ഇതാണ് മേയർ പറയുന്ന ഡ്രൈവറുടെ കേസ് ഡയറി; ആകെ കേസ് 3, തീർപ്പായത് 3; അശ്ലീലവർത്തമാനം, ഡ്രൈവിങ് പിഴവ്

തിരുവനന്തപുരം ∙ കെഎസ്ആർടിസി ഡ്രൈവർ എൽ.എച്ച്. യദുവിനെതിരെ നേരത്തേയുണ്ടെന്ന് മേയർ ആര്യ രാജേന്ദ്രൻ പറയുന്ന കേസുകൾ ഏതൊക്കെ. ഏതാനും ദിവസമായി വാർത്തകളിൽ പതിവായി കാണുന്നതാണ് യദുവിന്റെ മുൻ കേസുകൾ. ഡ്രൈവർക്കെതിരെ 3 കേസുകളുണ്ടെന്ന് മേയർ ആര്യ രാജേന്ദ്രന്റെ ആരോപണത്തിന് യദുവിന്റെ മറുപടി ആ കേസുകൾ തള്ളിയതാണെന്നാണ്. ആ കേസുകൾ ഏതൊക്കെയാണ്. ?

യദുവിനെതിരെ 3 കേസുകൾ ; അവ തീർപ്പായി 

സ്ത്രീയെ അപമാനിച്ചതിനു ഒരു കേസും അലക്ഷ്യമായി വാഹനം ഓടിച്ചതിനു രണ്ടു കേസുകളും യദുവിനെതിരെയുണ്ടായിരുന്നു. സ്ത്രീയെ അപമാനിച്ചെന്ന പരാതി ഒത്തുതീർപ്പാക്കി. അലക്ഷ്യമായി വാഹനം ഓടിച്ച കേസുകൾ പിഴയിലൊതുങ്ങി. 

കേസ് 1 

2017 മാർച്ചിലാണ് യദുവിനെതിരെ ആദ്യ കേസ് റജിസ്റ്റർ ചെയ്യുന്നത്. നേമം തളിയാദിച്ചപുരം റോഡിൽവച്ച് യുവതിയെ തടഞ്ഞുനിർത്തി തന്റെ വസ്ത്രം ഊരി കാണിച്ച് അശ്ലീല വർത്തമാനം പറഞ്ഞതിനാണ് കേസ് റജിസ്റ്റർ ചെയ്തത്. ഈ കേസ് പിന്നീട് കോടതിയിൽ ഒത്തുതീർപ്പിലെത്തി. 

കേസ് 2 

2017 നവംബറിലാണ് രണ്ടാമത്തെ കേസ് റജിസ്റ്റർ ചെയ്തത്. പേരൂർക്കട ഭാഗത്തുനിന്നും കുടപ്പനക്കുന്ന് ഭാഗത്തേക്ക് കെഎസ്ആർടിസി ബസ് അപകടകരമായി ഓടിച്ചതിനാണ് നേമം വെള്ളായണി സ്വദേശിയായ യദുവിനെതിരെ പൊലീസ് കേസെടുത്തത്. 

കേസ് 3 

പ്രൈവറ്റ് ബസിന്റെ ഡ്രൈവറായി ജോലി ചെയ്യുമ്പോൾ കിഴക്കേക്കോട്ട നിന്നും തമ്പാനൂർ ഭാഗത്തേക്ക് ഓടിച്ച് സിഗ്നലിൽ നിർത്തിയിട്ടിരുന്ന കെഎസ്ആർടിസി ബസിൽ ഇടിച്ചതാണ് മൂന്നാമത്തെ കേസ്. ഈ സംഭവത്തിൽ പരാതി നൽകിയ യുവതിക്ക് ബസിലെ സീറ്റില്‍നിന്നും തെറിച്ച് മുന്നിലെ കമ്പനിയിൽ ചെന്ന് ഇടിച്ച് കൈയ്ക്ക് പരുക്കേറ്റിരുന്നു. 

കേസ് 4 

മേയർ ആര്യ രാജേന്ദ്രൻ കെഎസ്ആർടിസി ബസിനു മുന്നിൽ കാർ നിർത്തി ഡ്രൈവറോട് തർക്കിച്ച സംഭവം ചൂടുപിടിച്ച ചർച്ചയും രാഷ്ട്രീയ വിവാദവുമാണ്. സംഭവത്തിൽ മേയറെയും ഡ്രൈവറെയും പിന്തുണയ്ക്കുന്നവരുണ്ട്. മേയർ നൽകിയ പരാതിയിൽ കന്റോൺമെന്റ് പൊലീസ് കേസെടുത്തു. ഡ്രൈവറുടെ പരാതിയിൽ മേയർക്കെതിരെ കേസെടുത്തിട്ടില്ല. 

ആ കേസുകൾ കോടതി തള്ളിയത്: യദു 

കേസുകൾ കോടതി തള്ളിയതാണ്. കേസ് ഉണ്ടെങ്കിൽ സർക്കാർ സ്ഥാപനത്തിൽ ജോലിക്കെടുക്കില്ല. മേയർക്കെതിരെ കേസുമായി മുന്നോട്ടുപോകും.