരായിരുന്നു. കോൺഗ്രസിന്റെ മുഖ്യമന്ത്രിമാരാകട്ടെ, മലയോര മേഖലയിൽ നിന്നുള്ളവരും – യശ്വന്ത് സിങ് പർമാർ – സിർമൗർ, ഠാക്കൂർ രാം ലാൽ, വീരഭദ്ര സിങ്– ഷിംല. അതുകൊണ്ടു തന്നെ മലയോര മേഖലയിലേക്കും ബിജെപി കടന്നുകയറ്റം നടത്തിയിരിക്കുമ്പോൾ ഉപതിരഞ്ഞെടുപ്പ് നടത്തി ഭാഗ്യം പരീക്ഷിക്കാൻ കോൺഗ്രസ് തയാറല്ലായിരുന്നു എന്നതും പ്രതിഭയ്ക്ക് വിനയായി. 

∙ ഗ്രൂപ്പ് മറന്ന് ഒന്നിച്ച് ഗുണമുണ്ടാക്കി

ഹിമാചൽ പ്രദേശിൽ പതിവുള്ള ഭരണവിരുദ്ധ തരംഗം നൽകിയ വിജയം മാത്രമായി കോൺഗ്രസിന്റേതിനെ കാണാനാകില്ല. അവിടെ താഴെത്തട്ടിൽ ഇപ്പോഴും അടിത്തറയുള്ള പാർട്ടിയാണ് കോൺഗ്രസ് എന്നത് ഭരണം നഷ്ടപ്പെട്ട തിരഞ്ഞെടുപ്പുകളിൽ പോലും വ്യക്തമായിരുന്നു. പൊതുജനവികാരം മനസ്സിലാക്കി, പഴയ പെൻഷൻ പദ്ധതി (ഒപിഎസ്) പുനഃസ്ഥാപിക്കുമെന്ന പ്രഖ്യാപനവും അഗ്നിവീർ പദ്ധതിക്കെതിരെയുള്ള എതിർപ്പും തിരഞ്ഞെടുപ്പു വേദിയിൽ വലിയ ചർച്ചയായതിന്റെ കൂടി ഫലമാണ് കോൺ‌ഗ്രസിനുണ്ടായ വിജയം. അഭിപ്രായ വ്യത്യാസങ്ങൾക്കിടയിലും തിരഞ്ഞെടുപ്പു ഘട്ടത്തിൽ പാർട്ടിയെന്ന നിലയിൽ ഒന്നിച്ചുനിൽക്കുക പ്രധാനമാണെന്ന അടിസ്ഥാന പാഠം ഹിമാചലിൽ കോൺഗ്രസ് മറന്നില്ല, അതിന്റെ ഗുണം കിട്ടുകയും ചെയ്തു. 

 തനിക്കു വേണ്ടിയാണ് വോട്ട് ചെയ്യേണ്ടതെന്ന പ്രധാനമന്ത്രി നരേന്ദ്ര മോദിയുടെ ആഹ്വാനം ഏശാതെ പോയത് കോൺഗ്രസിന്റെ ജനകീയ പ്രഖ്യാപനങ്ങൾ കൊണ്ടാണ്. പ്രാദേശിക വിഷയങ്ങൾ വോട്ടർമാർ ഗൗരവമായി പരിഗണിച്ചു. വ്യവസായങ്ങളോ വരുമാനമുണ്ടാകുന്ന മറ്റ് പദ്ധതികളോ ഇല്ലാത്ത സംസ്ഥാനത്ത് സർക്കാർ ജോലിയാണ് ഏവരുടെയും പ്രതീക്ഷ രണ്ടു ലക്ഷത്തോളം സർക്കാർ ജീവനക്കാരാണ് സംസ്ഥാനത്തുള്ളത്, സംസ്ഥാന വോട്ടർമാരുടെ അഞ്ചു ശതമാനം. പഴയ പെൻഷൻ പദ്ധതി പുന:സ്ഥാപിക്കണമെന്ന് ഇവർ നിരന്തരമായി ആവശ്യപ്പെട്ടിരുന്നു. കോൺഗ്രസും ആം ആദ്മി പാർട്ടിയും ഈ ഉറപ്പാണ് തിര‍ഞ്ഞെടുപ്പ് വാഗ്ദാനമായി മുന്നോട്ടു വച്ചത്. ഗുജറാത്ത് തിരഞ്ഞെടുപ്പിനായി ആം ആദ്മി പാർട്ടി ഹിമാചൽ പ്രദേശ് പാതിവഴിയിൽ ഉപേക്ഷിച്ചതോടെ കോൺഗ്രസായി ഇതിന്റെ ഗുണഭോക്താവ്. ആപ്പിൾ കർഷകർക്കും വലിയ സ്വാധീനമുള്ള സംസ്ഥാനമാണ് ഹിമാചൽ. ആപ്പിൾ കാർഷിക മേഖലയിൽ കോർപറേറ്റ് കമ്പനികളുടെ ഇടപെടലാണ് കർഷകരുടെ എതിർപ്പിനിടയാക്കിയ മറ്റൊന്ന്. വരുമാനം കുറഞ്ഞതും ജിഎസ്ടി ഏർപ്പാടാക്കിയതും മൂലമുള്ള ആപ്പിൾ കർഷകരുടെ രോഷം ഏറ്റുവാങ്ങിയത് ബിജെപിയാണ്. 

∙ വൻവൃക്ഷങ്ങൾക്കിടയിലൂടെ പൊരുതിക്കയറിയ സുഖു 

മുഖ്യമന്ത്രിക്കസേരയിലേക്ക് സുഖ്‍വീന്ദർ സിങ് സുഖുവിന്റെ രാഷ്ട്രീയ കയറ്റം അദ്ദേഹത്തിന്റെ സൂക്ഷ്മതയുടെയും സ്ഥിരോത്സാഹത്തിന്റെയും ഫലമാണ്. കോൺഗ്രസിൽ വീരഭദ്രസിങ് ആധിപത്യം പുലർത്തിയ കാലത്താണ് സുഖു നിയമസഭയിലെത്തിയത്; രണ്ട് തവണ. ബിജെപി മുഖ്യമന്ത്രിയായിരുന്ന പ്രേംകുമാർ ധുമാലിന്റെ തട്ടകത്തിൽ തന്നെയാണ് സുഖുവും പയറ്റിത്തെളിഞ്ഞത്. സുഖു തന്റെ രാഷ്ട്രീയ യാത്രയിലൂടെ പോരാളിയായി മാറുകയായിരുന്നു. രണ്ടു വലിയ നേതാക്കളുടെ ഇടയിലൂടെയുള്ള വളർച്ച വളരെ കരുതലോടെയും. സുഖു സംഘടനാ പ്രവർത്തകനും പ്രതിബദ്ധതയുള്ള പാർട്ടി പ്രവർത്തകനുമായിരുന്നു എന്നത് പാർട്ടികകത്തും പുറത്തും വളരാൻ അദേഹത്തിന് സഹായമായി. സുഖുവിന്റെ അതിജീവിതത്തിന്റെ പ്രധാന കാരണം വീരഭദ്രവിരുദ്ധ ക്യാംപിന്റെയും കേന്ദ്ര പാർട്ടി നേതൃത്വത്തിന്റെയും നല്ല പുസ്തകങ്ങളിൽ അദേഹം തുടർന്നു എന്നതാണ്. ‌2012ൽ അദ്ദേഹത്തിന് സീറ്റ് നഷ്ടപ്പെട്ടെങ്കിലും വീരഭദ്രയുടെ കടുത്ത എതിർപ്പ് അവഗണിച്ച് ഒരു വർഷത്തിനുശേഷം ഗാന്ധി കുടുംബം സുഖുവിനെ പാർട്ടി സംസ്ഥാന അധ്യക്ഷനാക്കി. ഹിമാചൽ കോൺഗ്രസ് പ്രസിഡന്റായിരുന്ന 2013നും 19നും ഇടയിൽ പാർട്ടി അംഗങ്ങൾക്കിടയിൽ തന്റെ സ്വാധീനം ഉറപ്പിക്കാനും ജനങ്ങൾക്കിടയിൽ ശക്തമായി അടിത്തറ വികസിപ്പിക്കാനും അദ്ദേഹത്തിന് കഴിഞ്ഞു.

ഏറ്റുമുട്ടൽ ശൈലി ഉപേക്ഷിച്ച് ജനകീയനായി ജനശ്രദ്ധ പിടിച്ചു പയറ്റി നേതാവായി മാറുകയായിരുന്നു സുഖു. 

വീരഭദ്രയ്ക്ക് ശേഷം പ്രതിഭ സിങ്ങിനെ പാർട്ടി അധ്യക്ഷയാക്കിയതിനൊപ്പം നിയമസഭാ തിരഞ്ഞെടുപ്പിനു തൊട്ടു മുൻപ് തിരഞ്ഞെടുപ്പ് കമ്മിറ്റിയുടെ തലവനാക്കിയത് വഴി സുഖുവിന്റെ വിശ്വസ്തരായ പലർക്കും സീറ്റ് ലഭിക്കുകയും ചെയ്തു. ഠാക്കൂർ–രജപുത്ര സമുദായക്കാരനായതും സുഖുവിന് ഗുണമായി. ഹിമാചലിലെ എല്ലാ മുഖ്യമന്ത്രിമാരും (ശാന്തകുമാർ ഒഴികെ) രജപുത്ര സമുദായത്തിൽ നിന്നുള്ളവരാണ്. ഇൗ പാരമ്പര്യം സുഖുവിലും തുടർന്നു. മുഖ്യമന്ത്രിയായി സുഖുവിനെ ഉയർത്തുന്നത് വഴി രാഷട്രീയ എതിരാളികളെയും നിയന്ത്രിക്കാൻ കഴിയുമെന്നാണ് കോൺഗ്രസ് വിശ്വസിക്കുന്നത്. ഹാമിർപൂർ ജില്ലക്കാരനായ സുഖു ധുമലിന്റെ മകനും കേന്ദ്രമന്ത്രിയുമായി അനുരാഗ് താക്കുറിനെയും നിയന്ത്രിക്കുമെന്ന് കോൺഗ്രസിന് പ്രതീക്ഷയുണ്ട്. 2024ലെ പൊതുതിരഞ്ഞെടുപ്പിൽ സുഖുവിലൂടെ നാലു സീറ്റിലും മികച്ച ഫലം കോൺഗ്രസ് പ്രതീക്ഷിക്കുന്നു. 

∙ ബിജെപിയെ മുക്കിയ പ്രദേശങ്ങൾ 

ഹിമാചലിലെ കാങ്ഗ്ര മേഖലയിൽ നേട്ടമുണ്ടാക്കുന്നവർ സംസ്ഥാനം ഭരിക്കുമെന്നൊരു വിശ്വാസമുണ്ട്. അത് ഇത്തവണയും തെറ്റിയില്ല. ഇത്തവണ കാര്യമായി കോൺഗ്രസ് ശ്രദ്ധ കൊടുക്കാതിരുന്ന രണ്ടു ജില്ലകളായിരുന്നു ആ പാർട്ടിയെ ഇത്തവണ രക്ഷിച്ചത് എന്നതും ശ്രദ്ധിക്കേണ്ടതുണ്ട്. കാങ്ഗ്രയും ഷിംലയും. കാങ്ഗ്രയിലെ 15 സീറ്റുകളിൽ 10 എണ്ണം കോൺഗ്രസ് നേടിയപ്പോൾ 4 എണ്ണം ബിജെപിയും ഒരെണ്ണം ബിജെപി വിമതനും നേടി. ഷിംലയിലെ എട്ടിൽ ഏഴു സീറ്റുകളും കോൺഗ്രസ് പിടിച്ചെടുത്തു. ഈ രണ്ടു ജില്ലകൾക്കും സംസ്ഥാന ഭരണത്തിൽ കൊടുക്കേണ്ടി വരുന്ന പ്രാതിനിധ്യവും പ്രാധാന്യവും സുഖു സർക്കാരിനെ സംബന്ധിച്ച് വെല്ലുവിളി തന്നെയാവും.

2017ൽ കാങ്ഗ്രയിലെ 11 സീറ്റുകൾ ബിജെപിക്കായിരുന്നു. പൊതുവേ ബിജെപിയുടെ സ്വാധീനമേഖലയായാണ് കാങ്ഗ്രയും ഹാമിർപുരും ബിലാസ്പുരും ഉൾപ്പെടുന്ന ലോവർ ഹിമാചൽ കണക്കാക്കുന്നത്. ഈ അധിക നേട്ടം കോൺഗ്രസ് ഭരണത്തിലെത്തുന്നതിന് പ്രധാന കാരണമായി. മുഖ്യമന്ത്രി സുഖുവും ഉപമുഖ്യമന്ത്രി മുകേഷ് അഗ്നിഹോത്രിയും ലോവർ ഹിമാചലിൽ നിന്നുള്ളവരാണ്. ആദ്യമായാണ് കോൺഗ്രസ് ഈ മേഖലയിൽ നിന്നൊരാളെ മുഖ്യമന്ത്രി പദത്തിൽ നിയമിക്കുന്നത്. ബിജെപിക്ക് വെല്ലുവിളിയാണ് ഈ നീക്കമെങ്കിലും കോൺഗ്രസിനും ഏറെ കരുതലോടെ നീങ്ങേണ്ട ഒന്നാണ് ഇത്. വീരഭദ്ര സിങ്ങിനെ പോലെ സംസ്ഥാനമൊട്ടാകെ, എല്ലാ മേഖലകളിലും എല്ലാ സമുദായങ്ങൾക്കിടയിലും സ്വാധീനമുള്ള നേതാക്കൾ ഇപ്പോൾ ആരും തന്നെയില്ല. സുഖു അടക്കമുള്ളവർ ലോവർ ഹിമാചൽ മേഖലയിൽ സ്വാധീനമുള്ളവരാണ്. അപ്പോൾ അപ്പർ ഹിമാചൽ അടക്കമുള്ള പ്രദേശങ്ങളെ കൂടി ഒപ്പം നിർത്തുക എന്നതും വരുംനാളുകളിൽ സർക്കാരും പാർട്ടിയും നേരിടുന്ന വെല്ലുവിളിയാവും.

ഹിമാചലിലെ ബിജെപി രാഷ്ട്രീയത്തെ കീഴ്മേൽ മറിച്ച തോൽവി ഉണ്ടായത് 2017ൽ സുജാൻപുർ മണ്ഡലത്തിലാണ്. അത് ബിജെപിയിൽ ഉണ്ടാക്കിയ വൻ പൊട്ടിത്തെറി ഇതുവരെ കെട്ടടങ്ങിയിട്ടില്ല. 2 തവണ മുഖ്യമന്ത്രിയായ, സംസ്ഥാനത്ത് പാർട്ടിയുടെ അതികായനായ പ്രേംകുമാർ ധൂമലിന്റെ തട്ടകമായ സുജാൻപുരിൽ 2017 ൽ അദ്ദേഹം പരാജയപ്പെട്ടതാണ് ജയ്റാം ഠാക്കൂറിനു മുഖ്യമന്ത്രി കസേരയിലേക്കു വഴിയൊരുക്കിയത്. കഴിഞ്ഞ തവണ 1919 വോട്ടുകൾക്കായിരുന്നു ധൂമലിനു മണ്ഡലവും മുഖ്യമന്ത്രിസ്ഥാനവും നഷ്ടമായത്. ഇത്തവണ ഇഞ്ചോടിഞ്ചു പോരാട്ടം നടന്ന മണ്ഡലത്തിൽ കോൺഗ്രസിന്റെ രജീന്ദർ സിങ്ങിനോടു 399 വോട്ടുകൾക്ക് ബിജെപി സ്ഥാനാർഥി രഞ്ജിത്ത് സിങ് റാണ തോറ്റതോടെ കാലുവാരൽ ആരോപണം അരങ്ങു തകർക്കുകയാണ്. ധൂമൽ ഇക്കുറി വീണ്ടും സീറ്റ് മോഹിച്ചെങ്കിലും നേതൃത്വം വെട്ടി. പരിഭവിച്ച ധൂമലിനെ മകനും കേന്ദ്രമന്ത്രിയുമായ അനുരാഗ് താക്കൂറാണ് അനുനയിപ്പിച്ചത്. ഏതാനും മണ്ഡലങ്ങളിൽ മാത്രമായി ധൂമൽ പ്രചാരണം ഒതുക്കി. സംസ്ഥാനത്തുടനീളം അനുയായികളുള്ള ധൂമലിനെ പിണക്കിയതും പാർട്ടിക്കു തിരിച്ചടിയായി. ധൂമലിന്റെ വീടിരിക്കുന്ന സുജാൻപുർ മണ്ഡലത്തിൽ തോറ്റത് മകൻ അനുരാഗിനെയും വെട്ടിലാക്കിയിരിക്കുകയാണ്. ഇതിൽ നിന്ന് തിരിച്ചു കയറാനുള്ള ബിജെപി ശ്രമവും ആത്യന്തികമായി പ്രതിസന്ധിയിലാക്കുക കോൺഗ്രസ് സർക്കാരിനെ തന്നെയാവും എന്നതിൽ സംശയമില്ല.

English Summary: Sukhvinder Singh Sukhu instead of Prathibha Singh; A Shift of Tactics for Congress?