ഗോവിന്ദൻ പറഞ്ഞതാണോ യഥാർഥ 'മൈക്ക് ടെക്നോളജി'? 'ഒന്നും അറിയാത്തവനല്ല മൈക്ക് ഓപറേറ്റർ; ഞങ്ങളുടെ നെഞ്ചില്‍ തീ'

‘‘കണ്ടമാനം സാധനങ്ങള്‍ അടുക്കിവച്ചിട്ട് കാര്യമില്ല. അത് കൈകാര്യം ചെയ്യാന്‍ അറിയണം എന്നൊക്കെ അദ്ദേഹം പൊതുവേദിയില്‍ പറഞ്ഞു. ദിവസങ്ങളായി ജാഥ നയിച്ചുവരുന്ന അദ്ദേഹത്തിന് അതിന്റേതായ ബുദ്ധിമുട്ടുകള്‍ കാണും. പ്രായത്തിന്റെ പ്രയാസമുണ്ടാകും. അങ്ങനെയൊരു സാഹചര്യത്തില്‍ എം.വി.ഗോവിന്ദന്‍ പ്രതികരിച്ചത് വിവാദമാക്കാനില്ല. പക്ഷേ അദ്ദേഹത്തെ പോലുള്ള പ്രമുഖ രാഷ്ട്രീയ നേതാവിന്റെ പരിപാടി ഏറ്റെടുക്കുന്ന ഒരു സൗണ്ട് സിസ്റ്റം ഉടമ ഒരിക്കലും ഒന്നുമറിയാത്തവനെ ഓപറേറ്ററായി അവിടെക്കൊണ്ടു പോയി ഇരുത്തില്ല. പരിപാടി കഴിയുന്നതുവരെ ഏതൊരു ഉടമയുടെയും നെഞ്ചില്‍ തീയാണ്. എവിടെയെങ്കിലും കേബിള്‍ കണക്‌ഷന്‍ വിടുമോ? ഓടുന്ന ജനറേറ്റര്‍ പെട്ടെന്ന് നിന്നുപോകുമോ? പരിപാടിക്കെത്തിയ ആരെങ്കിലും അറിയാതെ കേബിള്‍ പിടിച്ചു വലിച്ചിടുമോ? അങ്ങനെ പല പല കാര്യങ്ങള്‍ ഓര്‍ത്തുള്ള ടെന്‍ഷനിലായിരിക്കും ഉടമസ്ഥന്‍. പരിപാടി കഴിഞ്ഞ് മൈക്ക് ഓഫ് ചെയ്യുന്നതുവരെ സമാധാനം ഉണ്ടാകില്ലെന്നു ചുരുക്കം’’– ഗഫൂർ പറയുന്നു.

∙ ‘ശബ്ദം പോരാ, കൂട്ടണം... എവിടെനിന്ന് കൂട്ടാനാണ്!’

‘‘മൈക്കിനു മുന്നിൽനിന്ന് പതുക്കെ സംസാരിക്കുന്നവരും ഉറക്കെ സംസാരിക്കുന്നവരുമുണ്ട്. പതുക്കെ സംസാരിക്കുന്നവര്‍ക്കാണെങ്കില്‍ സൗണ്ട് സിസ്റ്റം കൂട്ടേണ്ടി വരും. 2 സൗണ്ട് ബോക്‌സ് വയ്ക്കുന്നതിനു പകരം 4, 6 സ്പീക്കര്‍ ബോക്‌സ് വരെ വയ്‌ക്കേണ്ടി വരും. എന്നാല്‍ 30,000 രൂപയുടെ സൗണ്ട് സിസ്റ്റം വേണ്ടയിടത്ത് തങ്ങള്‍ക്ക് ഫണ്ട് കുറവാണെന്നും 10,000 രൂപയ്ക്കുള്ള സൗണ്ട് സിസ്റ്റം ഒരുക്കിയാല്‍ മതിയെന്നും പറഞ്ഞ് വരുന്ന സംഘാടകരുണ്ട്. അപ്പോള്‍ അവര്‍ ആവശ്യപ്പെട്ടതുപോലെയുള്ള സംവിധാനമായിരിക്കും ഒരുക്കുക. ആ ശബ്ദം ഒരു 10,000 പേരിലേക്ക് എത്തുംവിധമായിരിക്കും വിന്യാസം. ആ സ്ഥാനത്ത് പരിപാടിക്ക് എത്തുക 30,000ത്തിലേറെ പേരായിരിക്കും. അവർക്ക് എങ്ങനെ ശബ്ദം കേൾക്കാനാണ്. എന്നിട്ട് ശബ്ദം കൂട്ട്, കൂട്ട്... എന്ന് ആളുകള്‍ പറയും. ഞങ്ങള്‍ എവിടെനിന്ന് കൂട്ടാനാണ്? അങ്ങനെ കൂട്ടുമ്പോഴാണ് ഹൗളിങ് (മൈക്കിലെ നീണ്ട മൂളല്‍ പോലുള്ള ശബ്ദം) വരുന്നത്.

മറ്റൊരു ഉദാഹരണം പറയാം, ഒരു ബസ് സ്റ്റാന്‍ഡില്‍ 200 പേര്‍ വരുന്ന പരിപാടിക്ക് രണ്ട് ബോക്‌സ്, 2 മോണിറ്റര്‍, ഒരു ജനറേറ്ററും വച്ച് 2 തൊഴിലാളികളെയും വിട്ടാല്‍ 5000 രൂപ തരാമെന്ന് പറയും. ആ തുകയ്ക്ക് 200 പേര്‍ക്ക് കേള്‍ക്കാന്‍ 1000 വാട്‌സ് സൗണ്ട് ഒരുക്കുകയും ചെയ്യും. എന്നാല്‍ അവിടെ 1500 പേര്‍ പങ്കെടുത്തിട്ട് ശബ്ദം കേള്‍ക്കുന്നില്ലെന്ന് പരാതി പറയും. സംഘാടകര്‍ 5,000 രൂപയാണ് തന്നതെന്നും അതിനുള്ള സംവിധാനമാണ് ഒരുക്കിയതെന്നും നാട്ടുകാരോട് പറയാന്‍ പറ്റുമോ?’’- ഗഫൂര്‍ ചോദിക്കുന്നു.

∙ ‘വരാനിരിക്കുന്ന പരിപാടികളെയും ബാധിക്കുന്നു’

പാലക്കാട് കൊഴിഞ്ഞാമ്പാറ അത്തിക്കോട് ലൈറ്റ് ആന്‍ഡ് സൗണ്ട് ഉടമ ബാലകൃഷ്ണന്റെ അഭിപ്രായവും വ്യത്യസ്തമല്ല. അദ്ദേഹത്തിന്റെ വാക്കുകളിങ്ങനെ: ‘‘ബോക്‌സ് സ്പീക്കര്‍ ഇല്ലാത്ത കാലത്ത് കോളാമ്പിയായിരുന്നു (ലൗഡ് സ്പീക്കർ) താരം. പാര്‍ട്ടി പരിപാടികള്‍ക്കും പ്രചാരണത്തിനുമെല്ലാം കോളാമ്പിയായിരുന്നു ഉപയോഗിച്ചിരുന്നത്. മൈതാനങ്ങളില്‍ നടക്കുന്ന വലിയ പരിപാടികള്‍ക്ക് 50 കോളാമ്പിയെങ്കിലും വേണ്ടി വരും. ഇന്ന് എല്ലാം ആധുനിക സൗകര്യങ്ങളോടെയുള്ള ഇലക്ട്രോണിക്‌സ് ഉപകരണങ്ങളായി. ഉത്സവപരിപാടികളിലും മാറ്റങ്ങള്‍ വന്നിട്ടുണ്ട്. നാട്ടിന്‍പുറത്തെ ചെറിയ സ്‌റ്റേജ് പരിപാടികള്‍ക്ക് പോലും ഡിജെ ലൈറ്റ്, സ്‌മോക്, ഫയര്‍ എല്ലാം വേണം. കിട്ടുന്ന തുകയാകട്ടെ തുച്ഛവും. ഉത്സവത്തിനിടയ്ക്കുള്ള അടിപിടിയില്‍ ലൈറ്റും മറ്റും ചിലര്‍ അടിച്ചുപൊട്ടിച്ചാല്‍ പോയതുതന്നെ. അതിനുള്ള പണം കിട്ടുന്നത് അപൂര്‍വമാണ്. പണം ചോദിച്ചാൽ പറയും ‘ബാലേട്ടൻ നമ്മുടെ ആളല്ലേ, ഇതൊക്കെ മതി’ എന്ന്. അങ്ങനെ ഉപകരണങ്ങൾ കേടാകുന്നതിന്റെ നഷ്ടം തീർത്ത്, തൊഴിലാളികൾക്കുള്ള കാശും കൊടുത്തു കഴിയുമ്പോൾ കയ്യിൽ പിന്നൊന്നും ബാക്കിയുണ്ടാകില്ല. ‌സൗണ്ട് ആയാലും ലൈറ്റായാലും, കേബിള്‍ കണക്ട് ചെയ്യുന്നതില്‍ ചെറിയ പിഴവ് ഉണ്ടായാല്‍ വലിയ ആഘാതമാണ് നേരിടേണ്ടി വരിക. അതുകൊണ്ടുതന്നെ ഏത് പരിപാടി ഏറ്റെടുത്താലും അത് ഭംഗിയായി അവസാനിക്കുന്നതുവരെ ഊണുമില്ല, ഉറക്കവുമില്ല.’’– ബാലകൃഷ്ണൻ പറയുന്നു.

നേതാക്കൾ പ്രസംഗിക്കുമ്പോൾ മൈക്കില്‍നിന്ന് മാറിനിൽക്കുന്ന സാഹചര്യവുമുണ്ട്. ജനങ്ങളെ കൈയ്യിലെടുക്കാൻ പ്രസംഗത്തിനിടെ അങ്ങോട്ടും ഇങ്ങോട്ടും നോക്കുകയും മൈക്കിൽനിന്ന് അകന്ന് ആളുകളോട് കുശലം പറയുകയുമെല്ലാം ചെയ്യും. മൈക്ക് കൈയിൽ പിടിച്ചുകൊണ്ടാണ് സംസാരമെങ്കിൽ കുഴപ്പമില്ല. സ്റ്റാൻഡിൽ ഘടിപ്പിച്ചു വച്ചതാണെങ്കിൽ പണി കിട്ടും. പറയുന്നത് കേൾക്കുന്നില്ലെന്നു പറഞ്ഞ് നാട്ടുകാർ ക്ഷുഭിതരാകും. ഒടുവിൽ  പഴി മുഴുവൻ സൗണ്ട് ഉടമയ്ക്ക് മാത്രം. അയാളുടെ സൗണ്ട് സിസ്റ്റം ശരിയല്ലെന്ന് നാട്ടുകാർ പ്രചരിപ്പിച്ചാൽ വരാനിരിക്കുന്ന പരിപാടികളെയും അത് ബാധിക്കുമെന്ന ആശങ്കയും ബാലകൃഷ്ണന്‍ പങ്കുവയ്ക്കുന്നു.

∙ ‘പാട്ടുകാരും മിമിക്രിക്കാരും പെര്‍ഫെക്ട്’

രാഷ്ട്രീയക്കാരെപ്പോലെയല്ല, ഗായകരും മിമിക്രിക്കാരും മൈക്ക് കൃത്യമായി കൈകാര്യം ചെയ്യുന്നവരാണെന്നും ലൈറ്റ് ആൻഡ് സൗണ്ട് മേഖലയിൽ പ്രവർത്തിക്കുന്നവർ പറയുന്നു. ‘‘യേശുദാസിനെ പോലുള്ള ഗായകര്‍ക്ക് ഷുവര്‍, എകെജി മൈക്കുകളാണ് നല്‍കുക. പരിപാടിക്കു വരുംമുന്‍പുതന്നെ എന്തൊക്കെ വേണമെന്ന ലിസ്റ്റ് കലാകാരന്മാര്‍ നല്‍കാറുണ്ട്. സാധാരണ മൈക്ക്, വയര്‍ലസ് മൈക്ക്, മൈക്ക് സ്റ്റാന്‍ഡ്, മോണിറ്റര്‍ തുടങ്ങിയവയുടെ എണ്ണവും എത്ര വാട്‌സ് സൗണ്ട് വേണമെന്നതും ഏതു കമ്പനിയുടെ സൗണ്ട് ബോക്‌സ് വയ്ക്കണമെന്നതും അവര്‍ ലിസ്റ്റില്‍ വ്യക്തമാക്കും. അതനുസരിച്ച് കണക്കുകൂട്ടിയാണ് തങ്ങള്‍ക്ക് ഇത്ര തുക വേണമെന്ന് സംഘാടകരെ അറിയിക്കുന്നത്. 60,000 രൂപ പറഞ്ഞാല്‍ 20,000 രൂപയേ നല്‍കാനാകൂ എന്നു സംഘാടകര്‍ പറഞ്ഞാല്‍ പരിപാടിയില്‍നിന്ന് ഒഴിവാകും. അല്ലെങ്കില്‍ ആ തുകയ്ക്കുള്ള സംവിധാനം മാത്രം ഒരുക്കികൊടുക്കും. ഞങ്ങള്‍ ഇങ്ങനെയല്ല പറഞ്ഞത്, ലിസ്റ്റില്‍ പറഞ്ഞതൊന്നും വച്ചിട്ടില്ലെന്നു പറഞ്ഞ് ചിലപ്പോഴൊക്കെ പാട്ടുകാര്‍ ഞങ്ങള്‍ക്കുനേരെ തിരിയാറുണ്ട്. ഇപ്പോള്‍ ഇത്തരം പ്രശ്‌നങ്ങളൊക്കെ കുറഞ്ഞു. എല്ലാവരും പണം നോക്കാതെ പരിപാടി ഗംഭീരമാകണമെന്ന് ചിന്തിച്ചുതുടങ്ങി’’– ഗഫൂർ ഷഫയുടെ വാക്കുകൾ.

∙ തിരഞ്ഞെടുപ്പ് സമയത്ത് കിട്ടുന്ന പ്രത്യേക പരിഗണന, ആരോട് പറയാന്‍?

ശബ്ദ മലിനീകരണ പ്രശ്നം കാരണം, രാത്രി 10 മുതല്‍ രാവിലെ 6 വരെ ഉച്ചഭാഷിണി ഉപയോഗിക്കരുതെന്ന് 2022ലെ സുപ്രീംകോടതി ഉത്തരവില്‍ പറയുന്നുണ്ട്. പ്രത്യേക സാഹചര്യങ്ങളില്‍ അര്‍ധരാത്രി വരെ ഉച്ചഭാഷിണി ഉപയോഗിക്കാമെന്നും ഉത്തരവില്‍ വ്യക്തമാക്കുന്നുണ്ട്. എന്നാല്‍ ഇക്കാര്യം ഇവിടെയാരും മുഖവിലയ്‌ക്കെടുക്കുന്നില്ല. രാത്രി 10 മണിയായിക്കഴിഞ്ഞാല്‍ പൊലീസെത്തി എല്ലാം ഓഫ് ചെയ്യാന്‍ പറയും. ഉത്സവ–പെരുന്നാൾ സീസണുകളിലാണ് ഗാനമേള പോലുള്ള വലിയ പരിപാടികള്‍ ലഭിക്കുന്നത്. സമയപരിമിതി കാരണം പല പരിപാടികളും കമ്മിറ്റിക്കാര്‍ റദ്ദാക്കുകയാണ്. സീസണിലെങ്കിലും രണ്ടു മണിക്കൂര്‍ അധികസമയം നല്‍കുന്നതില്‍ എന്താണു പ്രശ്‌നമെന്നാണ് മേഖലയിൽ പ്രവർത്തിക്കുന്നവർ ചോദിക്കുന്നത്.

‘‘ലോക്‌സഭാ തിരഞ്ഞെടുപ്പ് പോലുള്ളവ വരുമ്പോൾ ഒരു മണ്ഡലത്തില്‍ ഒരു പാര്‍ട്ടിക്കു മാത്രം പ്രചാരണത്തിന് ചുരുങ്ങിയത് 75 വാഹനങ്ങളില്‍ മൈക്ക് ഉപയോഗിക്കും. അങ്ങനെ എല്ലാ മുന്‍നിര പാര്‍ട്ടികളും ചെറുപാര്‍ട്ടികള്‍ക്കുമായി 250 വാഹനങ്ങളെങ്കിലും മൈക്കുമായി ഒരു മണ്ഡലത്തില്‍ മാത്രം ഓടും. ആ സമയങ്ങളിലൊന്നും ശബ്ദമലിനീകരണം ഉണ്ടാകില്ലേയെന്നും മേഖലയിലുള്ളവർ ചോദിക്കുന്നു. പണ്ടത്തെപ്പോലെ ജീപ്പും സുമോയുമൊന്നും ഇന്നില്ല. ഇന്നോവയിലാണ് പ്രചാരണം നടക്കുന്നത്. അതില്‍ എങ്ങനെയാണ് മൈക്കും ജനറേറ്ററും ആംപ്ലിഫയറും ഘടിപ്പിക്കുന്നത്? ആ സമയത്ത് സൗണ്ടുകാരുടെ സ്വകാര്യ വാഹനങ്ങളും പ്രചാരണത്തിനായി ഉപയോഗിക്കാന്‍ പൊലീസ് അനുമതി നല്‍കും. പക്ഷേ മറ്റ് സമയങ്ങളിലൊന്നും അനുവാദം ലഭിക്കുകയുമില്ല. അതെന്താണ് അങ്ങനെ?’’- ഗഫൂര്‍ ചോദിക്കുന്നു.

കേരളത്തില്‍ ലൈറ്റ് ആന്‍ഡ് സൗണ്ട് സര്‍വീസ് മേഖലയില്‍ ഉടമസ്ഥരും തൊഴിലാളികളുമായി നാലര ലക്ഷത്തോളം പേരുണ്ട്. കോവിഡ് വന്നതോടെ കഴിഞ്ഞ രണ്ടുവര്‍ഷം പട്ടിണിയുടെ വക്കിലായിരുന്നു ഇവരിലേറെയും. ഉത്സവ സീസണ്‍ മുന്നില്‍ കണ്ട് 43 ലക്ഷത്തിന്റെ ആധുനിക ഇലക്ട്രോണിക് ഉപകരണങ്ങള്‍ വാങ്ങിവച്ചവർ പോലുമുണ്ട്. രണ്ട് മാസം കഴിഞ്ഞതോടെ കോവിഡ് വരികയും എല്ലാം അടച്ചുപൂട്ടിയിടുകയും ചെയ്തു. ഈ ബാധ്യത ആരോടാണു പറയേണ്ടതെന്നും ചോദിക്കുന്നു ഗഫൂർ. ഇക്കഴിഞ്ഞ രണ്ടു വര്‍ഷത്തിനിടെ 12 പേരാണ് ഈ മേഖലയില്‍ ആത്മഹത്യ ചെയ്തത്. അവരുടെ കുടുംബത്തിന് സര്‍ക്കാര്‍ എന്തു സഹായമാണ് നല്‍കിയതെന്ന ചോദ്യവും ഉയരുന്നു.

English Summary: CPM State Secretary MV Govindan Scolds Mic Operator: What do Sound and Light Operators Have to Say about this?