സ്ത്രീ അംഗരക്ഷകർക്കു പിന്നിലൊളിച്ച മുംബൈ ഡോൺ; ഛോട്ടാ ഷക്കീലും പറഞ്ഞു: ‘ആ പ്രദീപിന് ഭ്രാന്താണ്’

സലാസ്കർ വാഹനം വേഗം കുറച്ച് ഓടിച്ചു. അപ്പോഴേക്കും വയർലെസിൽ ആ വിവരമെത്തി ഭീകരർ അടുത്തൊരു ചുവന്ന കാറിനു പിന്നിൽ പതിയിരിപ്പുണ്ട്. ക്രൈംബ്രാഞ്ച് ഓഫിസ് കടന്ന് വാഹനം അൽപം മുന്നോട്ട് നീങ്ങിയ ഉടൻ കസബും ഇസ്മായിലും ക്വാളിസിനു മുന്നിലേക്ക് ചാടി വീണ് തുരുതുരാ വെടിയുതിർത്തു. വാഹനമോടിക്കുകയായിരുന്ന സലാസ്കറിന് തോക്കെടുക്കാൻ സാവകാശം കിട്ടിയില്ല. പിന്നിലിരുന്ന അരുൺ ജാദവ് വെടിയുതിർക്കാൻ ശ്രമിച്ചെങ്കിലും കയ്യിൽ വെടിയേറ്റ് വീണു. നിമിഷങ്ങൾക്കുള്ളിൽ ഹേമന്ത് കർക്കറെയും കാംതെയും മരിച്ചു. കസബും ഇസ്മായിലും വാഹനത്തിനടുത്തെത്തി. കർക്കറെ, കാംതെ, സലാസ്കർ എന്നിവരുടെ ശരീരം പുറത്തേക്ക് വലിച്ചിട്ട് വാഹനവുമായി കടന്നു. പക്ഷേ, അപ്പോഴും സലാസ്കർ മരിച്ചിരുന്നില്ല. അദ്ദേഹം സഹായത്തിനായി അലറി വിളിച്ചു. എന്നാൽ, ഭീകരരെ പേടിച്ച് ആരും അടുത്തില്ല. വളരെ സമയത്തിനുശേഷം പൊലീസ് എത്തി ജിടി ആശുപത്രിയിലേക്ക് മാറ്റുമ്പോഴും അദ്ദേഹത്തിന് ജീവനുണ്ടായിരുന്നു. ഡോക്ടർമാർ പരമാവധി പരിശ്രമിച്ചു നോക്കി. എന്നാൽ ഭൂമിയിലെ തന്റെ ദൗത്യം പൂർത്തിയാക്കി സലാസ്കർ വിടവാങ്ങിയിരുന്നു. തന്റെ ഒപ്പമുണ്ടായിരുന്ന ഉദ്യോഗസ്ഥരേക്കാൾ തോക്ക് ഉപയോഗിച്ച് ഏറ്റുമുട്ടൽ നടത്തി പരിചയമുള്ള സലാസ്കർ, ഡ്രൈവിങ് സീറ്റിൽ ഇരിക്കാതെ കൃത്യമായി തോക്ക് ഉപയോഗിക്കാൻ കഴിയുന്ന പൊസിഷൻ തിരഞ്ഞെടുത്തിരുന്നെങ്കിൽ വിധി മറ്റൊന്നായേനേ എന്നാണ് ഇപ്പോഴും കരുതപ്പെടുന്നത്. അദ്ദേഹത്തിന്റെ ധീരതയെ രാജ്യം അശോക് ചക്ര നൽകി ആദരിച്ചു.

∙ ശർമയുടെ വീഴ്ചയും ഛോട്ടാ രാജന്റെ പ്രതികാരശ്രമവും

2006ൽ പ്രദീപ് സൂര്യവംശി എന്ന ഡിഎൻ നഗർ പൊലീസ് ഇൻസ്പെക്ടറുടെ നേതൃത്വത്തിൽ ഛോട്ടാ രാജൻ സംഘത്തിലെ ലഖൻ ഭയ്യ എന്ന ഗാങ്സ്റ്ററെ വെടിവച്ചു കൊന്നു. എന്നാൽ ഈ സംഘത്തിൽ പ്രദീപ് ശർമ ഉണ്ടായിരുന്നില്ല. പക്ഷേ, ഇത് ഏറ്റമുട്ടൽ കൊലപാതകമല്ലെന്നും ലഖൻ ഭയ്യയെ പിടികൂടിയ ശേഷം പൊലീസ് വെടിവച്ചു കൊന്നതാണെന്നും കാണിച്ച് അഭിഭാഷകനായ അയാളുടെ സഹോദരൻ കോടതിയെ സമീപിച്ചു. ഒരു വർഷത്തിനുശേഷം പരാതി അന്വേഷിക്കാൻ ഉത്തരവിട്ട കോടതി പ്രത്യേക സംഘത്തെയും നിയോഗിച്ചു. അന്വേഷണ സംഘം ഏറ്റുമുട്ടൽ വ്യാജമായിരുന്നുവെന്ന് കോടതിക്ക് റിപ്പോർട്ട് നൽകി. ഇതോടെ 16 പൊലീസുകാരെ പ്രതിയാക്കി എഫ്ഐആർ റജിസ്റ്റർ ചെയ്തു. ഇതിൽ സംഭവത്തിൽ പങ്കെടുക്കാത്ത പ്രദീപ് ശർമയുടെ പേരും ഏറ്റവും അവസാനമായി ഉൾപ്പെട്ടു. ചില പൊലീസ് ഉന്നതരുടെ ഗൂഢാലോചനയാണ് ഇതിനു പിന്നിലെന്ന് സംശയിക്കപ്പെടുന്നു. കാരണം, പൊലീസിലെയും രാഷ്ട്രീയത്തിലെയും പല ഉന്നതരുടെയും അധോലോകവുമായുള്ള ബന്ധം ശർമ ചോർത്തി മാധ്യമങ്ങൾക്ക് നൽകിയെന്ന് ചില ഐപിഎസുകാർ വിശ്വസിച്ചിരുന്നു. 

അവിടംകൊണ്ടും നിന്നില്ല. 2008 ഓഗസ്റ്റ് 30ന്, അധോലോകവുമായി അവിഹിത ബന്ധമുണ്ടെന്ന് ആരോപിച്ച് ശർമയെ സർവീസിൽനിന്ന് പുറത്താക്കി. 2009ൽ ലഖാൻ ഭയ്യാ കേസിൽ ശർമയെ പ്രതിയാക്കി കേസ് റജിസ്റ്റർ ചെയ്തു. പക്ഷേ, സർവീസിൽ തിരിച്ചെടുക്കണമെന്ന് ആവശ്യപ്പെട്ട് ശർമ നൽകിയ പരാതി തീർപ്പാക്കി 2010 ജനുവരി 11ന് ജോലിയിൽ പ്രവേശിക്കാൻ സർക്കാർ അനുമതി നൽകി. കൂടെയുള്ള ശത്രുക്കൾ അപ്പോഴും ഒതുങ്ങിയിരുന്നില്ല. ജോലിയിൽ പ്രവേശിക്കേണ്ട ദിവസത്തിന്റെ തലേന്ന്, ജനുവരി 10ന്, പ്രതിയായ കേസിന്റെ പേരിൽ അദ്ദേഹത്തെ അറസ്റ്റ് ചെയ്തു. ബാക്കി 15 പേരെയും അപ്പോഴും അറസ്റ്റ് ചെയ്തിരുന്നില്ല എന്നതായിരുന്നു ഇതിലെ വൈരുധ്യം. 14 ദിവസം പൊലീസ് കസ്റ്റഡിയിൽ കഴിഞ്ഞ ശർമ പിന്നീട് താനെ സെൻട്രൽ ജയിലിലേക്ക് അയയ്ക്കപ്പെട്ടു.

ഏതു നിമിഷവും ശർമ അവിടെ ആക്രമിക്കപ്പെടുന്നമെന്ന് മനസ്സിലാക്കിയ ജയിൽ വാർഡൻ യോഗേഷ് ദേശായി ശർമയ്ക്കായി പ്രത്യേക സുരക്ഷ തന്നെ ഒരുക്കി. മറ്റു തടവുകാരെല്ലാം സെല്ലിനുള്ളിൽ ലോക്ക് ആണെന്ന് ഉറപ്പിച്ച ശേഷം മാത്രമേ ശർമയെ പുറത്തിറക്കിയിരുന്നുള്ളൂ. ശർമ സെല്ലിന് പുറത്താണെങ്കിൽ ആ ജയിലിലെ ഒരു തടവുകാരൻ പോലും സെല്ലിന് പുറത്തുണ്ടാകിലെന്ന് അർഥം. ജയിലിലെ മിക്ക തടവുകാരും തന്റെ ശത്രുക്കളാണെന്ന് അയാൾ തിരിച്ചറിഞ്ഞു. ഇടയ്ക്കിടെ കോടതിയിലേക്കും ആശുപത്രിയിലേക്കുമുള്ള യാത്രയ്ക്കിടെ തന്റെ നെറ്റ്‌വർക്കിലുള്ള പലരുമായും ശർമ ബന്ധപ്പെട്ടിരുന്നു. അതുവഴി മനസ്സിലാക്കിയ കാര്യം ഞെട്ടിക്കുന്നതായിരുന്നു. പ്രദീപ് ശർമയുടെ ജീവനെടുക്കാൻ ഛോട്ടാരാജൻ തന്റെ സംഘത്തിലെ ഷാർപ്പ് ഷൂട്ടർ വിക്കി മൽഹോത്രയെ ഏർപ്പാട് ചെയ്തിരിക്കുന്നു. അതിലുമുപരി അയാളിപ്പോൾ താനെ സെൻട്രൽ ജയിലിൽ തടവിലുണ്ട്! (2005 ജൂലൈ മാസത്തിൽ പാക്കിസ്ഥാൻ മുൻ ക്രിക്കറ്റ് താരം ജാവേദ് മിയാൻദാദിന്റെ മകനും ദാവൂദ് ഇബ്രാഹിമിന്റെ മകളും തമ്മിൽ ദുബായിൽ നടന്ന വിവാഹ സമയത്ത് ദാവൂദിനെ കൊല്ലാൻ ഇന്ത്യൻ ഇന്റലിജൻസ് ഏജൻസികൾ ഛോട്ടാ രാജനിൽനിന്ന് വിക്കി മൽഹോത്രയെ വാടകയ്ക്കെടുത്തിരുന്നെന്നാണ് കരുതപ്പെടുന്നത്. എന്നാൽ, ആ ഉദ്യമം മറ്റു പല തർക്കങ്ങൾ കാരണം പാളിപ്പോകുകയായിരുന്നു).

പൊലീസിലെ ഒരു വിഭാഗം അറിയാതെ ഇത്തരമൊരു നീക്കം നടക്കില്ലെന്ന് ശർമയ്ക്ക് മനസ്സിലായി. ഒരു ദിവസം വിചാരണയ്ക്കായി ജയിലിൽനിന്ന് കോടതിയിൽ എത്തിയ ശർമ തന്റെ പരിചയക്കാരനായ ഓഫിസറോട് വിക്കി മൽഹോത്രയുടെ ഒരു ചിത്രം ആവശ്യപ്പെട്ടു. അതൊരു തന്ത്രമായിരുന്നു. തനിക്കെതിരെ ആസൂത്രണം ചെയ്ത വധശ്രമം താൻ അറിഞ്ഞു എന്ന് ഡിപ്പാർട്മെന്റിനുള്ളിൽ എത്തിക്കാൻ അതു മാത്രം മതിയായിരുന്നു. ഇതോടെ ശർമയുടെ സുഹൃത്തുക്കളായ പൊലീസുകാർ ആയുധവുമായി ആശുപത്രിയിലും കോടതിയിലും ജയിലിലും അദ്ദേഹത്തിന് സംരക്ഷണമൊരുക്കി. വിക്കി മൽഹോത്രയാകട്ടെ ജയിലിനുള്ളിൽ ശർമയെ കിട്ടാൻ പലതവണ ശ്രമിച്ചിട്ടും ഫലംകണ്ടില്ല. തുടർന്ന് ഒരുമാസത്തിനുശേഷം അയാൾ ജാമ്യം നേടി പുറത്തിറങ്ങി. അപ്പോഴാണ് തന്റെ ശ്രമം പ്രദീപ് ശർമ മനസ്സിലാക്കിയിരുന്നു എന്നും തന്നെക്കുറിച്ച് വിവരങ്ങൾ ശേഖരിച്ചു എന്നും വിക്കി അറിയുന്നത്. ഭയന്നുപോയ അയാൾ പൊലീസിലെ ഒരു ഉന്നതനെ കണ്ട് ശർമയുമായി ഒരു സംഭാഷണത്തിന് അവസരമുണ്ടാക്കണമെന്ന് അഭ്യർഥിച്ചു. ഓഫിസർ അതിന് പലതവണ ശ്രമിച്ചെങ്കിലും ശർമ പ്രതികരിച്ചില്ല. ഒടുവിൽ ഒരുദിവസം കോടതിയിൽ പോയി തിരികെ പ്രവേശിക്കുന്ന സമയത്ത് വിക്കി മൽഹോത്ര ശർമയെ ജയിലിന്റെ വാതിൽക്കൽ വച്ച് നേരിട്ട് കണ്ടു. വിക്കി കൈ കൊടുക്കാൻ ശ്രമിച്ചെങ്കിലും ശർമ സ്വീകരിച്ചില്ല. എന്താണ് കാര്യമെന്ന് പറയാൻ ശർമ ആവശ്യപ്പെട്ടപ്പോൾ അയാൾ ഭയത്തോടെ പറഞ്ഞു

‘സാർ സൂക്ഷിക്കണം, ഒരുപാട് പേര് സാറിന്റെ ജീവനെടുക്കാൻ ശ്രമിക്കുന്നുണ്ട്.’

‘ആരൊക്കെ ആരുടെയൊക്കെ ജീവനെടുക്കാൻ ശ്രമിക്കുന്നെന്ന് എനിക്കറിയാം’ എന്ന് ശർമ മറുപടി നൽകി.

എന്താണ് സംഭവിക്കുക എന്ന ഉറപ്പില്ലാതെ വിക്കിമൽഹോത്ര മടങ്ങി. വൈകാതെ ജയിലിൽനിന്ന് ശർമ ആശുപത്രി സെല്ലിലേക്ക് മാറ്റപ്പെടുകയും ചെയ്തു. 2013 ജൂലൈ മാസത്തിൽ എല്ലാ കേസിൽനിന്നും കോടതി ശർമയെ വിമുക്തനാക്കി. ജൂലൈ 13ന് അദ്ദേഹം ജയിലിൽനിന്ന് പുറത്തിറങ്ങി.

നാലുവർഷത്തിനുശേഷം 2017 ഓഗസ്റ്റിൽ അദ്ദേഹത്തെ സർവീസിൽ തിരികെ നിയമിച്ചുകൊണ്ട് സർക്കാർ ഉത്തരവിട്ടു. താനെ ആന്റി എക്സ്റ്റോർഷൻ സെൽ ഇൻസ്പെക്ടറായി തിരികെയെത്തിയ ശർമ എന്തായിരിക്കും ആദ്യം ചെയ്യുക എന്ന ആകാംക്ഷ എല്ലാവർക്കുമുണ്ടായിരുന്നു. പ്രതീക്ഷ തെറ്റിച്ചില്ല, താനെ കേന്ദ്രമാക്കി വ്യവസായികളെ ഭീഷണിപ്പെടുത്തി പണം പിടുങ്ങിയിരുന്ന ദാവൂദ് ഇബ്രാഹിമിന്റെ സ്വന്തം സഹോദരൻ ഇക്ബാൽ കസ്കറെ വീട്ടിൽ കയറി അറസ്റ്റ് ചെയ്താണ് അദ്ദേഹം തുടങ്ങിയത്. തുടർന്ന് വാതുവയ്പുകാരനും പൊലീസിനെ പോലും വിറപ്പിച്ചിരുന്ന ക്രിമിനലുമായ സോനു ജലാനെയും പിടികൂടി. 2019 ജൂലെ നാലിന് ഏവരെയും അമ്പരപ്പിച്ചുകൊണ്ട് പ്രദീപ് ശർമ സർവീസിൽനിന്ന് വൊളന്ററി റിട്ടയർമെന്റ് വാങ്ങി. തുടർന്ന് 2019 മഹാരാഷ്ട്ര നിയമസഭാ തിരഞ്ഞെടുപ്പിൽ ശിവസേന സ്ഥാനാർഥിയായി മൽസരിച്ചെങ്കിലും വിജയിച്ചില്ല. ഒടുവിൽ മുകേഷ് അംബാനിയുടെ വീടിന് സമീപം സ്ഫോടക വസ്തു നിറച്ച വാഹനം ഉപേക്ഷിച്ച സംഭവവുമായി ബന്ധപ്പെട്ടാണ് പ്രദീപ് ശർമ വാർത്തയിൽ നിറഞ്ഞത്. വാഹന ഉടമയായ മൻസൂക് ഹിരൺ ദിവസങ്ങൾക്കുള്ളിൽ കൊല്ലപ്പെട്ടതിനു പിന്നിൽ പ്രദീപ് ശർമയും മറ്റൊരു ഏറ്റുമുട്ടൽ വിദഗ്ധനായ സച്ചിൻ വാസെയുമാണെന്നാണ് ആരോപണം. ഇരുവരും ഈ കേസിൽ പ്രതികളാണ്. കേസ് ഇപ്പോൾ എൻഐഎ അന്വേഷിച്ചുകൊണ്ടിരിക്കുന്നു.

∙ കോടീശ്വരൻമാരായ എൻകൗണ്ടർ സ്പെഷലിസ്റ്റുകൾ

ആമിർഖാൻ ചിത്രമായ ഗജനി 100 കോടി ക്ലബിൽ കയറുന്നതിന് മുൻപ് ‘100 കോടി ക്ലബ്’ എന്ന പ്രയോഗം ചില പൊലീസുകാർക്കായിരുന്നു ഉണ്ടായിരുന്നതെന്ന് ഹുസെയ്ൻ സെയ്ദി ‘ദ് ക്ലാസ് ഓഫ് 83’ എന്ന പുസ്തകത്തിൽ പറയുന്നുണ്ട്. നഗരത്തിലെ കോടികൾ വിലമതിക്കുന്ന അമ്യൂസ്മെന്റ് പാർക്കിന്റെ ഉടമ 83 ബാച്ചിലെ ഒരു എൻകൗണ്ടർ സ്പെഷലിസ്റ്റ് ആയിരുന്നു. വർഷം ഏതാനും ലക്ഷം മാത്രം വരുമാനമുള്ള ആളാണ് ഇദ്ദേഹമെന്നത് ഓർക്കണം. ഏതെങ്കിലും വ്യവസായിയെ ഭീഷണിപ്പെടുത്തി മാഫിയ പണം വാങ്ങുകയോ അയാളെ കൊലപ്പെടുത്തുകയോ ചെയ്താൽ ഉടൻ മറ്റുള്ളവർ ചേർന്ന് ഇതിന് അറുതി വരുത്താൻ എൻകൗണ്ടർ സ്പെഷലിസ്റ്റുകളെ സമീപിക്കും. അവർ, പണംതട്ടിയ അല്ലെങ്കിൽ കൊലപാതകം നടത്തിയ ആളെ മാത്രമല്ല ആ ഗാങ്ങിനെ തന്നെ ഇല്ലാതാക്കും. ഇതിന് വലിയ പ്രതിഫലം വ്യവസായികൾ നൽകിയിരുന്നതായി പറയപ്പെടുന്നു. ശർമയ്ക്കെതിരെ ഇത്തരത്തിൽ ആരോപണം ഒരു ഘട്ടത്തിൽ ഉയർന്നെങ്കിലും അദ്ദേഹം ജയിലിലായപ്പോൾ പോലും അതൊന്നും തെളിയിക്കാൻ കഴിഞ്ഞില്ല. എന്നാൽ, മറ്റുപലരുടെയും കാര്യം വ്യത്യസ്തമായിരുന്നു.

മഹാരാഷ്ട്ര സർക്കാർ ഉടമസ്ഥതയിലുള്ള ക്ലബ്, 99 വർഷത്തേക്ക് പാട്ടത്തിനെടുത്തത് ശർമയുടെയും സലാസ്കറിന്റെയും കാലത്തു തന്നെ എൻകൗണ്ടർ സ്പെഷലിസ്റ്റായി മാറിയ മറ്റൊരു ഉദ്യോഗസ്ഥനായിരുന്നു. ഇതിന് നൽകേണ്ട സെക്യൂരിറ്റി തുക മാത്രം കോടികൾ വരും. താനെയിൽ റിയൽ എസ്റ്റേറ്റ് കച്ചവടം തകൃതിയായി നടന്ന സമയത്ത് ഇതേയാൾ അവിടെ പോസ്റ്റിങ് വാങ്ങി. പല വലിയ പദ്ധതികളിലും പങ്കാളിയായ ഇദ്ദേഹം കോടികളാണ് സമ്പാദിച്ചത്. ഇദ്ദേഹത്തെ പങ്കാളിയാക്കിയാൽ പണം ആവശ്യപ്പെട്ടുള്ള അധോലോകത്തിന്റെ ഭീഷണി ഉണ്ടാകില്ലെന്നതായിരുന്നു വ്യവസായികളുടെ ധൈര്യം. ഏറ്റുമുട്ടലിൽ ക്രിമിനലുകൾ കൊല്ലപ്പെടുകയും അവിടെനിന്ന് കണ്ടെത്തുന്ന ലക്ഷങ്ങൾ വരുന്ന പണം കാണാതാകുകയും ചെയ്ത സംഭവങ്ങളുമുണ്ട്. ഒരു ഗാങ്ങിൽ നിന്ന് പണം വാങ്ങി മറു ഗാങ്ങിലെ ആളുകളെ ഏറ്റുമുട്ടലിലൂടെ കൊന്ന് കോടിപതികളായവരും കുറവല്ല. ഇത്തരത്തിൽ നോക്കിയാൽ നിയമത്തെ വെല്ലുവിളിച്ച അധോലോകത്തിൽ നിന്നും വ്യത്യസ്തരായിരുന്നില്ല നിയമം നടപ്പാക്കേണ്ടിയിരുന്ന പല ഏറ്റുമുട്ടൽ വിദഗ്ധരും എന്നതാണ് സത്യം.

വിവരങ്ങൾക്കു കടപ്പാട്: ദ് ക്ലാസ് ഓഫ് 83– എസ്. ഹുസെയ്ൻ സെയ്ദി, ഡോംഗ്രി ടു ദുബായ്– എസ്. ഹുസെയ്ൻ സെയ്ദി

(അവസാനിച്ചു)

English Summary: Pradeep Sharma and Vijay Salaskar: Meet Mumbai's Top Encounter Specialists- Part 2