ലാത്തിച്ചാർജ്, കണ്ണീർവാതകം, ജലപീരങ്കി: പൂക്കോട് സർവകലാശാലയിലേക്ക് കെഎസ്‍യു–എംഎസ്എഫ് മാർച്ച്

വൈത്തിരി∙ ജെ.എസ്.സിദ്ധാർഥന്റെ മരണത്തിൽ കുറ്റവാളികളായവരെ പിടിക്കണമെന്നാവശ്യപ്പെട്ട് പൂക്കോട് വെറ്ററിനറി സർവകലാശാലയിലേക്ക് കെഎസ്‌‌യു– എംഎസ്എഫ് പ്രവർത്തകർ നടത്തിയ മാർച്ചിൽ വൻ സംഘർഷം. പൊലീസ് ലാത്തിച്ചാർജും ജലപീരങ്കിയും ഗ്രനേഡും പ്രയോഗിച്ചു. നിരവധിപ്പേർക്ക് പരുക്കേറ്റു. പൊലീസും പ്രവർത്തകരും തെരുവിൽ ഏറ്റുമുട്ടിയതോടെ യുദ്ധക്കളമായി.

രാവിലെ പതിനൊന്നരയോടെ എംഎസ്എഫ് പ്രവർത്തകരുടെ മാർച്ചാണ് ആദ്യം ക്യാംപസിലേക്ക് എത്തിയത്. ഇതു ബാരിക്കേഡ് വച്ച് പൊലീസ് തടഞ്ഞു. ബാരിക്കേഡ് മറികടക്കാൻ ശ്രമിച്ചതോടെയാണ് ജലപീരങ്കി പ്രയോഗിച്ചത്. തുടർന്ന് പ്രവർത്തകർ നിലത്ത് കുത്തിയിരുന്നു മുദ്രാവാക്യം വിളിക്കാൻ തുടങ്ങി. എംഎസ്എഫ് സംസ്ഥാന പ്രസിഡന്റ് പി.െക.ഫിറോസ് ഉദ്ഘാടനം ചെയ്തു. എംഎസ്എഫിന്റെ വ്യാജ മെംബർഷിപ് വിതരണം ചെയ്യുന്നത് എസ്എഫ്ഐ നിർത്തണമെന്ന് ഫിറോസ് ആവശ്യപ്പെട്ടു.

Read Also: സിദ്ധാർഥനെ മർദിച്ച കുന്നിൽ മുകളിൽ പൊലീസും പ്രതികളും; തെളിവെടുപ്പ് തുടരുന്നു

തുടർന്ന് ഒരു മണിയോടെയാണ് കെഎസ്‌യുവിന്റെ മാർച്ച് എത്തിയത്. ഇതോടെ എംഎസ്എഫ് പ്രവർത്തകരും കെഎസ്‌യു പ്രവർത്തകരും ഒരുമിച്ച് ബാരിക്കേഡ് മറികടക്കാൻ ശ്രമിച്ചു. ഇതോടെ പൊലീസ് ജലപീരങ്കി പ്രയോഗിച്ചു. ഇതിനിടെ പ്രവർത്തകർ പൊലീസിനുനേരെ കല്ലേറും നടത്തി. പ്രവർത്തകർ ക്യാംപസിലേക്ക് കയറാൻ ശ്രമിച്ചതോടെ പൊലീസ് ലാത്തിച്ചാർജ് ആരംഭിച്ചു. നിരവധിപ്പേരെ വളഞ്ഞിട്ടു തല്ലി. പരുക്കേറ്റവരിൽ ചിലർക്ക് നിലത്തുനിന്ന് എഴുന്നേൽക്കാൻ പോലും സാധിക്കാത്ത അവസ്ഥയായിരുന്നു. ഇവരിൽ ചിലരെ പ്രവർത്തർ തന്നെ വാഹനത്തിൽ കയറ്റി ആശുപത്രിയിലേക്ക് കൊണ്ടുപോയി.

ഇതിനിടെ പരുക്കേറ്റ ഒരു പ്രവർത്തകൻ നിലത്തുതന്നെ കിടക്കുകയായിരുന്നു. പൊലീസ് ഇയാളെ സ്ഥലത്തുനിന്ന് മാറ്റാൻ തയാറായില്ല. ഏറെ നേരം കഴിഞ്ഞ് മറ്റു പ്രവർത്തകർ എത്തിയാണ് ഇയാളെ ആംബുലൻസിൽ കയറ്റിക്കൊണ്ടുപോയത്. ഗ്രനേഡ് പൊട്ടിയും നിരവധിപ്പേർക്ക് പരുക്കേറ്റു. ടി. സിദ്ദിഖ് എംഎൽഎ എത്തിയാണ് സംഘർഷം നിയന്ത്രിച്ചത്. പരുക്കേറ്റവരെ ആശുപത്രിയിൽ കൊണ്ടുപോകാൻ പൊലീസ് തയാറാകാത്തതിനെ അദ്ദേഹം ചോദ്യം ചെയ്തു. തുടർന്ന് പൊലീസുമായി വാക്കേറ്റമുണ്ടായി.

പൊലീസിന്റെ ക്രൂരമർദനത്തിൽ പ്രതിഷേധിച്ച് എംഎസ്എസ് പ്രവർത്തകർ ദേശീയപാത ഉപരോധിച്ചു. കൽപറ്റ –കോഴിക്കോട് റോഡാണ് ഉപരോധിച്ചത്. നിരവധി വാഹനങ്ങൾ റോഡിൽ കുടുങ്ങി. എസ്എഫ്ഐയുടെ കൊടിയും ബാനറും വെയിറ്റിങ് ഷെഡ്ഡിലെ എസ്എഫ്ഐ എന്നെഴുതിയ ബാനറും ഉൾപ്പെടെ നശിപ്പിച്ചു. പ്രതിഷേധം റോഡിലേക്ക് നീങ്ങിയപ്പോൾ സർവകലാശാലയുടെ പ്രധാന ഗേറ്റ് പൊലീസ് അടച്ചു. ടി.സിദ്ദിഖ് എംഎൽഎ ഇടപെട്ട് റോഡ് ഉപരോധവും അവസാനിപ്പിക്കുകയായിരുന്നു.

കെഎസ്‌യു പ്രവർത്തകർ ക്യാംപസിന് മുന്നിൽ നടത്തിവന്ന നിരാഹാര സമരവും അവസാനിപ്പിച്ചു. അഞ്ച് ദിവസമായി നടത്തിവന്ന സമരമാണ് അവസാനിപ്പിച്ചത്. ആരോഗ്യനില വഷളാകുകയും സംസ്ഥന കമ്മിറ്റി സമരം ഏറ്റെടുക്കുകയും ചെയ്തതോടെയാണ് ക്യാംപസിന് മുന്നിലെ സമരം അവസാനിപ്പിച്ചത്.